រាជធានីភ្នំពេញ ៖ បន្ទាប់ពីឈប់សម្រាកថ្ងៃបុណ្យចូលឆ្នាំថ្មីប្រពៃណីជាតិខ្មែរអស់រយៈពេលមួយសប្ដាហ៍រួចមកនោះ កម្មវិធីប្រកួតប្រដាល់អន្តរជាតិនៅលើសង្វៀនទូរទស្សន៍ My TVដែលមានឈ្មោះថា GANZBERG UBER FIGHTERS នឹងបើកសង្វៀនឱ្យកីឡាករជើងខ្លាំងកម្ពុជា២រូបនិងថៃ២រូបប្រកួតគ្នានៅវេលាម៉ោង៨យប់ថ្ងៃសុក្រ ទី២០ មេសា នេះ ជូនទស្សនិកជនទស្សនាកម្សាន្តពេលត្រឡប់មកពីស្រុកកំណើតវិញ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះអាចសម្រេចគោលដៅរបស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបនារាត្រីនេះហាក់មានសមត្ថភាពខ្លាំងពិបាកផ្ដួលអ៊ីចឹងនោះ ។
តាមការឱ្យដឹងពីមន្ត្រីគណៈកម្មការរៀបចំការប្រកួត កីឡាករកម្ពុជា ថា សារុន មកពីក្លិបប្រដាល់ពន្លឺណេអុង អាយុ២៤ឆ្នាំ កម្ពស់១,៦៥ម៉ែត្រ មានប្រវត្តិប្រកួត១៣៦ដង ឈ្នះ៨៧ដង ចាញ់៤៣ដង ស្មើ៦ដង និងវាយគូប្រកួតឱ្យសន្លប់៨ដង ត្រូវជួបប្រកួតជាមួយកីឡាករថៃឈ្មោះលំណាវ ស.រ៉ាត់ តាណារុងរោទ ក្នុងប្រភេទទម្ងន់៦០គីឡូក្រាម ។ កីឡាករថៃរូបនេះអាយុ២១ឆ្នាំ កម្ពស់១,៦៧ម៉ែត្រ មានប្រវត្តិប្រកួត៨៨ដង ឈ្នះ៦៦ដង ចាញ់២០ដង និងស្មើ២ដង ។ ថា សារុន មួយរយៈមកនេះមិនសូវឃើញលេចមុខនៅលើសង្វៀនញឹកញាប់ដូចមុនថែមទាំងមិនដែលជួបលំណាវ ស.រ៉ាត់តាណារុងរោទទៀតផងទើបគេពិបាកប៉ាន់ស្មានលទ្ធផលចុងក្រោយ ។
ទោះបីយ៉ាងណាតាមរយៈប្រវត្តិប្រកួតនិងការអះអាងរបស់កីឡាកររូបនេះថាគេបានត្រៀមខ្លួនរួចរាល់អស់ហើយធ្វើឱ្យការព្យាករពីឱកាសឈ្នះរបស់និយមទស្សនាកីឡាប្រដាល់ហាក់ផ្អៀងទៅរកកីឡាករកម្ពុជា។
មួយគូទៀតកីឡាករកម្ពុជា សួន ចាន់នី មកពីក្លិបបក្សីស្លាបដែក អាយុ២៤ឆ្នាំ កម្ពស់
១,៧៥ម៉ែត្រ មានប្រវត្តិប្រកួត១០៥ដង ឈ្នះ៨៣ដង ចាញ់១៨ដង ស្មើ៤ដង និង
វាយគូប្រកួតឱ្យសន្លប់៣៧ដង ត្រូវជួបប្រកួតជាមួយកីឡាករថៃឈ្មោះ យ៉ាតកូស៊ុន ស៊ីត
ហ្វាម៉ៃ ក្នុងប្រភេទទម្ងន់៦០គីឡូក្រាមដូចគ្នា ។ កីឡាករថៃរូបនេះអាយុ២៦ឆ្នាំ កម្ពស់
១,៧៥ម៉ែត្រ មានប្រវត្តិប្រកួត៨៦ដង ឈ្នះ៦៥ដង ចាញ់១៦ដង ស្មើ៥ដង និងវាយ
គូប្រកួតឱ្យសន្លប់១២ដង។
យោងតាមប្រវត្តិប្រកួតបង្ហាញឱ្យឃើញថាកីឡាករទាំង២គឺជាជើងចាស់ដូចគ្នាតែមិនធ្លាប់ជួបគ្នាពីមុនទើបគ្មានអ្នកណាហ៊ានព្យាករណ៍លទ្ធផលចាញ់ឈ្នះទុកមុនបានត្រឹមតែអះអាងថា ការប្រកួតរបស់គូនេះនឹងមានសភាពស្វិតស្វាញខ្លាំងមិនខានដោយសារទាំងកីឡាករកម្ពុជានិងថៃសុទ្ធតែចង់ឈ្នះដូចគ្នាដើម្បីបង្កើនក្រេឌីតរបស់ខ្លួនក្នុងនាមជាជើងខ្លាំងនៅក្នុងពិភពប្រដាល់ ។ ចាំមើលតំណែងអធិរាជនៅលើសង្វៀនមួយនេះបានទៅលើកីឡាករកម្ពុជាឬកីឡាករថៃ ?
ចំណែកគូប្រកួតមិត្តភាពធម្មតាដែលមានចំនួន២គូដែរនោះតម្រូវទៅលើកីឡាករ ហ៊ីម គឹមរៀង មកពីក្លិបតាព្រហ្មមានជ័យ ប្រកួតជាមួយកីឡាករ កាន់ ដារ៉ូ មកពីក្លិបពន្លឺវិបុលរិទ្ធី និងកីឡាករ សៀវ ង៉ុយ មកពីសមាគមកីឡាប្រដាល់ក្រសួងការពារជាតិ ប្រកួតជាមួយ កីឡាករ សេន កុសល មកពីក្លិបមោងឬស្សីមរតកគុនខ្មែរ ខេត្តបាត់ដំបង៕
ចែករំលែកព័តមាននេះ