បវរកញ្ញាពិភពលោកឆ្នាំ២០១៧ មកទស្សនកិច្ចស្វែងយល់អំពីការងាររបស់ស្ត្រី
- កំពង់ឆ្នាំង
ខេត្តកំពង់ឆ្នាំង ៖ បវរកញ្ញាពិភពលោកឆ្នាំ២០១៧ កញ្ញា Barbara Vitorelli , Miss Global នៅព្រឹកថ្ងៃទី០៩…
ខេត្តកំពង់ឆ្នាំង ៖ បវរកញ្ញាពិភពលោកឆ្នាំ២០១៧ កញ្ញា Barbara Vitorelli , Miss Global នៅព្រឹកថ្ងៃទី០៩ ខែមេសា ឆ្នាំ២០១៨នេះ បានមកធ្វើទស្សនកិច្ចនៅក្នុងមជ្ឈមណ្ឌលអភិវឌ្ឍន៍ស្ត្រី ខេត្តកំពង់ឆ្នាំង ស្ថិតនៅក្នុងភូមិទឹកហូត ឃុំទឹកហូត ស្រុករលាប្អៀរ ដើម្បីស្វែងយល់អំពីជីវភាព និងមុខរបររបស់ស្ត្រីនៅខេត្តកំពង់ឆ្នាំង ប្រទេសកម្ពុជា។ ឯកឧត្តម ទៀង ថៃ និងលោកជំទាវ វ៉ាន់ លុយ នាយិកាក្រុមហ៊ុនទឹកបរិសុទ្ធ អេរ៉ូតិចជាអ្នកដឹកនាំ បវរកញ្ញាអន្តរជាតិខាងលើនេះ មកធ្វើទស្សនកិច្ច នៅក្នុងខេត្តកំពង់ឆ្នាំងបានឲ្យដឹងថា បវរកញ្ញាអន្តរជាតិឆ្នាំ២០១៧រូបនេះ ជាជនជាតិប្រេស៊ីល អាយុ២៤ឆ្នាំ នាងចេះ៥ភាសា គោលបំណងនៃទស្សកិច្ចនេះ គឺនាងចង់ស្វែងយល់អំពីជីវភាពរស់នៅ ប្រជាពលរដ្ឋនៅក្នុងខេត្តកំពង់ឆ្នាំង ពិសេសគឺមុខរបររបស់ស្ត្រីខ្មែរ។
បវរកញ្ញា Barbara Vitorelli , Miss Global បាននិយាយថា នាងពិតជាសប្បាយចិត្តណាស់ពេលដល់ប្រទេសកម្ពុជា តាមការអញ្ជើញរបស់ ឯកឧត្តម ទៀង ថៃ និងលោកជំទាវ វ៉ាន់ លុយ។ នៅក្នុងពេលនេះ នាងមានចំណាប់អារម្មណ៍ខ្លាំងណាស់ អំពីបុខរបររបស់ស្ត្រីកម្ពុជា ដូចជាការធ្វើរបស់ប្រើប្រាស់អំពីដីឥដ្ឋ អំពីឫស្សី អំពីសូត្រ នាងពិតជា ស្រលាញ់របស់ទាំងអស់នេះខ្លាំងណាស់ ដោយនាងបានថតរូបជាមួយរបស់ប្រើប្រាស់ទាំងអស់នោះ ដើម្បីឲ្យពិភពលោកបានស្គាល់អំពីវប្បធម៌របស់ខ្មែរ។ បវរកញ្ញាពិភពលោករូបនោះ បានដើរទស្សនា របស់ប្រើប្រាស់ទាំងអស់នោះ មើលកីតម្បាញរបស់មជ្ឈមណ្ឌលអភិវឌ្ឍន៍ស្រី្តខេត្តកំពង់ឆ្នាំង និងបានជួយទិញយកនូវផលិតផលទាំងនោះមួយចំនួនផងដែរ សម្រាប់យកទៅប្រទេសរបស់នាង។
ដោយឡែក លោកស្រី ឈុំ ចាន់សុខ ប្រធានមន្ទីរកិច្ចការនារីខេត្តកំពង់ឆ្នាំង បានឲ្យដឹងថា មជ្ឈមណ្ឌលអភិវឌ្ឍន៍ស្រី្តខេត្តកំពង់ឆ្នាំង បានកសាងឡើងនៅឆ្នាំ១៩៩៦ ដោយក្រសួងកិច្ចការនារី និងរាជរដ្ឋាភិបាលជប៉ុន ដើម្បីជាកន្លែងបណ្តុះបណ្តាលវិជ្ជាជីវៈដល់ស្ត្រីក្រីក្រនៅក្នុងសហគមន៍ ឲ្យមានវិជ្ជាជីវៈចិញ្ចឹមជីវិត ដែលសព្វថ្ងៃមានស្ត្រី និងនារីកំពុងរៀនកាត់ដេរ សម្អាងការ តម្បាញក្រមា ជាង៣០នាក់។ នៅក្នុងឱកាសនោះដែរ បវរកញ្ញាពិភពលោក ឯកឧត្តម ទៀង ថៃ និងលោកជំទាវ វ៉ាន់ លុយ ក៏បានចែកជូននូវថវិកាមួយចំនួនដល់កុមារ និងស្ត្រីៗ ដែលកំពុងស្នាក់នៅធ្វើការងារនៅក្នុង មជ្ឈមណ្ឌលអភិវឌ្ឍន៍ស្រី្តខេត្តកំពង់ឆ្នាំងនេះផងដែរ៕
ចែករំលែកព័តមាននេះ