ខេត្តបន្ទាយមានជ័យ ៖ យោងតាមការចុះផ្សាយរបស់គេហទំព័រថៃមួយបានឲ្យដឹងថា នៅព្រឹកថ្ងៃទី២១ ខែមេសា ឆ្នាំ២០១៨ មានករណីគ្រោះថ្នាក់ចរាចរណ៍ដោយរថយន្តដឹកពលករខ្មែរបុកជាមួយរថយន្តដឹកទឹកកក បណ្ដាលឲ្យពលករខ្មែររងរបួសធ្ងន់-ស្រាលចំនួន១៦នាក់ ។ ហេតុការណ៍ខាងលើកើតឡើងខាងមុខរោងចក្រKC ភូមិ៣ ឃុំដងឃីឡេក ស្រុកទីរួម ខេត្តប្រាជីនបុរី ។
កន្លែងកើតហេតុត្រង់ផ្លូវបំបែកជា៣ចូលវត្តភក្ដី រថយន្តដឹកពលករខ្មែរ ពណ៌ស្ក ពាក់ផ្លាកលេខ ថៃ ៧១៨៣ ក្រុងថេប បើកបរដោយឈ្មោះ ឆាន់វីត ផេញប៊ុនសំ ហើយរថយន្តនោះខូចខ្ទេចផ្នែកខាងមុខ ។ ដោយឡែករថយន្តដឹកទឹកកក ពណ៌ស ពាក់ផ្លាកលេខ ថៃ ២៩២៥ សារះ បុរី បើកបរដោយឈ្មោះ អាក់ខនពល ឆបស្អាត ។
សមត្ថកិច្ចបានឲ្យដឹងថា មុនកើតហេតុរថយន្តទាំង២គ្រឿងបើកស្របទិសគ្នាមកពីច្រកព្រំដែនដោយរថយន្តដឹកទឹកកកបើកបរខាងមុខ លុះដល់ចំណុចកើតហេតុ រថយន្តដឹកទឹកកកបត់ចូល ផ្លូវបំបែកវត្តភក្ដី រថយន្តដឹកពលករខ្មែរ បុកពីក្រោយយ៉ាងខ្លាំង ទៅលើរថយន្តដឹកទឹកកក បណ្ដាលឲ្យពលករខ្មែរដែល ជិះពេញរថយន្ត មកពីខេត្តស្រះកែវ ឆ្ពោះទៅធ្វើការនៅ ខេត្តឆាក់ឆឺនសៅ រងរបួស១៦នាក់ បន្ទាប់មកសមត្ថកិច្ចបានហៅអ្នកពាក់ព័ន្ធមកសាកសួរដើម្បីដឹងពីមូលហេតុ ។
យ៉ាងណាក៏ដោយមកទល់ពេលនេះមិនទាន់ស្គាល់អត្តសញ្ញាណជនរងគ្រោះទាំងនោះនៅឡើយទេ ហើយក៏មិនទាន់ដឹងថា ពលករទាំងនេះឆ្លងដែនស្របច្បាប់ឬខុសច្បាប់នោះដែរ ខណៈមន្ត្រីកម្ពុជាប្រចាំប្រទេសថៃមិនអាចទាក់ទងសុំកាបំភ្លឺបាននៅឡើយ ៕
ចែករំលែកព័តមាននេះ