រាជធានីភ្នំពេញ ៖ អនុវត្តន៍តាមអនុសាសន៍ដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងសាធារណការ និងដឹកជញ្ជូន…
រាជធានីភ្នំពេញ ៖ អនុវត្តន៍តាមអនុសាសន៍ដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងសាធារណការ និងដឹកជញ្ជូន បានបើកឲ្យដំណើរការគម្រោងកាណូតដឹកអ្នកដំណើរ ព្រែកព្នៅ-ភ្នំពេញ-តាខ្មៅ ដឹកជូនប្រជាពលរដ្ឋក្នុងរយៈពេល៣ខែ ដោយមិនគិតថ្លៃ គឺគិតចាប់ពីខេមេសា ដល់ថ្ងៃទី០១ ខែសីហា ឆ្នាំ២០១៨ ក្នុងគោលបំណងកាត់បន្ថយការចំណាយរបស់ប្រជាពលរដ្ឋព្រមទាំងចូលរួមកាត់បន្ថយការកកស្ទះចរាចរនៅតាមដងផ្លូវក្នុងរាជធានីភ្នំពេញផងដែរ ។
ជាក់ស្តែងក្នុងរយៈពេល១៣ថ្ងៃកន្លងមកនេះ កាណូតដឹកជញ្ជូនអ្នកដំណើរបានដឹកជញ្ជូនប្រជាពលរដ្ឋបានចំនួន៥,៩៣៦នាក់ ដោយមិនគិតថ្លៃផ្តល់ឲ្យប្រជាពលរដ្ឋមានភាពសប្បាយរីករាយ ជាពិសេសក្នុងឱកាសបុណ្យចូលឆ្នាំថ្មីប្រពៃណីជាតិរបស់ខ្មែរយើងនេះតែម្តង ។
លោក សាំ ពិសិដ្ឋ នាយកមន្ទីរសាធារណៈការ និងដឹកជញ្ជូនរាជធានីភ្នំពេញ បានឲ្យដឹងថា កាណូតដឹកជញ្ជូនអ្នកដំណើរបានចាប់ផ្តើមបើកឲ្យដំណើរការដោយមិនយកប្រាក់ គឺចេញដំណើរពីចំណតឫស្សីកែវ ទៅចំណតក្រុងតាខ្មៅ ចាប់ពីថ្ងៃទី៦ ខែមេសា រហូតដល់ទី១៩ ខែមេសា ឆ្នាំ២០១៨ នេះ មានអ្នកជិះចំនួន៥,៩៣៦នាក់ ដោយប្រើប្រាស់កាណូតចំនួន៣គ្រឿង ក្នុងមួយថ្ងៃ២០ជើង ដោយឆ្លងកាត់ចំណតចំនួន៤រួមមាន ចំណតឫស្សីកែវ ផ្សារចាស់ ចតុមុខ និងចំណតស្ថានីយក្រុងតាខ្មៅ ។
លោកបន្តថា ក្នុងរយៈពេលជាង១៣ថ្ងៃកន្លងមកនេះ ចំនួនអ្នកមកទទួលសេវាកម្មជិះកាណូតនេះច្រើនជាងគេ គឺនៅថ្ងៃទី១៦ ខែមេសា ដែលជាថ្ងៃចុងក្រោយនៃបុណ្យចូលឆ្នាំថ្មី ដោយមានចំនួនរហូតដល់៨៩១នាក់ ។ លោកសាំ ពិសិដ្ឋ បានបញ្ជាក់ថា កាណូតដឹកជញ្ជូនអ្នកដំណើរមិនយកប្រាក់នេះបានចាប់ផ្តើមឲ្យដំណើរការកាលពីថ្ងៃទី០៦ ខែមេសា រហូតដល់ថ្ងៃទី០១ ខែសីហា ឆ្នាំ២០១៨ គឺមិនយកលុយនោះទេ ក្នុងបំណងដើម្បីចូលរួមចំណែកកាត់បន្ថយការកកស្ទះចរាចរ តាមផ្លូវគោក និងបង្កើនសុវត្ថិភាពចរាចរដល់អ្នកធ្វើដំណើរចូល-ចេញ និងឆ្លងកាត់រាជធានីភ្នំពេញជារៀងរាល់ថ្ងៃ ព្រមទាំងធ្វើឲ្យចំណេញពេលវេលា និងចូលរួមកាត់បន្ថយការភាពក្រីក្រជូនប្រជាពលរដ្ឋតែម្តង ។ លោក សាំ ពិសិដ្ឋ បានអំពាវនាវឲ្យបងប្អូនប្រជាពលរដ្ឋបន្តការគាំទ្រ និង ជិះកាណូតនេះ ឲ្យបានកាន់តែច្រើនថែមទៀត ដើម្បីកាត់បន្ថយការកកស្ទះចរាចរលើផ្លូវគោក ។
គួរបញ្ជាក់ថា ក្នុងឱកាសចូលឆ្នាំថ្មីនេះ មានប្រជាពលរដ្ឋជាច្រើនបានជិះកាណូតដឹកជញ្ជូនអ្នកដំណើរឫស្សីកែវ-តាខ្មៅ បើគិតក្នុងរយៈពេល៤ថ្ងៃ ចាប់ពីថ្ងៃទី១៤ ខែមេសា ដល់ថ្ងៃទី១៧ ខែមេសា មានអ្នកជិះចំនួនជិត៣,០០០នាក់ ដែលបង្កឲ្យប្រជាពលរដ្ឋមានភាពសប្បាយរីករាយតែម្តង ។ គម្រោងសេវាដឹកអ្នកដំណើរតាមកាណូតនេះ មានកាណូតចំនួន៤គ្រឿង ដែលចេញពីខណ្ឌព្រែកព្នៅ ឆ្ពោះទៅក្រុងតាខ្មៅ ខេត្តកណ្ដាល តាមបណ្ដោយទន្លេសាប និងទន្លេបាសាក់ ដោយឆ្លងកាត់កំពង់ផែចំនួន៦ គឺកំពង់ផែព្រែកព្នៅ, កំពង់ផែមុខឃ្លាំងសាំងឫស្សីកែវ ឬនៅទីលានប្រជាធិបតេយ្យ, កំពង់ផែបណ្ដែតទល់មុខផ្សាររាត្រី, កំពង់ផែណាហ្គា នៅក្បែរកោះពេជ្រ, កំពង់ផែភូមិដើមចាន់ នៅច្បារអំពៅ និងកំពង់ផែសួនច្បារតាខ្មៅ ផងដែរ ៕
ចែករំលែកព័តមាននេះ