ខេត្តកណ្តាល ៖ ប្រពន្ធ័ផ្លូវស្ពានរំដោះទឹកមួយកន្លែងនៅតាមបណ្តយផ្លូវជាតិលេខ១ បើទៅពីរាជធានីភ្នំពេញមានចម្ងាយ ប្រហែលជាង៤០គីឡូម៉ែត្រ ត្រង់ចំណុចស្ពានជប៉ុនទី១ ស្ថិតក្នុងភូមិសំរោងក្អែ ឃុំសំរោងធំ ស្រុកកៀនស្វាយ ខេត្តកណ្តាល ត្រូវបានបុគ្គលម្នាក់នៅតែបន្តដាក់គ្រឿងចក្រលើកទំនប់បិទជិតពីខាងមុខស្ពានសម្រាប់រំដោះទឹកនេះ តែម្តង។ ដែលសកម្មភាពនេះបាននឹងកំពុងតែធ្វើឲ្យប្រជាពលរដ្ឋរស់នៅក្នុងភូមិសំរោងក្អែទាំងមូល មានការព្រួយបារម្ភ យ៉ាងខ្លាំងនូវបញ្ហាគ្រោះទឹកជំនន់ជន់លិចប៉ះពាល់ដល់ផ្ទះសម្បែង និងផលដំណាំរបស់ពួកគាត់នារដូវទឹកដំឡើង។ ប្រជាពលរដ្ឋរស់នៅក្នុងភូមិសំរោងក្អែ បានលើកឡើងថា កាលពីអំឡុងឆ្នាំ២០០០គ្រោះមហន្តរាយទឹកជំនន់បានឡើងធំ បណ្តាលឲ្យផ្ទះសម្បែង និងផលដំណាំរបស់ពលរដ្ឋរាប់រយហិកតារងការខូចខាត។ ជាពិសេសក្តីព្រួយបារម្ភរបស់ពលរដ្ឋ ខ្លាំងបំផុតនោះគឺខ្លាចទឹកជំនន់ហូរបុកដាច់ថ្នល់ជាតិលេខ១មានគ្រោះថ្នាក់ដល់អាយុជីវិតមនុស្ស។
ប៉ុន្តែដោយមានការ យកចិត្តទុកដាក់របស់ប្រមុខរាជរដ្ឋាភិបាលដែលមានសម្តេចតេជោ ហ៊ុន សែន នាយករដ្ឋមន្ត្រីបានយកកម្លាំងទ័ព រាប់រយពាន់នាក់មកត្រៀមប្រចាំការចាំជួយសង្គ្រោះប្រជាពលរដ្ឋគ្រប់ពេលវេលាទាំងយប់ទាំងថ្ងៃ។ ដោយភាពឆ្លាតវៃរបស់ សម្តេចតេជោ ក៏បានរិះរកវិធីសាស្ត្រកាយផ្តាច់ផ្លូវជាតិលេខ១ជាច្រើនកន្លែង ដើម្បីឲ្យមានប្រពន្ធ័ទឹកហូរចេញទើបទប់ទល់ ស្ថានការណ៍បាន។ បន្ទាប់មកសម្តេចបានធ្វើការអភិវឌ្ឍន៍ពង្រីកផ្លូវជាតិលេខ១ និងស្ថាបនាធ្វើស្ពានធំៗត្រង់ចំណុច ដែលកាយផ្តាច់នោះ ដើម្បីបើកផ្លូវប្រពន្ធ័រំដោះទឹកកុំឲ្យកើតមានគ្រោះមហន្តរាយទឹកជំនន់ បង្កការលិចលង់ប៉ះពាល់ដល់ ការរស់នៅរស់ពលរដ្ឋជួបការលំបាក។ ប្រជាពលរដ្ឋបន្តថា ស្រាប់តែឥឡូវមានបុគ្គលម្នាក់ឈ្មោះ ស៊ិន ណារី ហៅ(ឡាក់) បានមកអះអាងថា ដីចំណុចមុខស្ពានជប៉ុនទី១ ក្នុងភូមិ.ឃុំខាងលើនេះ ជាដីកម្មសិទ្ធរបស់គាត់បានទិញពីម្ចាស់ដើម តាំងពីមុនស្ពានមិនទាន់ធ្វើ ហើយបានដាក់គ្រឿងចក្រធ្វើសកម្មភាពកាយលើកទំនប់បិទជិតឈឹងចំពីមុខស្ពានតែម្តង។
បើទោះបីជាពួកគាត់ជាពលរដ្ឋសូមសំណូមពរតវ៉ារហូតដល់កម្លាំងចម្រុះរបស់គណៈបញ្ជាការឯកភាពស្រុកកៀនស្វាយចុះមកអន្តរាគមន៍សម្របសម្រួលណែនាំឲ្យបុគ្គលឈ្មោះ ស៊ិន ណារី ម្ចាស់ដីនោះធ្វើត្រូវទុកផ្លូវទឹក និងដាក់លូខាងជើងខាងត្បូង យ៉ាងណាក៏ដោយក៏បុគ្គលនេះមិនអនុវត្តតាមដែរ។ បានន័យថា យល់ព្រមតែពីមុខអាជ្ញាធរ ពេលអាជ្ញាធរទៅបាត់បុគ្គលនេះនៅតែបន្តសកម្មភាពយ៉ាងគឃ្លើន។ ប្រជាពលរដ្ឋបានសម្តែងការព្រួយបារម្ភយ៉ាងខ្លាំង នាពេលរដូវទឹកឡើងគ្មានប្រពន្ធ័សម្រាប់ឲ្យទឹកហូរចេញដែលនាំឲ្យទឹកចាលបុកចូលមកក្នុងភូមិប៉ះពាល់ផលដំណាំ និងលិចផ្ទះសម្បែង។ ជាពិសេសខ្លាចទឹកហូរកាត់ផ្លូវលំខាងលិចថ្នល់ហូរច្រោះដាច់ រងការខូចខាតធ្វើឲ្យពួកគាត់ ជួបការលំបាកក្នុងការដឹកជញ្ជូនកសិផលឡើងពីបឹងយកឡើងមកផ្ទះ។ ណាមួយព្រួយបារម្ភពីបញ្ហាខ្លាចអត់មានផ្លូវទូក របស់អ្នកនេសាទចេញចូលខែទឹកឡើងទៀតផង។
ហេតុដូច្នេះប្រជាពលរដ្ឋសូមសំណូមពរសូមឲ្យ សម្តេចតេជោ ហ៊ុន សែន មេត្តាជួយទប់ស្កាត់ និងបើកផ្លូវរំដោះទឹកឲ្យបានដូចដើមវិញផង។ ពាក់ពន្ធ័បញ្ហាខាងលើនេះលោក ជន់ ប៉េងឡុង ប្រធានមន្ទីរធនធានទឹកខេត្តកណ្តាលក៏ធ្លាប់បានប្រាប់ភ្នាក់ងារកោះសន្តិភាពតាមទូរស័ព្ទយ៉ាងខ្លីថា លោកបញ្ជាឲ្យស្រុកចុះទៅធ្វើហើយ។ ចំណែកលោក លឹម ចាន់សុភី ប្រធានមន្ទីររៀបចំដែនដីនគរូបនីយកម្ម និងសំណង់ខេត្តកណ្តាល ក៏ធ្លាប់បានប្រាប់ឲ្យដឹងដែរថា ចាំលោកចាត់មន្ត្រីជំនាញចុះមកហាមឃាត់ដែរ។ ប៉ុន្តែបច្ចុប្បន្ននេះគេសង្កេតឃើញបុគ្គលឈ្មោះ ស៊ិន ចាន់ណារី នេះនៅតែបន្តដាក់គ្រឿងចក្រធ្វើសកម្មភាពលើកទំនប់ខ្ពស់ ទៅៗឡើងចង់ស្មើថ្នល់ជាតិទៅហើយ មិនទាន់ឃើញមានអាជ្ញាធរ ឬមន្ត្រីជំនាញស្ថាប័នពាក់ពន្ធ័ណាមួយ ចុះមកអនុវត្តច្បាប់ឲ្យមានប្រសិទ្ធភាពនោះឡើយ។
បើតាមប្រភពពីមន្ត្រីដែលធ្លាប់បម្រើការងារនៅសាលាឃុំសំរោងធំ សូមមិនបញ្ចេញឈ្មោះបានប្រាប់ថា តាមពិតដីរបស់ឈ្មោះ ស៊ិន ចាន់ណារី ហៅឡាក់ នេះគេទិញតាំងពីជំនាន់លោក ឃឹម បូ នៅធ្វើជាអភិបាលខេត្តមកម្លេះ។ តែគាត់ទទួលមរណៈភាពយូរឆ្នាំហើយ ហើយដីនេះប្រហែលជារាជរដ្ឋាភិបាល ដោះស្រាយគោលនយោបាយផលប៉ះពាល់ផ្លូវរួចរាល់អស់ហើយ។ ប៉ុន្តែបុគ្គលនេះខូចមិនត្រឹមតែបិទផ្លូវទឹកខាងមុខស្ពាន ប៉ុណ្ណោះទេ ថែមទាំងមានបំណងរំលោភយកចាក់ដីលុបបុកមកដល់ថ្នល់ជាតិ និងបម្រុងបិទផ្លូវខាងក្រោមស្ពានមិនឲ្យពលរដ្ឋដើរឆ្លងកាត់ទៀតផង៕
ចែករំលែកព័តមាននេះ