រាជធានីភ្នំពេញ ៖ មន្ត្រីជាន់ខ្ពស់ប្រទេសកម្ពុជា និងទួកគីប្រកាសថា ប្រទេសទាំងពីរគ្រោងនឹងរៀបចំកិច្ចប្រជុំទ្វេភាគីលើការពង្រឹងកិច្ចសហប្រតិបត្តិការលើវិស័យសេដ្ឋកិច្ច និងនយោបាយនៃប្រទេសទាំងពីរនៅក្នុងខែឧសភា ឆ្នាំ២០១៨ខាងមុខ ។
នេះបើតាមការលើកឡើងលោកទេសរដ្ឋមន្ត្រីប្រាក់ សុខុន រដ្ឋមន្ត្រីក្រសួងការបរទេសក្នុងពេលជួបពិភាក្សាការងារជាមួយលោកស្រី Ayda Ünlü ឯកអគ្គរដ្ឋទូតទួកគីថ្មី នៅព្រឹកថ្ងៃទី១៩ ខែមេសា ឆ្នាំ២០១៨ នៅទីស្តីការបរទេស ។
លោកជុំ សុន្ទរី អ្នកនាំពាក្យក្រសួងការបរទេសបានថ្លែងប្រាប់អ្នកសារព័ត៌មានក្រោយពីជំនួបជិត១ម៉ោងថា ៖ ប្រមុខការទូតនៃប្រទេសទាំងពីរបានលើកឡើងពីការរីកចម្រើននៃទំនាក់ទនងការទូតរវាងប្រទេសទាំងពីរកម្ពុជា -ទួកគី បន្ទាប់ពីទួកគីបានបើកស្ថានទូតរបស់ខ្លួននៅទីក្រុងភ្នំពេញ កាលពីឆ្នាំ២០១៣ ។
លោកទេសដ្ឋមន្ត្រីបានលើកឡើងដោយថ្លែងថា កម្ពុជានឹងផ្តល់កិច្ចសហការពេញលេញគ្រប់បែបយ៉ាងដល់បេសកកម្មការទូតរបស់លោកស្រី ឯកអគ្គរដ្ឋទូតទួកគីថ្មីនៅកម្ពុជា ។ លោកបានលើកឡើងពីការផ្លាស់ប្តូរពាណិជ្ជកម្មរវាងប្រទេសទាំងពីរមានការកើនឡើង តែនៅមិនទាន់សមស្របនឹងសក្តានុពលសេដ្ឋកិច្ចរបស់ប្រទេសទាំងពីរទេ ។ លោកទេសរដ្ឋមន្ត្រីបានលើកឡើងដោយជំរុញដល់ភាគីទាំងពីរលើវិស័យពាណិជ្ជកម្មនេះ ឲ្យមានការកើនឡើងនូវការផ្លាស់ប្តូរពាណិជ្ជកម្មនេះថែមទៀតទ្វេភាគី ។ លោកបានលើកឡើងចង់ឲ្យប្រទេសទួកគីកោះប្រជុំគណៈកម្មាការសេដ្ឋកិច្ចប្រទេសទាំងពីរនៅក្នុងឆ្នាំ២០១៨នេះ ដើម្បីពិភាក្សាស្វែងរកវិធីយ៉ាងណាឲ្យមានភាពកើនឡើងនូវវិស័យសេដ្ឋកិច្ចនៃប្រទេសទាំងពីរ ។ លោកទេសរដ្ឋមន្ត្រីបានថ្លែងជម្រាបលោកស្រីឯកអគ្គរដ្ឋទូតថា ក្រសួងការបរទេសគ្រោងកោះប្រជុំពិគ្រោះនយោបាយរវាងក្រសួងការបរទេសនៃប្រទេសទាំងពីរនៅក្នុងខែឧសភា ឆ្នាំ២០១៨ ។ លោកថា៖ «ក្រសួងការបរទេសកម្ពុជាកំពុងរង់ចាំការឆ្លើយតបពីភាគីទួកគីអំពីលទ្ធភាពនៃការកោះប្រជុំនៃក្រសួងការបរទេសនៃប្រទេសទាំងពីរ» ។
លោកទេសរដ្ឋមន្ត្រីបានលើកឡើងថា លោកគ្រោងនឹងទៅបំពេញទស្សនកិច្ចផ្លូវការនៅប្រទេសទួកគីកំឡុងត្រីមាសទី២ នៅក្នុង២០១៨នេះ ។ មុនដំណើរទស្សនកិច្ចរបស់សម្តេចតេជោ ហ៊ុន សែនទៅកាន់ប្រទេសទួកគីតាមសំណើរអញ្ជើញរបស់លោកប្រធានាធិបតីប្រទេសទួកគី ។ លោកទេសរដ្ឋមន្ត្រីបានជំរុញដល់សមភាគីរបស់លោកក្នុងការពិនិត្យ និងពន្លឿននូវរាល់ឯកសារទាំងឡាយដែលភាគីទាំងពីរមានកន្លងមក ដើម្បីឈានដល់ការចុះហត្ថលេខានៅក្នុងកំឡុងពេលដែលការបំពេញទស្សនកិច្ចរបស់សម្តេចតេជោ ហ៊ុន សែន នៅប្រទេសទួកគីនាពេលខាងមុខ ។ ប៉ុន្តែគេមិនដឹងថា ឯកសារអ្វីខ្លះ និងមានចំនួនប៉ុន្មានទេដែលនឹងត្រូវចុះហត្ថលេខដោយប្រមុខរាជរដ្ឋាភិបាលនៅទួកគីនៅឡើយ ។
លោកទេសរដ្ឋមន្ត្រីបានលើកឡើងថា ៖ សូមថ្លែងអំណរគុណចំពោះរដ្ឋាភិបាលភិបាលទួកគីចំពោះការគាំទ្រដល់រាជរដ្ឋាភិបាលកម្ពុជា និងគោរពនូវឯករាជ្យ និងអធិបតេយ្យភាពរបស់កម្ពុជា ។ ការចាត់វិធានការរបស់អាជ្ញាធរមានសមត្ថកិច្ចកម្ពុជាក្នុងរយៈកាលកន្លងមកសម្តៅការពារស្ថេរភាព សន្តិភាព និងការអភិវឌ្ឍកម្ពុជាបញ្ហាផ្ទៃក្នុងរបស់កម្បូជា ។ លោកទេសរដ្ឋមន្ត្រីបានអះអាងថា នៅពេលគណៈប្រតិភូទួកគីមកបំពេញទស្សនកិច្ចនៅកម្ពុជាក្រសួងការបរទេសនឹងខិតខំសម្របសម្រួល ដើម្បីឲ្យភាគីទួកគីបានជួបពិភាក្សាជាមួយក្រុមជំនាញកម្ពុជាលើកបញ្ហាបោសសំអាតមីននេះ ។ លោកស្រីបានលើកឡើងជាការឆ្លើយតបជាមួយលោកទេសរដ្ឋមន្ត្រីថា ពេលនេះប្រទេសទួកគីកំពុងត្រៀមរៀបចំបោះឆ្នោតទូទៅក្នុងខែមិថុនា ឆ្នាំ២០១៨នេះ ។ លោកស្រីបញ្ជាក់ថា ប្រទេសទួកគីមានបំណងកោះប្រជុំគណៈកម្មាធិការសេដ្ឋកិច្ចរវាងប្រទេសទាំងពីរក្នុងខែកញ្ញា ២០១៨ បន្ទាប់ពីការបោះឆ្នោត ។
លោកស្រីបានលើកឡើងថា រដ្ឋមន្ត្រីក្រសួងការបរទេសទួកគីបានកំពុងរៀបចំទទួលដំណើរបំពេញទស្សនកិច្ចរបស់គណៈប្រតិភូកម្ពុជាដឹកនាំដោយលោកទេសរដ្ឋមន្ត្រីប្រាក់ សុខុន ទៅកាន់ទីក្រុងអង់ការ៉ាប្រទេសទួកគីក្នុងពេលខាងមុខ ។ លោកស្រីបានលើកឡើងពីការត្រៀមរៀបចំសម្រាប់ដំណើរទស្សនកិច្ចរបស់លោកទេសរដ្ឋមន្ត្រី និងសម្តេចតេជោហ៊ុន សែន ។ទួកគីនឹងបញ្ជូនក្រុមជំនាញមកកាន់ប្រទេសកម្ពុជានៅខែឧសភា ឆ្នាំ២០១៨ខាងមុខនេះ ។ ដើម្បីពិនិត្យជាមួយភាគីកម្ពុជា ក្នុងការពិនិត្យលទ្ធភាពដែលរដ្ឋាភិបាលទួកគីអាចជួយដល់កម្ពុជា៕
ចែករំលែកព័តមាននេះ