ខេត្តមណ្ឌលគិរី ៖ ក្នុងរយៈពេលបីថ្ងៃនៃពិធីបុណ្យចូលឆ្នាំប្រពៃណីជាតិ កន្លងទៅ ថ្មីៗនេះ ខេត្តមណ្ឌលគិរីទាក់ទាញបានភ្ញៀវទេសចរច្រើនទៅកម្សាន្ត ។ នៅតាមតំបន់ទេសចរណ៍ធម្មជាតិក្នុងខេត្តទទួលបានភ្ញៀវទេសចរជាតិ និងអន្តរជាតិជាង២ម៉ឺននាក់ ។ ចំនួននេះធ្វើឲ្យភ្ញៀវទេសចរជាច្រើនមិនអាចរកកន្លែងស្នាក់នៅតាមផ្ទះសំណាក់ ឬសណ្ឋាគារបានទេ ។ ក្នុងស្ថានភាពបែបនោះភ្ញៀវខ្លះបោះតង់នៅតាមសួនច្បារ និងស្នាក់នៅតាមផ្ទះអ្នកភូមិ ។
លោកឡុង វិបុល អភិបាលក្រុងសែនមនោរម្យ ឲ្យដឹងថា ស្របពេលមានការអវិឌ្ឍមិនឈប់ឈររបស់ខេត្តមណ្ឌលគិរី នាពេលបច្ចុប្បន្ន ធ្វើឲ្យចំនួនភ្ញៀវទេសចរកើនឡើងពីមួយឆ្នាំទៅមួយឆ្នាំ ។ ដូច្នេះហើយនៅថ្ងៃឈប់សម្រាក ឬបុណ្យជាតិ ធំៗ រាល់សេវាកម្ម សំខាន់ៗដូចជា ផ្ទះសំណាក់ សណ្ឋាគារ ភោជនីយដ្ឋានជាដើម មិនអាចបម្រើតម្រូវការភ្ញៀវបានគ្រប់គ្រាន់នោះទេ តែបើថ្ងៃធម្មតាគ្មានបញ្ហាចោទឡើយ ។
ដោយកត្តាសុខសន្តិភាព សុវត្ថិភាពពេញលេញ រួមនឹងការសហការគ្នាយ៉ាងល្អរវាងអាជ្ញាធរខេត្តមណ្ឌលគិរី និងអាជ្ញាធរក្រុងសែនមនោរម្យ បានផ្តល់ភាពកក់ក្តៅជូនភ្ញៀវទេសចរដែលអញ្ជើញទៅលេងកម្សាន្តនៅខេត្តមណ្ឌលគិរីអាចកម្សាន្ត និងស្នាក់នៅបានគ្រប់ទីកន្លែងក្នុងខេត្ត។ មិនត្រឹមតែប៉ុណ្ណោះដោយសារតែចំនួនភ្ញៀវច្រើនហួសពីចំនួនបន្ទប់ស្នាក់នៅ ក៏មានភ្ញៀវខ្លះសម្រេចចិត្តបោះតង់នៅជិតតំបន់រង្វង់មូលគោព្រៃ តាមសួនច្បារ និងនៅលើអតីតទីលានយន្តហោះ ដោយគ្មានការភ័យខ្លាច ព្រោះតែមានសមត្ថកិច្ចចម្រុះយាមល្បាតជាប់ជាប្រចាំ ។
ចំពោះការកើនឡើងចំនួនភ្ញៀវទេសចរនេះ ក្រុមអ្នកជំនាញផ្នែកទេសចរណ៍ និងអាជ្ញាធរបានលើកឡើងស្របគ្នាថា ខេត្តមណ្ឌលគិរីជាពិសេសក្រុងសែនមនោរម្យ ហាក់មិនមានការចាំបាច់ខ្លាំងពេកទេលើកការបង្កើនចំនួនបន្ទប់ស្នាក់នៅ ព្រោះភ្ញៀវជន់ជោរត្រឹមរយៈពេលខ្លីប៉ុណ្ណោះ ដូច្នេះហើយទើបបានជាម្ចាស់ផ្ទះសំណាក់ ឬសណ្ឋាគារនានាក្នុងខេត្តហាក់មិនចាប់អារម្មណ៍ចំពោះការសាងសង់សំណង់ថ្មីនោះឡើយ ។
អាជ្ញាធរខេត្តបានបង្ហាញសុទិដ្ឋិនិយមថា អាជ្ញាធរនឹងលើកទឹកចិត្តចំពោះអ្នកវិនិយោគថ្មីៗដែលមានបំណងសាងសង់សណ្ឋាគារលំដាប់ផ្កាយ៥ ឬខ្នាតអន្តរជាតិ ព្រោះបច្ចុប្បន្នខេត្តមណ្ឌលគិរី បានទាក់ទាញភ្ញៀវទេសចរគ្រប់ស្រទាប់វណ្ណៈ ជាពិសេសរយៈកាលចុងក្រោយនេះ ក៏សម្បូរភ្ញៀវទេសចរលំដាប់VIPចេញចូលកម្សាន្តជាប្រចាំ ។
យោងតាមរបាយការណ៍របស់មន្ទីរទេសចរណ៍ខេត្តមណ្ឌលគិរី ឲ្យដឹងថា ក្នុងរយៈពេលបីថ្ងៃ១៤, ១៥ និងទី១៦ មេសា ២០១៨ មានភ្ញៀវទេសចរចំនួន២២.៦២៣នាក់ កើនឡើងចំនួន២២,១០% បើធៀបទៅនឹងឆ្នាំ២០១៧មានត្រឹមចំនួន១៨.៥២៧នាក់ប៉ុណ្ណោះ ។ ការកើនឡើងចំនួនភ្ញៀវទេសចរដល់ទៅជាង២២%នេះហើយ ដែលបណ្តាលឲ្យបន្ទប់សណ្ឋាគារ ផ្ទះសំណាក់ក្នុងខេត្តមណ្ឌលគិរី សរុបប្រមាណជាង១០០០បន្ទប់ត្រូវពេញណែន ទទួលភ្ញៀវមិនគ្រប់គ្រាន់ ។
ទឹកធ្លាក់ព្រះនិមិត្តទទួលភ្ញៀវទេសចរច្រើននាឱកាសបុណ្យចូលឆ្នាំខេត្តព្រះវិហារ៖គិតចាប់ពីថ្ងៃទី១៤ដល់ថ្ងៃទី១៧មេសា ឆ្នាំ២០១៨ ក្នុងឱកាសបុណ្យចូលឆ្នាំថ្មីប្រពៃណីជាតិ ភ្ញៀវទេសចរជាតិ និងអន្តរជាតិបានទៅលេងកម្សាន្តនៅក្នុងតំបន់រមណីយដ្ឋាន សំខាន់ៗចំនួន៤ក្នុងខេត្តព្រះវិហារ ប្រមាណជាង៥ម៉ឺននាក់ កើនឡើងជាងឆ្នាំមុន ក្នុងនោះទឹកធ្លាក់ព្រះនិមិត្តជាប់ព្រំដែនកម្ពុជាឡាវ ទទួលភ្ញៀវទេសចរច្រើនជាងគេ ។
លោកស្រីឈឹម សិទ្ធីដា មន្ត្រីស្ថិតិនៃមន្ទីរទេសចរណ៍ខេត្តព្រះវិហារ បានលើកឡើងថា ក្នុងឆ្នាំ២០១៨នេះភ្ញៀវទេសចរដែលទៅលេង កម្សាន្តនៅក្នុងខេត្តព្រះវិហារចំនួន៤កន្លែង រួមមានប្រាសាទព្រះវិហារ ប្រាសាទកោះកែរ ប្រាសាទព្រះខ័នកំពង់ស្វាយ និងរមណីយដ្ឋានទឹកជ្រោះព្រះនិមិត្ត ព្រំដែនកម្ពុជា-ឡាវ កើនឡើងច្រើន ។ ដោយឡែកភ្ញៀវអន្តរជាតិវិញ មានការថយចុះតិចតួចប៉ុណ្ណោះ ។
មន្ត្រីជំនាញលើកឡើងទៀតថា នាឱកាសបុណ្យចូលឆ្នាំថ្មីប្រពៃណីជាតិ នៅគ្រប់រមណីយដ្ឋាន ក្នុងខេត្តមានសន្តិសុខ សុវត្ថិភាពល្អប្រសើរ ពុំមានអ្វីកើតឡើងរំខានដល់ការកម្សាន្តសប្បាយរបស់ភ្ញៀវទេសចរឡើយ មួយវិញទៀតទាំងសេវាកម្ម ផ្សេងៗក៏មិនមានការដំឡើងថ្លៃដែរ ។
លោកវរសេនីយ៍ឯកឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្តព្រះវិហារលើកឡើងថា នៅក្នុងឱកាសបុណ្យចូលឆ្នាំនៅទូទាំងខេត្តព្រះវិហារ មានសន្តិសុខ សុវត្ថិភាពល្អប្រសើរ ពុំមានបាតុភាព អ្វីកើតឡើងធ្វើឲ្យប៉ះពាល់ដល់ការកម្សាន្តរបស់ប្រជាពលរដ្ឋ ក៏ដូចជាភ្ញៀវទេសចរ ដែលទៅកម្សាន្តក្នុងខេត្តព្រះវិហារទេ ។ ដោយឡែកគ្រោះថ្នាក់ចរាចរណ៍កើតមានតិចតួច ។
យោងតាមរបាយការណ៍របស់មន្ទីរទេសចរណ៍ខេត្តព្រះវិហារ រយៈពេល៤ថ្ងៃ គិតចាប់ពីថ្ងៃទី១៤ ដល់ថ្ងៃទី១៧ មេសា ភ្ញៀវទេសចរដែលទៅលេងកម្សាន្តនៅរមណីយដ្ឋានប្រាសាទព្រះវិហារ ភ្ញៀវជាតិ មានចំនួន៨.៥២៣នាក់ កើនឡើង៣% ភ្ញៀវអន្តរជាតិមានចំនួន១៥០នាក់ ថយចុះ២៧% ។
រមណីយដ្ឋានប្រាសាទកោះកែរ ភ្ញៀវជាតិ១០.៨១០នាក់ កើនឡើង១២% ភ្ញៀវអន្តរជាតិ ២៤៧នាក់ ថយចុះ៥% ។
រមណីយដ្ឋានប្រាសាទព្រះខ័នកំពង់ស្វាយ ភ្ញៀវទេសចរជាតិ មានចំនួន៤.៨៥១នាក់ ថយចុះ៤៩% ភ្ញៀវអន្តរជាតិ៨នាក់ ។
ទឹកធ្លាក់ព្រះនិមិត្ត ភ្ញៀវជាតិ មានចំនួន១៦.៦៨៣នាក់ កើនឡើង៤១% ភ្ញៀវអន្តជាតិ១៥នាក់ ថយចុះ៣១% ។
គោលដៅ ផ្សេងៗ ភ្ញៀវជាតិ១១.៥០០នាក់ កើនឡើង១៩៣% ភ្ញៀវអន្តរជាតិថយចុះ១០០% ។ នេះបើធៀបនឹងរយៈពេលដូចគ្នាឆ្នាំ២០១៧កន្លងទៅ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ