ខេត្តកំពង់ឆ្នាំង ៖ ទឹកប្រាក់ចំនួន១៥០ដុល្លារ ស្មើនឹង៦០ម៉ឺនរៀល ត្រូវបានភ្នាក់ងារ កោះសន្តិភាព ប្រចាំខេត្តកំពង់ឆ្នាំង បានយកទៅប្រគល់ជូនលោកយាយអាយុ៨៦ឆ្នាំ ដែលកំពុងរស់នៅឯកការក្នុងខ្ទមតូចមួយនៅក្នុងភូមិព្រះរាមរង្ស៊ី ឃុំជ្រៃបាក់…
ខេត្តកំពង់ឆ្នាំង ៖ ទឹកប្រាក់ចំនួន១៥០ដុល្លារ ស្មើនឹង៦០ម៉ឺនរៀល ត្រូវបានភ្នាក់ងារ កោះសន្តិភាព ប្រចាំខេត្តកំពង់ឆ្នាំង បានយកទៅប្រគល់ជូនលោកយាយអាយុ៨៦ឆ្នាំ ដែលកំពុងរស់នៅឯកការក្នុងខ្ទមតូចមួយនៅក្នុងភូមិព្រះរាមរង្ស៊ី ឃុំជ្រៃបាក់ ស្រុករលាប្អៀរ កាលពីរសៀលថ្ងៃទី១១ ខែមេសា ឆ្នាំ២០១៨។ អំណោយទាំងនេះគឺបានមកពីសប្បុរសជន នៅសហរដ្ឋអាមេរិក គឺកញ្ញា បុស្បា ចេង ចំនួន១០០ដុល្លារ និងសប្បុរសជន រស់នៅប្រទេសអូស្ត្រាលី គឺកញ្ញា គីម រ័ត្ន ចំនួន៥០ដុល្លារ ប្រាក់ទាំងនេះត្រូវបានដូរជាប្រាក់ខ្មែរ តាមសំណូមម្ចាស់ជំនួយមុននឹងប្រគល់ជូនលោកយាយខាងលើ។
សូមបញ្ជាក់ថា លោកយាយអាយុ៨៦ឆ្នាំ ដែលកំពុងរស់ដោយការលំបាកនោះមានឈ្មោះ ម៉ា ហ៊ឹម។ លោកយាយ កាលដើមឡើយមានប្តីម្នាក់ឈ្មោះ ម៉ិល កុច។ ប៉ុន្តែពួកគាត់ទាំងពីរនាក់ប្តីប្រពន្ធ គ្មានកូនទេ ទើបសុំកូនស្រីគេអាយុ ៥ឆ្នាំម្នាក់ មកចិញ្ចឹមដោយដាក់ឈ្មោះ ម៉ិល ភាព។ នៅពេលកូនចិញ្ចឹមធំពេញវ័យ បានរៀបការប្តី និងបង្កើតបានកូនប្រុសម្នាក់។ ក្រោយមកប្តីលោកយាយបានស្លាប់ទៅ មិនយូប៉ុន្មាន កូនស្រីចិញ្ចឹមលោកយាយ ឈ្មោះ ម៉ិល ភាព ក៏ស្លាប់ទៅដែរ។ នៅពេលកូនស្រីចិញ្ចឹមលោកយាយស្លាប់ទៅ ប្តីរបស់នាងក៏ទៅមានប្រពន្ធថ្មីទៀត មិនដែលមកមើល និងជួយចិញ្ចឹមលោកយាយឡើយ។
បច្ចុប្បន្នលោកយាយរស់នៅម្នាក់ឯង ចំណែកចៅប្រុស លោកយាយ ដែលត្រូវជាកូននាង ម៉ិល ភាព ក៏បានប្រពន្ធមានកូន៣នាក់ តែគ្នាមានជីភាពទីទាល់ក្រ ចិញ្ចឹមខ្លួនឯងស្ទើមិនរស់ផង។ លោកយាយ ម៉ា ហ៊ឹម ក្រោយពីបានទទួលអំណោយជាទឹកប្រាក់យ៉ាងច្រើនបែបនេះ ត្រេកអរ រកអ្វីមកប្រៀបផ្ទឹមស្មើមិនបានឡើយ និងបានលើកដៃសំពះថ្លែងអំណរគុណ ដល់សប្បុរសជន ទាំងញ័រចំប្រប់ថា សូមឲ្យសប្បុរសជួបពុទ្ធពរទាំង៤ប្រការ កុំបីឃ្លៀងឃ្លាតឡើយ៕ 
ចែករំលែកព័តមាននេះ