សហរដ្ឋអាមេរិក-ប្រទេសកូរ៉េខាងជើង ៖ ប្រធានាធិបតីអាមេរិក លោកដូណាល់ ត្រាំ កាលពីថ្ងៃទី១៧ មេសា បានលើកពីការបញ្ជាក់នានាលើការជួបគ្នាកម្រិតខ្ពស់បំផុតជាមួយក្រុងព្យុងយ៉ាង ខណៈជិតដល់ការជួបគ្នារបស់លោកជាមួយមេដឹកនាំកូរ៉េខាងជើង លោកគីម ជុងអ៊ុន ។ លោកអះអាងពីលទ្ធភាពពិតប្រាកដនៃការដោះស្រាយបញ្ហាពិភពលោកមួយ ។
នៅឯនិវេសនដ្ឋាន MAR-A-LAGO ដ៏ប្រណិតរបស់លោកក្នុងរដ្ឋផ្លរីដា ជាកន្លែងលោកទទួលនាយករដ្ឋមន្ត្រីជប៉ុន លោកស៊ីនហ្សូ អាបេ ប្រធានាអាមេរិកបានលើកពីទីកន្លែង៥ ដែលអាចជ្រើសរើសសម្រាប់ការជួបគ្នាជាប្រវត្តិសាស្ត្រនេះដែលនឹងប្រព្រឹត្តទៅនាដើមខែមិថុនា ឬមុននេះប្រសិនបើអ្វីៗប្រព្រឹត្តទៅដោយរលូន ។
ដោយលើកពីការរៀបចំនានាដែលកំពុងធ្វើ លោកត្រាំ បង្ហាញសុទិដ្ឋិនិយមមួយចំនួន ។
លោកថា ពួកគេគោរពយើង ហើយយើងគោរពពួកគេវិញ ។ ពេលវេលានិយាយគ្នាមកដល់ហើយ ដើម្បីដោះស្រាយបញ្ហា ។ មានលទ្ធភាពពិតប្រាកដមួយនៃការដោះស្រាយបញ្ហាពិភពលោកមួយ ។ នេះពុំមែនជាបញ្ហាសម្រាប់តែសហរដ្ឋអាមេរិក ជប៉ុន ឬប្រទេសមួយចំនួនទៀតឡើយ តែជាបញ្ហាមួយសម្រាប់ពិភពលោក ។
ពេលសួរលោកពីលទ្ធភាពដែលការជួបគ្នានេះអាចធ្វើនៅសហរដ្ឋអាមេរិក លោកឆ្លើយថា ទេ តែលោកក៏ពុំបានធ្វើការបញ្ជាក់នានាដែរ ។
សេតវិមានក៏អះអាងនាថ្ងៃទី១៧ មេសា ដែរថា ការប្រាស្រ័យទាក់ទងគ្នាកម្រិតខ្ពស់ទាំងឡាយគឺមានជាមួយលោកគីម ជុងអ៊ុន ប៉ុន្តែលោកត្រាំ ពុំបាននិយាយដោយផ្ទាល់ជាមួយលោកគីម ជុងអ៊ុន ឡើយ ។
យោងតាមកាសែតវ៉ាស៊ីនតោនប៉ុស្តិ៍ថា នាយក CIA លោក MIKE POMPEO បានមកបំពេញទស្សនកិច្ចដោយសម្ងាត់មួយមកកាន់ក្រុងព្យុងយ៉ាងដោយនាឱកាសនោះលោកបានជួបជាមួយមេដឹកនាំកូរ៉េខាងជើងផង ។
លោកត្រាំ អះអាងម្យ៉ាងទៀតថា លោកគាំទ្រយ៉ាងម៉ឺងម៉ាត់ចំពោះការចរចាគ្នានានារវាងកូរ៉េទាំង២ ។ តាមការជឿជាក់របស់ខ្ញុំ ពួកគេជួបគ្នាដើម្បីពិភាក្សាពីការបញ្ចប់សង្គ្រាម ខណៈមនុស្សម្នាពុំុគិតថា សង្គ្រាមកូរ៉េចប់នៅឡើយ ។
ការជួបគ្នាកំពូលនាថ្ងៃទី២៧ មេសា រវាងលោកគីម ជុងអ៊ុន និងប្រធានាធិបតីកូរ៉េខាងត្បូង លោក MOON JAE IN អាចជាឱកាសនៃការលើកពីការតាក់តែងសន្ធិសញ្ញាសន្តិភាពមួយសម្រាប់ជំនួសយុទ្ធសន្តិភាពដែលបញ្ចប់ការប្រទូស្តរ៉ាយគ្នានៅឧបទ្វីបកូរ៉េ ក្រោយសង្គ្រាម១៩៥០-១៩៥៣ ។
ប្រមុខសេតវិមានក៏អរគុណដែរដល់សមភាគីចិន លោកស៊ី ជីនពីង ដែលដើរតួនាទីសំខាន់លើសំណុំរឿងនេះ ដោយសម្តែងការអបអរសាទរជាពិសេសដល់ភាពម៉ឺងម៉ាត់របស់លោកលើបញ្ហាផ្លាស់ប្តូរទំនិញជាមួយក្រុងព្យុងយ៉ាង ។
លោកត្រាំ សង្កត់ធ្ងន់លើទំនាក់ទំនងដ៏ប្រសើររបស់លោកជាមួយលោកស៊ីនហ្សូ អាបេ ។ លោកថា យើងតែងជួបនិយាយគ្នាគ្រប់ពេល ។ លោកសន្យាចំពោះលោកអាបេ ថា ក្នុងពេលចរចាជាមួយក្រុងព្យុងយ៉ាង លោកនឹងលើកដែរពីបញ្ហាបណ្តាជនជាតិជប៉ុន ដែលត្រូវចាប់ពង្រត់ដោយកូរ៉េខាងជើង កាលពីអំឡុងទសវត្សឆ្នាំ១៩៧០ និង១៩៨០ ។
បញ្ហានេះជាបញ្ហារសើបបំផុតនៅជប៉ុនដែលតែងលើកជាប់ថា នោះជាអាទិភាពមុនគេមួយសម្រាប់រដ្ឋាភិបាលជប៉ុន ៕
ចែករំលែកព័តមាននេះ