បន្ទាយមានជ័យ ៖ រថយន្តមួយគ្រឿងបុករះអ្នកជិះម៉ូតូ៣គ្រឿង បណ្តាលឲ្យរបួសធ្ងន់ស្រាលចំនួន៦នាក់ មានម្នាក់ដាច់ជើងឆ្វេង ដែលកើតឡើងនៅវេលាម៉ោង៧និង១៥នាទីយប់ កាលពីថ្ងៃទី១៨ ខែមេសា ឆ្នាំ២០១៨ តាមបណ្តោយផ្លូវជាតិលេខ៥៩ ស្ថិតក្នុងភូមិអូរអំពិល ឃុំទួលពង្រ ស្រុកម៉ាឡៃ ។
ជនរងគ្រោះ៦នាក់មានទី១-ឈ្មោះ សេង វុទ្ធី ភេទប្រុស អាយុ២៧ឆ្នាំ (របួសធ្ងន់) ទី២- ឈ្មោះ សា រ៉ាយ ភេទប្រុស អាយុ៣០ឆ្នាំ (របួសធ្ងន់) ទី៣-ឈ្មោះ សា វៀម ភេទប្រុស អាយុ៣៩ឆ្នាំ (របួសធ្ងន់) ទី៤- ឈ្មោះ ជឿន ភេទស្រី អាយុ២៥ឆ្នាំ (របួសធ្ងន់) ទី៥- ឈ្មោះ ស៊ុត ភេទប្រុស អាយុ២៨ឆ្នាំ (របួសស្រាល) និងទី៦-ឈ្មោះ ខឹត នូន ភេទស្រី អាយុ៤៥ឆ្នាំ (របួសស្រាល) ជនរងគ្រោះរស់នៅភូមិកើតហេតុខាងលើ ។
អ្នកឃើញហេតុការបានប្រាប់ថា នៅពេលគ្រោះថ្នាក់ចរាចរណ៍កើតឡើង គឺមានរថយន្តស៊េរីឆ្នាំ១៩៩៥ ពណ៌ស ពាក់ស្លាក់លេខភ្នំពេញ2A-7901អ្នកបើកបរមិនស្គាល់អត្តសញ្ញាណ បានបើកបរតាមផ្លូវជាតិលេខ៥៩ ក្នុងទិសដៅពីលិចទៅកើត ក្នុងល្បឿនលឿន បានបុករះអ្នកជិះម៉ូតូចំនួន៣គ្រឿង បណ្តាលរបួសធ្ងន់ស្រាល៦នាក់ មានស្រី២នាក់ និងមានម្នាក់ដាច់ជើងឆ្វេង ត្រូវបានសង្គ្រោះបន្ទាន់ ចំណែកម្ចាស់រថយន្តរត់គេចខ្លួនបាត់ស្រមោល ។
ក្រោយពេលគ្រោះថ្នាក់ចរាចរណ៍កើតឡើងគេឃើញមានកម្លាំងនគរបាលចរាចរណ៍ជើងគោកស្រុកម៉ាឡៃបានចុះមកពិនិត្យវាស់វែង ហើយកម្លាំងជំនាញបានប្រាប់ថា គ្រោះថ្នាក់ចរាចរណ៍កើតឡើង គឺបង្កដោយអ្នកបើកបររថយន្តក្នុងល្បឿនលឿនបានបុកអ្នកជិះម៉ូតូចំនួន៣គ្រឿង ដែលជិះស្របគ្នា បណ្តាលរបួសធ្ងន់ស្រាលដូចខាងលើ ។
ក្រោយពេលវាស់វែងហើយត្រូវបាននាំយករថយន្តបង្ក និងម៉ូតូរងគ្រោះ៣គ្រឿងត្រូវបានយកមករក្សាទុកនៅអធិការដ្ឋាននគរបាលស្រុកម៉ាឡៃ ដើម្បីដោះស្រាយតាមច្បាប់ និងស្រាវជ្រាវរកចាប់ខ្លួនជនបង្ក ដើម្បីចាត់ការតាមច្បាប់ ៕
ចែករំលែកព័តមាននេះ