ចិន៖ តាមប្រភពព័ត៌មាន Oddity Central បានឲ្យដឹងថា ស្ត្រីអាយុ៥០ឆ្នាំម្នាក់ ត្រូវបានគ្រូពេទ្យរកឃើញថា មានការខូចខាតទៅលើសរសៃប្រសាទឆ្អឹងខ្នង ដោយសារតែបរិភោគតែអាហារបួស ។ ការមិនបរិភោគសាច់ គឺធ្វើឲ្យគាត់ខ្វះវីតាមីនបេ១២ ដែលវាជាវីតាមីនបម្រើឲ្យមុខងាររបស់ប្រព័ន្ធប្រសាទ ។
ស្ត្រីឈ្មោះត្រកូល Chen បានចាប់ផ្តើមរបបអាហារបួសតាំងពីនៅអាយុ២០ឆ្នាំ ដោយសារតែចង់បញ្ចុះទម្ងន់ ។ ក្រោយការបរិភោគអាហារគ្មានជាតិសាច់នេះ គាត់ក៏សង្កេតឃើញថា វាមានប្រសិទ្ធភាពល្អប្រសើរក្នុងការបញ្ចុះទម្ងន់ពិតមែន ដែលកាលនោះគាត់បានចុះ១០គីឡូក្រាម (ពី៥៥ទៅ៤៥) ។
ហេតុដូចនេះហើយ គាត់ក៏បន្តមិនបរិភោគសាច់តរៀងរហូតមកដល់អាយុ៥០ឆ្នាំ ដែលគាត់ចាប់ផ្តើមមានអារម្មណ៍ថា មិនស្រួលក្នុងខ្លួន ។
ស្ត្រីអាយុ៥០ឆ្នាំខាងលើបាននិយាយប្រាប់វេជ្ជបណ្ឌិតនៅមន្ទីរពេទ្យ Wuhan នៅខេត្ត Hubei ថា៖«នៅពេលថ្មីៗនេះ ខ្ញុំមានអារម្មណ៍ថា ជើងខ្ញុំដើរមិនស្មើគ្នាល្អទេ ហាក់បីដូចជាដើរជាន់សំឡី ។ ជើងទាំងសងខាងជានិច្ចដូចជាស្ពឹក» ។
គ្រូពេទ្យក៏រកឃើញថា អ្នកស្រី Chen មានការខូចខាតទៅលើសរសៃប្រសាទឆ្អឹងខ្នងដោយសារតែខ្វះវីតាមីបេ១២ ។ ក្រុមគ្រូពេទ្យថា នេះពិតជាសំណាងល្អណាស់ ដែលមកពេទ្យទាន់ពេលវេលា ព្រោះថា បើនៅតែបន្តហូបអាហារមិនមានសាច់បែបនេះទៀត គាត់អាចនឹងធ្លាក់ខ្លួនពិការ ។
ជាមួយគ្នានេះដែរ គ្រូពេទ្យមានពាក្យពេចន៍ប្រាប់ទៅអ្នកចង់សម្រក់ទម្ងន់ថា គួរតែងាកមកបរិភោគអាហារមានសាច់ត្រី និងបន្លែវិញ ទើបជាការប្រសើរ ព្រោះថាបើទទួលទានតែបន្លែសុទ្ធ នោះនឹងខ្វះសារជាតិចិញ្ចឹមសំខាន់ៗមួយចំនួនធំនៅក្នុងសាច់ត្រីហើយ ៕
ប្រភព៖ http://www.odditycentral.com/news/30-year-vegetarian-diet-almost-leaves-woman-with-spinal-neuron-damage.html
ចែករំលែកព័តមាននេះ