រាជធានីភ្នំពេញ ៖ ជនសង្ស័យ២នាក់ក្នុងចំណោមបក្សពួក៣នាក់ត្រូវបានកម្លាំងសមត្ថកិច្ចប៉ុស្តិ៍នគរបាលទំនប់ឃាត់ខ្លួនយកទៅសាកសួរបន្ទាប់ពីឆែកឆេររកឃើញនូវសារធាតុញៀនចំនួន១កញ្ចប់តូច ហេតុការណ៍ឃាត់ខ្លួនបានធ្វើឡើងកាលពីវេលាម៉ោង២និង១០នាទីរំលងអធ្រាត្រឈានចូលថ្ងៃទី១១ ខែមេសា ឆ្នាំ២០១៨ ទល់មុខនឹងមជ្ឈមណ្ឌលកំសាន្ត ផាកវ៉េ ផ្លូវម៉ៅសេងទុង សង្កាត់ទំនប់ទឹក ខណ្ឌចំការមន ។
ជនសង្ស័យដែលត្រូវសមត្ថកិច្ចឃាត់ខ្លួនមានឈ្មោះ ចាន់ សំណាង ភេទប្រុស អាយុ៣០ឆ្នាំ មុខរបររៀនជុសជុលឡាន ស្នាក់នៅផ្ទះជួល សង្កាត់បឹងទំពុន១ ខណ្ឌមានជ័យ និងម្នាក់ទៀតមានឈ្មោះ សារ៉ាន់ វុធ ភេទប្រុស អាយុ១៩ឆ្នាំ មុខរបរជាងបាញ់ថ្នាំរថយន្ត ស្នាក់នៅផ្ទះជួលសង្កាត់បឹងពន់១ ខណ្ឌមានជ័យ ចំណែកម្នាក់ទៀតដែលរត់គេចខ្លួនបាត់មានឈ្មោះ ថា ពេជ្រ អាយុ១៨ឆ្នាំ ។ ដកហូតថ្នាំប្រភេទក្រាមពណ៌សថ្លា ចំនួន១កញ្ចប់តូច ដែកកេះមួយ ទូរស័ព្ទ១គ្រឿង និងឧបករណ៍សំរាប់ប្រើប្រាស់គ្រឿងញៀនមួយផងដែរ ។
តាមសម្តីលោកមេប៉ុស្តិ៍ទំនប់ទឹកបានឱ្យដឹងថា មុននឹងឈានទៅដល់ការឃាត់ខ្លួនជនសង្ស័យទាំងនេះបានគឺកម្លាំងសមត្ថកិច្ចរបស់លោកបានធ្វើការល្បាតក្នុងមូលដ្ឋានដើម្បីទប់ស្កាត់បទល្មើសផ្សេងៗ និងការពារសុវត្ថិភាពជូនប្រជាពលរដ្ឋ ខណៈមកដល់ចំណុចខាងលើក៏ប្រទះឃើញបុរសបីនាក់បានជិះម៉ូតូម៉ាក់ស៊ុយសុគីនិច ពណ៌ស ជិះចុះជិះឡើងដោយមានការសង្ស័យកម្លាំងសមត្ថកិច្ចបានសុំធ្វើការណ៍ត្រួតពិនិត្យក៏ស្រាប់តែជនសង្ស័យបានបោះថ្នាំញៀនមួយកញ្ចប់តូចចោលទៅលើដីកន្លែងកើតស្ងាត់ ហើយពេលនោះដែរសមត្ថកិច្ចឆែកឆេររកអត់ឃើញអ្វី ក៏បានឱ្យបុរសជាជនសង្ស័យទាំងនោះបន្តដំណើរទៅមុខទៀតក៏សមត្ថកិច្ចបានប្រទះឃើញថ្នាំមួយកញ្ចប់តូចនៅលើដីស្រាប់បាត់ទៅហើយ ។
សមត្ថកិច្ចបានបន្តទៀតថា បន្ទាប់ពីកម្លាំងសមត្ថកិច្ចឱ្យជនសង្ស័យទាំងនោះបន្តដំនើរទៅមុខទៀតហើយនោះមួយសន្ទុះក្រោយក៏ស្រាប់តែជនសង្ស័យទាំងនោះបានជិះម៉ូតូមករកថ្នាំញៀនដែរពួកខ្លួនបោះចោលនៅនឹងកន្លែងកើតដើម្បីយកទៅប្រើវិញក៏ត្រូវសមត្ថកិច្ចឃាត់ខ្លួនបានចំនួន២នាក់ ចំណែកម្នាក់ទៀតដែលមានឈ្មោះ ពេជ្រ បានរត់គេចខ្លួនបាត់ ។ នៅចំពោះមុខសមត្ថកិច្ចជនសង្ស័យទាំង២នាក់នោះបានសារភាពថា ថ្នាំញៀនទាំងនេះមិនមែនជារបស់ពួកគេទាំងពីរនាក់នោះទេ ហើយថ្នាំញៀនគឺជាបុរសម្នាក់ឈ្មោះ ពេជ្រ ដែលបានរត់គេចខ្លួនបាត់ ៕
ចែករំលែកព័តមាននេះ