ខេត្តបាត់ដំបង ៖ បើតាមសមត្ថកិច្ចបានឲ្យដឹងថា បុរសម្នាក់ត្រូវគេប្រទះឃើញស្លាប់ដោយចង.កកាលពីវេលាម៉ោង៦ព្រឹក ថ្ងៃទី១៥ មេសា នៅក្រោមដើមស្វាយខាងក្រោយផ្ទះ ស្ថិតក្នុងភូមិទំនប់ទឹក ឃុំបវេល ស្រុកបវេល ដែលគេសង្ស័យថា បណ្ដាលមកពីមានបញ្ហាក្នុងគ្រួសារ។
សមត្ថកិច្ចបានឲ្យដឹងទៀតថា មន្ត្រីជំនាញបានចុះទៅកាន់កន្លែងកើតហេតុភ្លាមៗដែរបន្ទាប់ពីទទូលបាននូវព័ត៌មាននេះ។ បើតាមមន្ត្រីជំនាញបានសន្និដ្ឋានថា បុរសរូបនេះអាចធ្វើអត្តឃាតខ្លួនឯងនៅចន្លោះពីម៉ោង២ទៅម៉ោង៤ទៀបភ្លឺ ដោយចង.កនៅនឹងមែកស្វាយខាងក្រោយផ្ទះ លុះព្រឹកឡើងទើបម្ដាយប្រទះឃើញក្រោយពីគាត់ងើបពីដំណេកដើរចេញក្រៅផ្ទះ។ ហើយជនរងគ្រោះខាងលើឈ្មោះ ញ៉ កុសល់ អាយុ៣២ឆ្នាំ រស់នៅ ភូមិទំនប់ទឹក ឃុំបវេល ស្រុកបវេល ។
ជុំវិញករណីនេះ បើតាមសមត្ថកិច្ចដែលបានស្រង់សំដីពីក្រុមគ្រួសារថា ជនរងគ្រោះដែលបានសម្រេចចិត្តធ្វើអត្តឃាតបែបនេះ ទំនងដោយសារតូចចិត្តនឹងប្រពន្ធដែលទៅធ្វើការនៅប្រទេសថៃ ដែលខ្លួនមិនអាចរារាំងបាន។ មិនតែប៉ុណ្ណោះពេលនេះ ប្រពន្ធក្បត់លួចមានប្តីនៅប្រទេសថៃ ចោលខ្លួនទៀតផង។
បើតាមការស្រង់សំដីដដែលបានឲ្យដឹងទៀតថា មុនពេលចេញទៅប្រទេសថៃ លើកចុងក្រោយនេះបុរសរងគ្រោះបានព្យាយាមរារាំងមិនឲ្យប្រពន្ធទៅថៃទៀតទេ ហើយថែមទាំងព្រមានថា បើមិនអាចរស់នៅជាមួយគ្នាវិញទេ ខ្លួននឹងសម្លាប់ខ្លួនតែម្ដង (ប្ដី)។ ប៉ុន្តែប្រពន្ធមិនស្ដាប់នៅតែមានះទៅប្រទេសថៃដដែល ទើបជនរងគ្រោះសម្រេចគិតខ្លីបែបនេះតែម្ដងទៅ។
ក្រោយពីពិនិត្យរួច មន្ត្រីជំនាញបានធ្វើកំណត់ហេតុ រួចប្រគល់សពជនរងគ្រោះឱ្យទៅក្រុមគ្រួសារធ្វើបុណ្យតាមប្រពៃណីហើយ៕
ចែករំលែកព័តមាននេះ