សាលាខេត្តកំពត និមន្តព្រះសង្ឃសូត្រមន្តលើករាសីសុំសិរីសួស្តី
- កំពត
ខេត្តកំពត ៖ នៅរសៀលថ្ងៃច័ន្ទ០៩រោច ខែចេត្រ ឆ្នាំរកា នព្វស័ក ព,ស ២៥៦១ ត្រូវថ្ងៃទី០៩ ខែមេសា…
ខេត្តកំពត ៖ នៅរសៀលថ្ងៃច័ន្ទ០៩រោច ខែចេត្រ ឆ្នាំរកា នព្វស័ក ព,ស ២៥៦១ ត្រូវថ្ងៃទី០៩ ខែមេសា…
ខេត្តកំពត ៖ នៅរសៀលថ្ងៃច័ន្ទ០៩រោច ខែចេត្រ ឆ្នាំរកា នព្វស័ក ព,ស ២៥៦១ ត្រូវថ្ងៃទី០៩ ខែមេសា ឆ្នាំ២០១៨។ សាលាខេត្តកំពត បានធ្វើពិធីនិមន្តព្រះសង្ឃសូត្រមន្តលើករាសីសុំសីរីសួស្ដី និងសូមពរជ័យ ទេវតាឆ្នាំថ្មី ឆ្នាំច សំរិទ្ធស័ក ព.ស២៥៦២ គឺត្រូវថ្ងៃទី១៤-១៥-១៦ ខែមេសាឆ្នាំ២០១៨ដ៏ខ្លីខាងមុខនេះ។ ពិធីនេះបានប្រព្រឹត្តទៅក្រោមវត្តមានចូលរួមពី ឯកឧត្ដម ជាវ តាយ អភិបាលនៃគណៈអភិបាលខេត្តព្រមទាំងឯកឧត្តម-លោកជំទាវ លោក-លោកស្រី ក្នុងជួរក្រុមប្រឹក្សា និងគណៈអភិបាលខេត្ត រួមថ្នាក់ដឹកនាំមន្ត្រីរាជការក្រោមឱវាទសាលាខេត្ត និងថ្នាក់ដឹកនាំមន្ទីរអង្គភាពជុំវិញខេត្តផងដែរ។ ពិធីនេះគឺក្នុងគោលបំណង ដើម្បីបួងសួងសុំសេចក្ដីសុខចម្រើន និងពរជ័យពីទេវតាឆ្នាំថ្មីព្រះនាម “មហោទរាទេវី” សូមព្រះអង្គតាមជួយថែរក្សាអភិបាលប្រោះព្រំពរជ័យដល់ថ្នាក់ដឹកនាំនៃរាជរដ្ឋាភិបាល គ្រប់ជាន់ថ្នាក់ ប្រជាពលរដ្ឋខ្មែរទាំងអស់ ពិសេសថ្នាក់ដឹកនាំ និងប្រជាពលរដ្ឋ ក្នុងខេត្តកំពតទាំងមូល បានជួបតែសេចក្ដីសុខគ្រប់ប្រការ និងរួមសាមគ្គីគ្នាដើម្បីអភិវឌ្ឍន៍ឲ្យបានកាន់តែរីកចម្រើនថែមទៀត ក្រោមម្លប់នៃសុខសន្តិភាពបានយូរអង្វែងតរៀងទៅ។
បន្ទាប់មកឆ្លៀតក្នុងឱកាសនោះ ឯកឧត្ដម ជាវ តាយអភិបាលខេត្ត ក៏បានជួបសំណេះសំណាលដើម្បីស្វែងយល់ នូវសុខទុក្ខ និងរបៀបរបបការងារជាមួយថ្នាក់ដឹកនាំ និងមន្ត្រីរាជការសាលាខេត្ត សរុបចំនួន១៤៦នាក់ និងមន្ត្រីជាប់កិច្ចសន្យាចំនួន៥១នាក់ផងដែរ។ មានប្រសាសន៍សំណេះសំណាលឯកឧត្ដម អភិបាលខេត្ត បានកោតសរសើរដល់ថ្នាក់ដឹកនាំ និងមន្ត្រីរាជការគ្រប់លំដាប់ ថ្នាក់ក្នុងសាលាខេត្តកំពតទាំងអស់ ដែលបានខិតខំបំពេញតួនាទីភារកិច្ចតាមជំនាញរៀងៗខ្លួនដោយទទួលបានលទ្ធផលល្អប្រសើរ និងក៏បានលើកឡើងនូវចំណុចខ្វះខាតរាល់បញ្ហាប្រឈមនានាផងដែររយៈពេលកន្លងមក។ ពិសេសពីការងារភាពយឺតយ៉ាវពាក់ព័ន្ធការបើកប្រាក់បំណាច់បេសកកម្ម ដែលពេលនេះត្រូវបានជំរុញដោះស្រាយ បើកផ្ដាច់ជូនមន្ត្រីរាជការគ្រប់ចំនួនអស់ហើយ។
ឯកឧត្តមអភិបាលខេត្តក៏បានផ្ដាំផ្ញើ ដល់ថ្នាក់ដឹកនាំ មន្ត្រីរាជការទាំងអស់ក្នុងសាលាខេត្ត ត្រូវរួមសាមគ្គីគ្នា ដោយរួមគ្នាគិតរួមគ្នាធ្វើ និងរួមគ្នាដោះស្រាយ ដើម្បីឲ្យអង្គភាពទទួលបានការរីកចម្រើន និងជម្រុញល្បឿននៃការអភិវឌ្ឍន៍ខេត្តឲ្យមានភាពលូតលាស់ លើគ្រប់វិស័យ ទាំងការងារបម្រើសេវាសាធារណៈ ឈានដល់ការលើកកម្ពស់ជីវភាពរស់នៅរបស់ ប្រជាពលរដ្ឋនៃខេត្តកំពតកាន់តែប្រសើរឡើងថែមទៀត។ ក្នុងឱកាសនោះដែរ ឯកឧត្ដម ជាវ តាយអភិបាលខេត្ត ក៏បានផ្ដល់ជូននូវថវិកា និងភេសជ្ជៈ សម្រាប់អបអរឆ្នាំថ្មីនេះជូនដល់ថ្នាក់ដឹកនាំមន្ត្រីរាជការក្នុងសាលាខេត្តចំនួនជាង២០០នាក់ ក្នុងម្នាក់ប្រាក់២០ម៉ឺនរៀលទឹកដោះគោ១កេះទឹក ក្រូច១កេស និងស្រាបៀរ១កេសស្មើៗគ្នាផងដែរ៕
ចែករំលែកព័តមាននេះ