ខេត្តកំពង់ឆ្នាំង ៖ នៅថ្ងៃទី២២ ខែមេសា ឆ្នាំ២០១៨ មានអគ្គីភ័យកើតឡើងចំនួនពីរកន្លែងនៅក្នុងស្រុកចំនួនពីរដាច់ដោយឡែកពីគ្នាបណ្ដាលឲ្យឆេះអស់ផ្ទះចំនួន២ខ្នង និងទ្រព្យសម្បត្តិជាច្រើនទៀត ប៉ុន្តែក្នុងហេតុការទាំងពីរករណីមិនមាននរណាម្នាក់បានរងរបួសនោះទេ ។
ក្នុងហេតុការអគ្គីភ័យនេះកើតឡើងលើកទី១នៅវេលាម៉ោង១០និង៣០នាទីព្រឹក នៅចំណុចភូមិកំពង់ក្តារ ឃុំកំពង់ត្រឡាច ស្រុកកំពង់ត្រឡាច បណ្តាលឱ្យផ្ទះរបស់ឈ្មោះ តូច ម៉ារ៉ាន់ ជាសមាជិកក្រុមប្រឹក្សាស្រុកកំពង់ត្រឡាច មានទំហំ៥ម៉ែត្រគុណ៧ម៉ែត្រ ដំបូលស័ង្កសី ជញ្ជាំងក្តារ ក្រាលក្តា បានរងការខូចខាតឆេះទាំងស្រុង ។
សម្ភារៈខូចខាតមាន មេក្រូ១គ្រឿង ក្រវឹលមាសចំនួន៥ហ៊ុន ខ្សែ.កផ្លាកទីន១ខ្សែ ប្រាក់ដុល្លារ៥ពាន់ដុល្លារ ទូរស័ព្ទដៃ៣គ្រឿង ទូរទស្សន៍១គ្រឿង កង្ហា២គ្រឿង សំលៀកបំពាក់ សម្ភារ និងឯកសារសម្រាប់ប្រើប្រាស់មួយចំនួនទៀត ។ ចំពោះមូលហេតុគឺបណ្តាលមកពីទុស្សេចរន្តអគ្គិសនី ។
ចំណែកករណីទី២បានកើតឡើងនៅវេលាម៉ោង៣និង២0 នាទីរសៀល នៅភូមិអណ្ដូងឫស្សី ឃុំស្រែថ្មី ស្រុករលាប្អៀរ បណ្ដាលឱ្យឆេះអស់ផ្ទះមួយខ្នង ជារបស់ស្ត្រីឈ្មោះ មួន តេង អាយុ៦៦ឆ្នាំ មានទំហំ៦គុណនឹង៧ម៉ែត្រ ធ្វើអំពីឈើ បាំងជញ្ជាំងស្លឹក ប្រក់ដំបូល ស័ង្កសី បានរងការខូចខាតឆេះខ្ទេចទាំងស្រុង ។
ចំពោះសម្ភារខូចខាតមានប្រាក់ចំនួនខ្មែរ៧០ម៉ឺនរៀល ប្រាក់ដុល្លារចំនួន៤៥០ដុល្លារ មាស៣,៥ជី ស្រូវជាង១តោន អង្ករ៥០គីឡូក្រាម និងសម្ភារប្រើប្រាស់ជាច្រើនទៀត ។ ករណីទី២ដែរគឺបណ្ដាលមកពីទុស្សេរចរន្តអគ្គីសនីដូចគ្នានេះដែរ ៕
ចែករំលែកព័តមាននេះ