ខេត្តសៀមរាប ៖ បើតាមការបញ្ជាក់ពីកម្លាំងសមត្ថកិច្ចនគរបាលជំនាញបានឱ្យដឹងថា ករណីគ្រោះថ្នាក់ចរាចរណ៍ រវាងរថយន្តបង្កបើកបរផ្លូវត្រង់ពីត្បូងទៅជើង និងម៉ូតូបើកបរស្របទិសគ្នាបម្រុងបត់ត្រូវបានរថយន្តបុកពេញទំហឹង បណ្តាលឱ្យគ្រោះថ្នាក់ធ្ងន់ស្រាល៣នាក់ រួចបើករត់គេចខ្លួនបាត់បង្កឱ្យមានការភ្ញាក់ផ្អើលពេញភូមិ។ ហេតុការគ្រោះថ្នាកចរាចរណ៍បានកើតឡើងនៅថ្ងៃអាទិត្យ ៨រោច ខែចេត្រ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី០៨ ខែមេសា វេលាម៉ោង១៥ និង៤០នាទីរសៀល មានករណីគ្រោះថ្នាក់ចរាចរណ៍នៅលើដងផ្លូវជាតិលេខ៦៨ ចន្លោះបង្គោលគីឡូម៉ែត្រ៣១-៣២ ស្ថិតក្នុងស្រុកស្រីស្នំ ខេត្តសៀមរាប។
បើតាមប្រភពពីសមត្ថកិច្ចនគរបាល ស្រុកស្រីស្នំបានប្រាប់ឱ្យដឹងថា ជនរងគ្រោះទាំង៣នាក់មាន ឈ្មោះ សួក ម៉ាប់ ភេទប្រុស អាយុ១៨ឆ្នាំ មុខរបរធ្វើស្រែ(របួសធ្ងន់) ជាអ្នកបើកបរម៉ូតូម៉ាក suzu kinex ពណ៌ត្រួយចេកខ្មៅ គ្មានស្លាកលេខ។ ចំណែក អ្នករួមដំណើរចំនួន២នាក់ មានឈ្មោះ យើន វ៉ាំហឿ ភេទប្រុស អាយុ១៥ឆ្នាំ មុខរបរធ្វើស្រែ (របួសស្រាល) និងឈ្មោះ ឈិន ឈឿង ភេទប្រុស អាយុ២២ឆ្នាំ មុខរបរធ្វើស្រែ(របួសស្រាល)។ ជនរងគ្រោះទាំង០៣នាក់ រស់នៅភូមិតាវង ឃុំពន្លៃ ស្រុកភ្នំស្រុក ខេត្តបន្ទាយមានជ័យ ជាមួយគ្នា។ រីឯអ្នកបើករថយន្តបង្កមិនស្គាល់អត្តសញ្ញាណបើកបររថយន្តម៉ាក ហាយឡែនឌ័រ ពណ៌ស គ្មានស្លាកលេខ បានគេចខ្លួនបាត់។
ប្រភពបានបន្តថា ក្រោយពេលកើតហេតុ កម្លាំងជំនាញបានចុះដល់កន្លែងកើតហេតុធ្វើការវាស់វែង រួចបានយកម៉ូតូជនរងគ្រោះ មករក្សាទុកនៅអធិការដ្ឋាន នគរបាលស្រុក ដើម្បីស្វែងរករថយន្តបង្កមកអនុវត្តទៅតាមនីតិវិធីបន្ត។ បច្ចុប្បន្នជនរងគ្រោះទាំង៣នាក់ ក្នុងនោះ២នាក់ កំពុងសម្រាកព្យាបាលនៅមន្ទីរពេទ្យបង្អែកស្រុកស្រីស្នំ ចំណែកជនរងគ្រោះដែលជាអ្នកបើកបរម៉ូតូរបួសធ្ងន់ ត្រូវបានកម្លាំងជំនាញបញ្ជូនមកកាន់មន្ទីរពេទ្យបង្អែកខេត្តសៀមរាប៕
ចែករំលែកព័តមាននេះ