ខេត្តរតនគិរី ៖ ស្ត្រីជនជាតិទំពួនម្នាក់ផឹកស្រាស្រវឹងដើររអិលជើងធ្លាក់ចូលអណ្តូងលង់ទឹកស្លាប់ ក្រោយពីគេប្រទះឃើញ រួចស្រង់ឡើងគោក។ ហេតុការណ៍នេះបង្កការឱ្យមានការភ្ញាក់ផ្អើលឡើងនៅវេលាម៉ោង៦ និង៣០នាទីព្រឹក ថ្ងៃច័ន្ទ ២កើត ខែពិសាខ ឆ្នាំច នព្វស័ក ព.ស២៥៦២ ត្រូវនឹងថ្ងៃទី១៦ ខែមេសា ឆ្នាំ២០១៨ ស្ថិតនៅភូមិថារ៉ងស្វាយ ឃុំអូរជុំ ស្រុកអូរជុំ ។ បើតាមមន្ត្រីនគរបាលស្រុកអូរជុំបានឲ្យដឹងថា ជនរងគ្រោះដែលធ្លាក់អណ្តូងស្លាប់នោះមានឈ្មោះ ផាង បាយ ភេទស្រី អាយុ៣៥ឆ្នាំ ជនជាតិទំពួន មុខរបរធ្វើចម្ការ ទីលំនៅភូមិតងកាម៉ាល ឃុំអូរជុំ ស្រុកអូរជុំ ខេត្តរតនគិរី។
ឈ្មោះ រៀ សូវៀត ភេទប្រុស អាយុ២២ឆ្នាំ ជនជាតិគ្រឹង ទីលំនៅភូមិឃុំកើតហេតុខាងលើ ហើយមានមុខរបរធ្វើចម្ការ បានរាយការណ៍ថា មានមនុស្សធ្លាក់ចូលក្នុងអណ្តូងទឹកនៅជិតផ្ទះរបស់គាត់។ ហើយកម្លាំងជំនាញអធិការដ្ឋាននគរបាលស្រុកអូរជុំ បានសហការជាមួយកម្លាំងការិយាល័យជំនាញបច្ចេកទេសវិទ្យាសាស្ត្រខេត្តចុះទៅដល់កន្លែងកើតហេតុក៏បានចាត់ចែងកម្លាំងឲ្យចុះយកសពជនរងគ្រោះមកដាក់នៅខាងលើ ដើម្បីត្រួតពិនិត្យ។
ក្រោយពីធ្វើការត្រួតពិនិត្យរួចមក តាមការសន្និដ្ឋានរបស់ជំនាញថា ជនរងគ្រោះនេះពិតជាបានផឹកស្រាស្រវឹងហើយដើររអិលជើងធ្លាក់ចូលក្នុងអណ្តូងទឹក ដោយខ្លួនឯងស្លាប់តែម្តងពិតប្រាកដមែន។ ក្រោយពីធ្វើកោសល្យវិច្ច័យរួចមក សមត្ថកិច្ចបានប្រគល់សពទៅឲ្យក្រុមគ្រួសារសាច់ញាតិយកទៅធ្វើបុណ្យតាមប្រពៃណីផងដែរ៕
ចែករំលែកព័តមាននេះ