រាជធានីភ្នំពេញ ៖ កញ្ជាក់ជញ្ជាំងបន្ទប់ការិយាល័យចំនួន៣ផ្ទាំងបានបាក់បែក និងប៉ើងធ្លាក់រប៉ាត់រប៉ាយ បណ្តាលឲ្យរងរបួស២នាក់ស្រាល ខណៈដែលផ្ទុះធ្លាយហ្គាសចេញពីផ្ទះបាយឡើងកក្រើក។ ទោះបីជាយ៉ាងណា សំណាងល្អត្រូវរថយន្តពន្លត់អគ្គីភ័យទៅអន្តរាគមន៍ទាន់ពេល។ ហេតុការណ៍នេះបានកើតឡើងកាលពីវេលាម៉ោង១ និង១០នាទីរសៀល ថ្ងៃទី១២ ខែមេសា ឆ្នាំ២០១៨ នៅចំណុចក្រុមហ៊ុនហៅស៍វែល លក់សម្ភារសំណង់ នៅតាមបណ្តោយផ្លូវជាតិលេខ៦ ក្នុងភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វារ។
អ្នករងរបួស២នាក់ ប្រុសម្នាក់ និងស្ត្រីម្នាក់ ដែលជាចុងភៅ ពុំត្រូវបានស្គាល់អត្តសញ្ញាណឡើយ។ ធុងហ្គាសដែលផ្ទុះធ្លាយនោះមានទម្ងន់១៥គីឡូក្រាម។ ប្រភពពត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ មានស្ត្រីជាចុងភៅម្នាក់បានធ្វើម្ហូប នៅចង្ក្រានបាយ បានបិទភ្លើងតែមិនបានបិទហ្គាសទេ។ ស្រាប់តែជាតិហ្គាសធ្លាយចេញតាមក្បាល និងផ្ទុះឡើងលាន់កក្រើកក្លាយជាអគ្គិភ័យឆាបឆេះ បណ្តាលឲ្យស្ត្រីជាចុងភៅរងរបួសរលាកដងខ្លួន។
ខណៈនោះដោយសារតែកម្លាំងហ្គាសបុកហោះទៅបុកនឹងកញ្ចក់ទ្វារការិយាល័យ បណ្តាលឲ្យបែក អស់៣ផ្ទាំង បណ្តាលឲ្យបុរសម្នាក់ទៀតរងរបួស។ ដោយសារតែកម្លាំងផ្ទុះធ្លាយហ្គាស បានធ្វើឲ្យបំណែកកញ្ចក់បានប៉ើងធ្លាក់រប៉ាត់រប៉ាយ។ តាមព័ត៌មានបានឲ្យដឹងទៀតថា នៅក្នុងហេតុការណ៍នោះរថយន្តពន្លត់អគ្គិភ័យចំនួន៤គ្រឿងបានទៅអន្តរាគមន៍ បាញ់ពន្លត់អស់២គ្រឿង ទាន់ពេលមិនបណ្តាលឲ្យភ្លើងឆេះរាលដាលធ្ងន់ធ្ងរនោះឡើយ៕
ចែករំលែកព័តមាននេះ