ខេត្តឧត្តរមានជ័យ ៖ ប្រជាកសិករម្នាក់បានប្រទះឃើញគ្រាប់យុទ្ធភណ្ឌមិនទាន់ផ្ទុះមួយគ្រាប់ ដែលសល់កាលពីសម័យសង្គ្រាមមកម្ល៉េះ ជាប្រភេទគ្រាប់ B៤០ កាលពីរសៀលថ្ងៃទី០៩ ខែមេសានេះ ស្ថិតក្នុងភូមិអូរសោម ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ។
ប្រជាពលរដ្ឋជាម្ចាស់ដីដែលបានប្រទះឃើញគ្រាប់យុទ្ធភណ្ឌមិនទាន់ផ្ទុះបានឱ្យដឹងថា ដីរបស់គាត់ជាប្រភេទដីចម្ការទើបតែកាប់គាស់ថ្មី ហើយមិនទាន់ដាំដំណាំអ្វីដែរ ខណៈក្នុងឆ្នាំនេះរូបខ្លួនបានកាប់ឆ្ការព្រៃអស់នឹងដាក់គ្រឿងចក្រធ្វើការឈួសឆាយ ហើយភ្ជួរដាំដំណាំ តែមុនពេលភ្ជួរដីក៏ដើរមើលដី ស្រាប់តែបានប្រទះឃើញ ហើយរត់ទៅរាយការណ៍ដល់សមត្ថកិច្ច ។
ប៉ូលិសស្រុកត្រពាំងប្រាសាទបានឱ្យដឹងថា ក្រោយពីបានទទួលនូវព័ត៌មានរាយការណ៍ សមត្ថកិច្ចបានចុះទៅនឹងកន្លែងកើតហេតុ ធ្វើការពិនិត្យ រួចបានឱ្យក្រុមហេឡូត្រាសមកធ្វើការកម្ទេចចោលនៅក្នុងថ្ងៃដដែល ។
គួរំលឹកថា ប្រជាពលរដ្ឋដែលបានប្រទះឃើញគ្រាប់មិនទាន់ផ្ទុះដែលសល់កាលពីសម័យសង្គ្រាមជាលើកទី២ហើយ កាលពីថ្ងៃទី១ មេសានេះ លើកទី១ហើយ ដែលស្ថិតនៅភូមិពោធិវង្ស សង្កាត់កូនគ្រៀល ក្រុកសំរោង ៕
ចែករំលែកព័តមាននេះ