រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា សំណង់ការរដ្ឋានស្ថាបនាស្ពានអាកាសស្តុបផ្សារដីហុយនឹងបន្តការងាររបស់ខ្លួនបន្តទៅទៀត ចាប់ពីយប់ថ្ងៃទី១៩ មេសានេះ រហូតដល់បញ្ចប់ទាំងស្រុង ។ ប៉ុន្តែការស្ថាបនាបន្តនេះមិនតម្រូវឲ្យបិទការធ្វើចរាចរណ៍ទាំងស្រុងនោះទេ គឺបិទមួយចំហៀង…
រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា សំណង់ការរដ្ឋានស្ថាបនាស្ពានអាកាសស្តុបផ្សារដីហុយនឹងបន្តការងាររបស់ខ្លួនបន្តទៅទៀត ចាប់ពីយប់ថ្ងៃទី១៩ មេសានេះ រហូតដល់បញ្ចប់ទាំងស្រុង ។ ប៉ុន្តែការស្ថាបនាបន្តនេះមិនតម្រូវឲ្យបិទការធ្វើចរាចរណ៍ទាំងស្រុងនោះទេ គឺបិទមួយចំហៀង បើកមួយចំហៀងទុកឲ្យប្រជាពលរដ្ឋធ្វើដំណើរទ្វេទិស បន្ទាប់ពីស្ពាននេះបានដាក់ឲ្យប្រជាពលរដ្ឋប្រើប្រាស់ជាបណ្តោះអាសន្ន កាលពីថ្ងៃទី១២ មេសា ឬមុនពិធីបុណ្យចូលឆ្នាំថ្មី ។
ដើម្បីជួយសម្រួលដល់ការធ្វើចរាចរណ៍របស់ប្រជាពលរដ្ឋមួយរយៈពេលកន្លងមកនេះ ។ មន្ត្រីរដ្ឋបាលរាជធានីភ្នំពេញបានឲ្យដឹងថា នៅវេលាម៉ោង១១និង០០យប់ថ្ងៃទី១៩ ខែមេសា ឆ្នាំ២០១៨ នេះការដ្ឋានសាងសង់ស្ពានអាកាសស្តុបផ្សារដីហុយនឹងបើកឲ្យដំណើរការចរាចរណ៍ទ្វេទិសដដែល ប៉ុន្តែនឹងបិទចរាចរណ៍លើកម្រាលស្ពាន១គន្លងក្នុងចំណោម ២គន្លង នៃ១ចំហៀងស្ពាន ដើម្បីបន្តការសាងសង់រហូតដល់ចប់ ។
មន្ត្រីដដែលបានបញ្ជាក់ថា ការដាក់ឲ្យចរាចរណ៍បណ្តោះអាសន្ននាពេលកន្លងមកត្រូវបានហាមរថយន្តក្រុង និងរថយន្តមានកម្ពស់លើសពី៣ម៉ែត្រ ឆ្លងកាត់ស្ពាន ប៉ុន្តែក្នុងរយៈពេលបើកបណ្តោះអាសន្នកន្លងមកនេះ ត្រូវបានរថយន្តក្រុងឯកជនចំនួន២គ្រឿង បានបើកបុកបំផ្លាញរបាំងកំណត់កម្ពស់រថយន្តឆ្លងកាត់ ដែលបានដាក់កាត់ទទឹងស្ពានបាក់រាបដល់ដីចំនួន២លើកមកហើយ ។ ប៉ុន្តែទោះបីជាយ៉ាងណាក្តី កាលពីល្ងាចថ្ងៃទី១៨ មេសានេះ របាំងកំណត់កម្ពស់រថយន្តឆ្លងកាត់លើស្ពាន អាកាសស្តុបផ្សារដីហុយនោះត្រូវបានធ្វើការជួសជុល និងតម្លើងរួចរាល់ឡើងវិញហើយ ។
គួររំលឹកថា ស្ពានអាកាសស្តុបផ្សារដីហុយចាប់ផ្តើមបើកការដ្ឋានសាងសង់កាលពីចុងខែសីហា ២០១៦ តាមគម្រោងត្រូវបញ្ចប់នៅបំណាច់ខែធ្នូ ឆ្នាំ២០១៧ ប៉ុន្តែដោយមានបញ្ហាខ្លះ ក្រុមការងារបានបន្ត ពន្យាពេលរហូតមកដល់ពេលនេះ ហើយមូលហេតុដែលយឺតយ៉ាវនោះ ដោយសារមានផលប៉ះពាល់ គឺខ្សែក្រោមដី និងបង្គោលតង់ស្យុងអគ្គិសនីកម្ពុជាមិនទាន់ដកចេញ ។ ស្ពានអាកាសស្តុបផ្សារដីហុយនេះ មានបណ្តោយ៩០៥ម៉ែត្រ ទទឹង១៦.៥ម៉ែត្រ ស្ថិតនៅប្រសព្វ រវាងមហាវិថីសហព័ន្ធរុស្ស៊ី និងផ្លូវហាណូយដែលជាគម្រោងហិរញ្ញប្បទានរបស់សាធារណរដ្ឋប្រជាមានិតចិន និងទទួលបានសិទ្ធិសាងសង់ដោយក្រុមហ៊ុនសៀងហៃ ត្រួតពិនិត្យបច្ចេកទេសដោយក្រសួងសាធារណការ និងដឹកជញ្ជូន ។ឪ
បច្ចុប្បន្ននេះ រាជធានីភ្នំពេញ មានស្ពានអាកាសចំនួន៥កន្លែង គឺស្ពានអាកាសក្បាលថ្នល់នៅអតីតរង្វង់មូលក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ថិតនៅស្តុបពេទ្យលោកសង្ឃ ស្ពានអាកាស៥មករា ស្ថិតនៅស្ដុបតិចណូ និងស្ពានអាកាស ស្តុបផ្សារដីហុយនេះតែម្តង ៕
ចែករំលែកព័តមាននេះ