ខេត្តបន្ទាយមានជ័យ ៖ ផ្ទះពលរដ្ឋជាង57ខ្នងក្នុងស្រុក-ក្រុងចំនួន3 រួមមានក្រុងប៉ោយប៉ែត ស្រុកអូរជ្រៅ និងស្រុកម៉ាឡៃ រងការបំផ្លាញដោយគ្រោះធម្មជាតិភ្លៀងលាយខ្យល់កន្ត្រាក់កាលពីរសៀល និងល្ងាចថ្ងៃទី15 ខែមេសា ឆ្នាំ2018។
លោក សាន ស៊ានហូ អភិបាលនៃគណៈអភិបាលក្រុងប៉ោយប៉ែត ប្រាប់តាមទូរស័ព្ទថា ភ្លៀងលាយខ្យល់កន្ត្រាក់ពីរសៀលម្សិលមិញបានបំផ្លាញផ្ទះពលរដ្ឋនៅក្នុងភូមិចំនួន4 នៃសង្កាត់ប៉ោយប៉ែត និងសង្កាត់ផ្សារកណ្តាល សរុបអស់47ខ្នង ដោយផ្ទះរលំជិត10ខ្នង ក្រៅពីនេះប៉ើងដំបូល ប៉ុន្តែពុំមានអ្នករងគ្រោះទេ ព្រោះភាគច្រើនអ្នកស្រុកនាំគ្នាទៅលេងកម្សាន្តតាមវត្តអារាម។
លោកអភិបាលក្រុងបន្តថា ពេលនេះអាជ្ញាធរក្រុងសហការជាមួយអាជ្ញាធរសង្កាត់/ភូមិ និងកងកម្លាំង រួមមាននគរបាលរដ្ឋបាល នគរបាលព្រំដែន អាវុធហត្ថក្រុង យោធាសឹករងក្រុង និងយោធាមកពីកងពលតូចថ្មើរជើងលេខ51 បានចុះជួយសាងសង់ផ្ទះពលរដ្ឋនៅថ្ងៃទី16 ខែមេសានេះ។
លោកបន្តទៀតថា អាជ្ញាធរក្រុងក៏បានត្រៀមរួចរាល់នៅស័ង្កសីជិត400សន្លឹក និងកំពុងទិញគ្រឿងឧបភោគបរិភោគ ដើម្បីចែកជូនពលរដ្ឋផងដែរ។ ហើយក្រៅពីក្រុងប៉ោយប៉ែត ពលរដ្ឋ2ស្រុកផ្សេងទៀត គឺស្រុកអូរជ្រៅ ក៏រងគ្រោះដោយសាភ្លៀងលាយខ្យល់កន្ត្រាក់នេះ អស់9ខ្នង និងស្រុកម៉ាឡៃ1ខ្នងផងដែរ។
លោកអភិបាលបញ្ជាក់ថា គ្រួសាររងគ្រោះទាំង3ស្រុក-ក្រុងខាងលើ និងបានជួបសំណេះសំណាល ក៏ដូចជាទទួលអំណោយពីលោកឧបនាយករដ្ឋមន្ត្រី កែ គឹមយ៉ាន ប្រធានក្រុមការងារចុះជួយខេត្តបន្ទាយមានជ័យ នៅវត្តសុវណ្ណរុក្ខាសូរិយារាម ហៅវត្តព្រៃគប់ ស្ថិតក្នុងភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត នៅរសៀលថ្ងៃទី16មេសានេះផងដែរ។
សូមបញ្ជាក់ថា ពេលនេះអាជ្ញាធរកំពុងដឹកនាំក្រុមការងារ និងកងកម្លាំងកំពុងបែងចែកគ្នាជួយសាងសង់ផ្ទះពលរដ្ឋនៅតាមមូលដ្ឋានហើយ៕
ចែករំលែកព័តមាននេះ