រាជធានីភ្នំពេញ ៖ ក្នុងរយៈពេលជាង២ទសវត្សរ៍កន្លងមកនេះ កម្ពុជាបានរក្សាកំណើនសេដ្ឋកិច្ចក្នុងរង្វង់៧%ក្នុងមួយឆ្នាំ ហើយក៏កម្រមានប្រទេសនៅក្នុងតំបន់ និងក្រៅតំបន់អាចធ្វើបាននោះដែរ ។ បើតាមសារលិខិតសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្ញើជូនប្រជា
ពលរដ្ឋក្នុងឱកាសបុណ្យចូលឆ្នាំថ្មីប្រពៃណីជាតិ បានឲ្យដឹងថា កំណើនដ៏រឹងមាំនេះ ត្រូវបានឆ្លុះបញ្ចាំងតាមរយៈការរីកចម្រើននៃវិស័យឧស្សាហកម្ម កម្មន្តសាល សំណង់ កសិកម្ម សេវាកម្ម ទេសចរណ៍ និងអចលនទ្រព្យ ជាដើម ។
តាមលិខិតនេះថា កម្ពុជាកំពុងផ្លាស់ប្តូររចនាសម្ព័ន្ធសេដ្ឋកិច្ចពីប្រទេសដែលពឹងផ្អែកលើវិស័យកសិកម្ម ទៅជាប្រទេសដែលពឹងផ្អែកលើវិស័យឧស្សាហកម្ម និងសេវាកម្ម ។ កម្ពុជាបានអនុវត្តគោលនយោបាយម៉ាក្រូសេដ្ឋកិច្ចប្រកបដោយភាពប្រុងប្រយ័ត្ន និងធ្វើឲ្យសេដ្ឋកិច្ច មានស្ថិរភាព ហើយបានជំរុញ និងលើកកម្ពស់ការធ្វើពិពិធកម្មសេដ្ឋកិច្ច ភាពប្រកួតប្រជែង ព្រមទាំងការផលិត និងការប្រើប្រាស់ផលិតផលក្នុងស្រុក ។
សម្ដេចតេជោបានមានប្រសាសន៍ថា តាមរយៈការខិតខំប្រឹងប្រែងរបស់ថ្នាក់ដឹកនាំ បានធ្វើឲ្យកម្រិតជីវភាពរបស់ប្រជាពលរដ្ឋកាន់តែប្រសើរ ។ ជាក់ស្ដែង ផលិតផលក្នុងស្រុកសម្រាប់មនុស្សម្នាក់បានកើនពី១.០៤២ដុល្លារអាមេរិកក្នុងឆ្នាំ២០១៣ ដល់១.៤៣៥ដុល្លារអាមេរិកក្នុងឆ្នាំ២០១៧ ។
តាមរយៈសកម្មភាពផ្លាស់ចេញពីវិស័យកសិកម្ម ទៅរកវិស័យឧស្សាហកម្មសម្រាប់កំណើនសេដ្ឋកិច្ច រាជរដ្ឋាភិបាលបានកៀងគរវិនិយោគទុននានាពីបរទេស ដើម្បីបណ្ដាក់ទុនវិនិយោគនៅក្នុងប្រទេសកម្ពុជា ។ ជាក់ស្ដែង តាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ឃើញថា ស្ថាប័នមួយនេះអនុញ្ញាតចេញវិញ្ញាបនបត្រចុះបញ្ជីជាបន្តបន្ទាប់ដល់ក្រុមហ៊ុនបរទេសដែលមកវិនិយោគនៅក្នុងប្រទេសកម្ពុជា ដើម្បីផ្ដល់ការងារជូនប្រជាពលរដ្ឋ ។
លោក ជា វុទ្ធី អគ្គលេខាធិការរងនៃក្រុមប្រឹក្សាអភិវឌ្ឍន៍កម្ពុជា បានឲ្យដឹងថា ក្រុមប្រឹក្សាអភិវឌ្ឍន៍កម្ពុជា មានតួនាទីសំខាន់ក្នុងការកៀងគរវិនិយោគិនមកកម្ពុជា ដើម្បីឲ្យសកម្មភាពសេដ្ឋកិច្ចកម្ពុជាកាន់តែមានកំណើនខ្ពស់ឡើង ។
លោកថា ៖« យើងមានតែតួនាទីកៀងគរបណ្តាវិនិយោគិនបរទេសនានាមកវិនិយោគនៅកម្ពុជា ដើម្បីវិនិយោគបង្កើតការងារជូនបងប្អូនប្រជាពលរដ្ឋ ក៏ប៉ុន្តែក្រុមវិនិយោគិនទាំងនោះមានគម្រោងបែបនេះ ធ្វើបានល្អកម្រិតណា គឺអាស្រ័យលើពួកគេ ក៏ប៉ុន្តែពួកគេក៏ត្រូវធ្វើទៅតាមច្បាប់វិនិយោគរបស់កម្ពុជាយើងដែរ » ។
តាមការព្យាកររបស់ក្រសួងទេសចរណ៍កម្ពុជា មានភ្ញៀវទេសចរអន្តរជាតិ៦,១លាននាក់នៅឆ្នាំ២០១៨, ឆ្នាំ២០២០ កើនឡើងដល់៧លាននាក់ និង១៥លាននាក់ក្នុងឆ្នាំ២០៣០។ ការមកដល់របស់ភ្ញៀវទេសចរអន្តរជាតិនៅកម្ពុជា ក៏ជាចំណូលដ៏សំខាន់មួយសម្រាប់វិស័យទេសចរណ៍ ។ ជាក់ស្ដែង ក្នុងភ្ញៀវម្នាក់ៗនឹងត្រូវចំណាយប្រាក់ទៅលើការស្នាក់នៅ ហូបចុក និងការទិញរបស់របរត្រឡប់ទៅស្រុកវិញ ។
ដោយឡែក ក្នុងវិស័យឧស្សាហកម្មដែលជាវិស័យស្នូលនាពេលបច្ចុប្បន្ន ក្នុងការរួមចំណែកសេដ្ឋកិច្ចជាតិ តាមរបាយការណ៍របស់ធនាគារជាតិនៃកម្ពុជា ក្នុងឆ្នាំ២០១៧ ឧស្សាហកម្មកាត់ដេរមានចំណែកក្នុងផ.ស.ស ១,៤% ហើយឧស្សាហកម្មសំណង់បានរួមចំណែក១,៥% នៃផ.ស.ស ។
សេដ្ឋវិទូនានាបានផ្ដល់ជាយោបល់ដល់កម្ពុជាថា គួរតែងាកចេញពីវិស័យកសិកម្ម ទៅវិស័យឧស្សាហកម្ម និងសេវាកម្ម ដែលអាចរកចំណូលបានខ្ពស់សម្រាប់ប្រជាពលរដ្ឋ និងប្រទេសជាតិ។ ជាក់ស្ដែង វិស័យសេវាកម្មទេសចរណ៍អាចរកប្រាក់ចំណូលសរុបបានប្រមាណ៣.៥០០លានដុល្លារអាមេរិក និងរំពឹងថា កើនដល់១០ពាន់លានដុល្លារអាមេរិកក្នុងឆ្នាំ២០៣០ ៕
ចែករំលែកព័តមាននេះ