ខេត្តរតនគិរី ៖ បុរសម្នាក់ដោយសារជីវភាពក្រីក្រពេកឡើងបេះផ្លែសំរ៉ងរបូតដៃធ្លាក់ស្លាប់ពេលបញ្ជូនមកសង្គ្រោះបន្ទាន់ នៅមណ្ឌលសុខភាពស្រុកវ៉ើនសៃ។ ករណីបុរសឡើងបេះផ្លែសំរ៉ងរបូតដៃធ្លាក់នោះកើតឡើងនៅវេលាម៉ោង៦ និង៣០នាទីព្រឹក ថ្ងៃពុធ៤កើត ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៨ ខែមេសា ឆ្នាំ២០១៨នេះ នៅត្រង់ចំណុចភ្នំអូរឡាឡៃជាប់ព្រំប្រទល់ប្រទេសឡាវ ចម្ងាយពីស្រុក៤០គីឡូម៉ែត្រ ស្ថិតនៅក្នុងភូមិឡាឡៃ ឃុំកុកឡាក់ ស្រុកវើនសៃ ខេត្តរតនគិរី។
ប្រភពពីមន្ត្រីនគរបាលស្រុកវើនសៃបានឲ្យដឹងថា ជនរងគ្រោះមានឈ្មោះ ក្រ វែង ភេទប្រុស អាយុ២៥ឆ្នាំ មានទីលំនៅភូមិឃុំកើតហេតុខាងលើបានរងរបួសយ៉ាងធ្ងន់ធ្ងរហើយស្លាប់ពេលបញ្ជូនមកសង្គ្រោះ។ ប្រភពបន្តថា បន្ទាប់ពីកើតហេតុក្រុមគ្រួសារសាច់ញាតិបានដឹកបញ្ជូនតាមម៉ូតូយកមកសង្គ្រោះបន្ទាន់នៅមណ្ឌលសុខភាពស្រុកវ៉ើនសៃហើយក៏ដាច់ខ្យល់ស្លាប់តែម្តង។ ក្រោយដាច់ខ្យល់ស្លាប់សាកសពត្រូវបានតម្កល់នៅមណ្ឌលសុខភាព ស្រុកវើនសៃរង់ចាំបងប្អូនមកទទួលយកទៅធ្វើបុណ្យតាមប្រពៃណី៕
ចែករំលែកព័តមាននេះ