ខេត្តឧត្តរមានជ័យ ៖ ក្មេងទើបមានអាយុ១០ខែប៉ុណ្ណោះ ដោយសារតែឪពុកបង្កើតធ្វេសប្រហែស បណ្តាលឱ្យកូនលង់ទឹកធុងស្ពេត្រូស្លាប់បាត់បង់ជីវិតកាលពីវេលាម៉ោងប្រមាណ២និង៤៥នាទីរសៀល ថ្ងៃទី១២ មេសាស្ថិតនៅក្នុងភូមិអម្ពឹល ឃុំពង្រ ស្រុកចុងកាល់ ខេត្តឧត្តរមានជ័យ។
ក្មេងប្រុសតូចរងគ្រោះខាងលើឈ្មោះ ជឿ ណារ៉ាត់ អាយុ១០ខែប៉ុណ្ណោះ មានឪពុកឈ្មោះ ដែន ង៉ា អាយុ៣៥ឆ្នាំ និងម្តាយឈ្មោះ លុច សាម៉ៃ អាយុះ២៩ឆ្នាំ រស់នៅក្នុងភូមិ-ឃុំកើតហេតុខាងលើ។
បើតាមប៉ូលិសស្រុកចុងកាល់បានឱ្យដឹងថា ទាំង២នាក់ប្តីប្រពន្ធនេះ ទើបតែមានកូនប្រុសម្នាក់ដែលជាក្មេងរងគ្រោះ ហើយមុនពេលកើតហេតុម្តាយក្មេងរងគ្រោះជាប់រវស់ចេញទៅក្រៅផ្ទះដោយទុកកូនតូចឱ្យប្តីមើល ស្រាប់តែឪពុកបង្កើតក្មេងប្រុសរងគ្រោះដេកលង់លក់នៅក្នុងអង្រឹង បណ្តោយឱ្យកូនវារលេង ហើយតោងធុងស្ពេត្រូដាំក្បាលចូលក្នុងធុងទឹកលង់ស្លាប់បាត់បង់ជីវិតគួរឱ្យអាណោចអាធ័មតែម្តង។
តាមប៉ូលិសដដែលបន្តទៀតថា ក្រោយកើតហេតុ កម្លាំងជំនាញបានចុះទៅដល់កន្លែងកើតហេតុធ្វើការពិនិត្យនិងធ្វើកោសល្យវិច័យឃើញថា ក្មេងតូចទើបមានអាយុ១០ខែនេះពិតជាបានស្លាប់ដោយសារលង់ទឹកធុងស្ពេត្រូពិតប្រាកដមែន ក្រោយពីពិនិត្យរួចបានប្រគល់សពក្មេងរងគ្រោះទៅឱ្យឪពុកម្តាយយកធ្វើបុណ្យទៅតាមប្រពៃណី៕
ចែករំលែកព័តមាននេះ