ខេត្តបន្ទាយមានជ័យ ៖ បុណ្យចូលឆ្នាំថ្មីកំពុងសប្បាយរាំ ភ្លើងឆេះកុដិព្រះគ្រូចៅអធិការវត្តដងរុនផ្អើលឆោឡោអស់ថវិការជាង១០លានរៀលដែលកើតឡើងនៅម៉ោង៤និង៥០នាទី ថ្ងៃទី១៨ ខែមេសា ឆ្នាំ២០១៨ ស្ថិតភូមិដងរុន ឃុំបន្ទាយនាង ស្រុកមង្គលបូរី ។
លោកវរៈសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបូរីបានប្រាប់ថា នៅពេលដែលអគ្គីភ័យឆាបឆេះកុដិព្រះគ្រូចៅអធិការវត្តព្រះនាម ពូក សារិទ្ធ ព្រះជន្ម៣១ឆ្នាំ គឺនៅថ្ងៃបុណ្យចូលថ្មីប្រពៃណីខ្មែរត្រូវឆ្នាំច ឆ្នាំ២០១៨ នៅលេងកំសាន្តមិនទាន់ត្រាស់ហើយគេកំពុងរាំធុងបាស់សប្បាយស្រាប់តែអគ្គីភ័យបានឆាបឆេះកុដិយ៉ាងសន្ធោសន្ធៅបាននាំគ្នាផ្អើលឆោឡោទៅពន្លត់ ។ ហើយពេលដែលអគ្គីភ័យឆាបឆេះរថយន្តពន្លត់អគ្គីភ័យចំនួន៣គ្រឿងមានរបស់ស្នងការដ្ឋាននគរបាលខេត្ត២គ្រឿង និងរថយន្តពន្លត់អគ្គីភ័យអធិការដ្ឋាននគរបាលស្រុកមង្គលបូរី១គ្រឿងបានធ្វើអន្តរាគមន៍ និងបាញ់ពន្លត់ ។ អគ្គីភ័យដែលឆាបឆេះនេះតាមការសន្និដ្ឋានដំបូងកុដិអស់ទាំងស្រុង១ខ្នងឈើលើថ្មក្រោមដែលមានទទឹង៨ម៉ែត្រ និងបណ្តោយ១២ម៉ែត្រហើយអស់សម្ភារទាំងស្រុងដែលសរុបថវិការប្រមាណជាង១០លានរៀល ។
ប្រជាពលរដ្ឋបានបញ្ជាក់ថា នៅពេលដែលអគ្គីភ័យឆាបឆេះកុដិព្រះគ្រូចៅអធិការវត្តដងរុនគឺបងប្អូនប្រជាប្រពលរដ្ឋកំពុងរាំលេងកំសាន្តសប្បាយនៅថ្ងៃបុណ្យចូលឆ្នាំថ្មីដែលនឹងត្រូវត្រាស់នៅថ្ងៃទី១៩ ខែមេសា ឆ្នាំ២០១៨ ហើយត្រូវបានអគ្គីភ័យឆាបឆេះបណ្តាលផ្អើលឆោឡោតែម្តង ។ ការឆេះកុដិនេះតាមការសន្និដ្ឋានដំបូងគឺបណ្តាលផ្ទុះចរន្តអគ្គីសនីបណ្តាលឆេះកុដិហើយសំណូមពរសុំអោយបងប្អូនប្រជាពលរដ្ឋត្រូវមានការប្រុងប្រយ័ត្នមុនចេញដំណើរទៅណាមកណាត្រូវបិទភ្លើង និងពន្លត់ធូបទានការពារអគ្គីភ័យកើតឡើង ៕
ចែករំលែកព័តមាននេះ