ខេត្តកំពង់ឆ្នាំង ៖ « ដើម្បីលើកកម្ពស់ផលិតផលខ្មែរ គឺត្រូវផ្ដើមពីយើងទាំងអស់គ្នា។ សូមបងប្អូនប្រជាពលរដ្ឋទូទាំងប្រទេសចូលរួមប្រើប្រាស់ផលិតផលក្នុងស្រុកទាំងអស់គ្នា ដើម្បីផ្ដល់ការងារដល់កូនខ្មែរ បង្កើតប្រាក់ចំណូលដល់គ្រួសារ និងកាត់បន្ថយការនាំចូលផលិតផលពីក្រៅប្រទេស »…
ខេត្តកំពង់ឆ្នាំង ៖ « ដើម្បីលើកកម្ពស់ផលិតផលខ្មែរ គឺត្រូវផ្ដើមពីយើងទាំងអស់គ្នា។ សូមបងប្អូនប្រជាពលរដ្ឋទូទាំងប្រទេសចូលរួមប្រើប្រាស់ផលិតផលក្នុងស្រុកទាំងអស់គ្នា ដើម្បីផ្ដល់ការងារដល់កូនខ្មែរ បង្កើតប្រាក់ចំណូលដល់គ្រួសារ និងកាត់បន្ថយការនាំចូលផលិតផលពីក្រៅប្រទេស » ។
នេះជាការអំពាវនាវរបស់លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មការជាតិជំរុញចលនាភូមិ១ ផលិតផល១ ដែលបានថ្លែងក្នុងឱកាសសម្ពោធដាក់ឲ្យប្រើប្រាស់ស្ថានីយចំណតរថយន្ដមិត្តភាពកម្ពុជា-ជប៉ុន ខេត្តកំពង់ឆ្នាំង និងទិវាលើកកម្ពស់ការប្រើប្រាស់ផលិតផលខ្មែរលើកទី១ យុទ្ធនាការទិញផលិតផលខ្មែរ រដូវកាលទី៣ ដែលរៀបចំឡើងកាលពីថ្ងៃទី៥ មេសា កន្លងមក នៅភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ។
លោកឧបនាយករដ្ឋមន្ត្រីបានបន្តថា ក្នុងនាមក្រុមប្រឹក្សាស្ដារ អភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មការជាតិជំរុញចលនាភូមិ១ ផលិតផល១ លោកសូមអំពាវនាវដល់បងប្អូនប្រជាពលរដ្ឋទូទាំងប្រទេស សូមចូលរួមការប្រើប្រាស់នូវផលិតផលរបស់ខ្មែរ ព្រោះថាការប្រើប្រាស់ផលិតផលខ្មែរ គឺដូចជួយការងារដល់ប្រជាពលរដ្ឋខ្មែរគ្រប់រូបឱ្យមានការងារធ្វើ និងកាត់បន្ថយភាពក្រីក្ររបស់ពួកគាត់ផងដែរ ។ តាមរយៈទិសដៅខាងលើនេះ យើងអាចពង្រឹងការប្រកួតប្រជែងផលិតផលក្នុងស្រុកជាមួយទំនិញមិនចាំបាច់មួយចំនួន ដែលនាំចូលពីក្រៅប្រទេស ។ ការចំណាយហួសកម្រិតរបស់យើងលើទីផ្សារបរទេស នឹងអាចកាត់បន្ថយជាបន្តបន្ទាប់ តាមរយៈផលិតផលខ្មែរ ភូមិ១ ផលិតផល១ ។ ជាបទពិសោធន៍រយៈកាលកន្លងទៅបានបង្ហាញថា ផលិតផលខ្មែរ ភូមិ១ ផលិតផល១ នឹងមានឥទ្ធិពលជាវិជ្ជមានដល់ការអភិវឌ្ឍសេដ្ឋកិច្ចជនបទជាបន្តបន្ទាប់ និងលើកកម្ពស់ជីវភាពប្រជាពលរដ្ឋខ្មែរឲ្យកាន់តែប្រសើរឡើងថែមទៀត ។
នៅក្នុងឱកាសនោះផងដែរ លោក ឈួរ ច័ន្ទឌឿន អភិបាលខេត្ត បានលើកឡើងពីការសម្ពោធដាក់ឲ្យប្រើប្រាស់នូវស្ថានីយចំណតរថយន្តនៅទីនេះ គឺជាសមិទ្ធផលថ្មីមួយទៀតសម្រាប់ខេត្តកំពង់ឆ្នាំង ។
លោកបន្ដថា ៖« ស្ថានីយថ្មីនេះ នឹងបង្កឲ្យប្រជាពលរដ្ឋមានការងារធ្វើ តាមរយៈការតាំងលក់នូវផលិតផល និងសមិទ្ធផលរបស់ខ្លួនដែលអាចជួយកាត់បន្ថយភាពក្រីក្ររបស់ប្រជាពលរដ្ឋបានមួយកម្រិត » ។
ក្នុងនាមអាជ្ញាធរខេត្ត ក៏ដូចជាប្រជាពលរដ្ឋទូទាំងខេត្ត លោកអភិបាលខេត្តសូមថ្លែងអំណរគុណដល់រាជរដ្ឋាភិបាលកម្ពុជា ក៏ដូចជារាជរដ្ឋាភិបាលជប៉ុន ដែលបានជួយរៀបចំឲ្យមានចំណតស្ថានីយរថយន្តលើទឹកដីខេត្តកំពង់ឆ្នាំង នេះផងដែរ ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានឲ្យដឹងថា ការសាងសង់ចំណតស្ថានីយរថយន្ត កម្ពុជា-ជប៉ុនថ្មីនេះ បានចំណាយទឹកប្រាក់ជាង៤៤ម៉ឺនដុល្លារ នៅលើផ្ទៃដីសរុបជាង៥.៦០០ម៉ែត្រការ៉េ ដោយចាប់ផ្តើមសាងសង់នៅថ្ងៃទី៧ ខែមីនា ឆ្នាំ២០១៧ និងបញ្ចប់ការសាងសង់នៅថ្ងៃទី៨ ខែកុម្ភៈ ឆ្នាំ២០១៨ ដែលមានរយៈពេលសាងសង់១១ខែ ។
លោករដ្ឋមន្ត្រីក្រសួងពាណិជ្ជកម្មបានបញ្ជាក់ថា សំណង់អគារស្ថានីយថ្មីនេះ សង់ឡើងតាមរចនាបថខ្មែរ មានស្តង់ដាអន្តរជាតិ មានឈ្មោះថា ស្ថានីយចំណតរថយន្តមិត្តភាព កម្ពុជា-ជប៉ុន ខេត្តកំពង់ឆ្នាំង ។
លោកបានបង្ហាញជំនឿដោយសុទិដ្ឋិនិយមថា ៖« វត្តមានស្ថានីយចំណតរថយន្តមិត្តភាពកម្ពុជា-ជប៉ុន ខេត្តកំពង់ឆ្នាំងនេះ នឹងជួយពង្រឹងសេដ្ឋកិច្ច និងហេដ្ឋារចនាសម្ព័ន្ធខេត្ត ព្រមទាំងបង្កើតមុខរបរ និងប្រាក់ចំណូលបន្ថែមដល់ប្រជាជនក្នុងមូលដ្ឋាន ។ លើសពីនេះ ក៏នឹងជួយលើកកម្ពស់វិស័យទេសចរណ៍ តាមរយៈការបម្រើសេវាកម្មម្ហូបអាហារ ការលក់វត្ថុអនុស្សាវរីយ៍ ឬផលិតផលប្រចាំភូមិ និងតំបន់ថែមទៀត » ។
គួរកត់សម្គាល់ថា យុទ្ធនាការទិញផលិតផលខ្មែរ រដូវកាលទី៣នេះ នឹងចាប់ផ្តើមពីខេត្តកំពង់ឆ្នាំង បន្តទៅកាន់ខេត្តបន្ទាយមានជ័យ ព្រៃវែង កោះកុង និងរាជធានីភ្នំពេញ ដើម្បីទាក់ទាញប្រជាពលរដ្ឋខ្មែរ ឲ្យងាកមកគាំទ្រ និងប្រើប្រាស់ទំនិញក្នុងស្រុកកាន់តែច្រើន សំដៅកាត់បន្ថយការនាំចូលទំនិញពីបរទេស ។
សម្រាប់ពិព័រណ៍ខេត្តកំពង់ឆ្នាំង ក៏ចូលរួមពីផលិតករ អាជីវករ សមាគម អង្គការនានា និងក្រុមហ៊ុនចំនួន៦៩ ដែលមានស្តង់សរុប៧៧ស្តង់ មានដាក់លក់ផលិតផលកសិ-ពាណិជ្ជកម្ម សិប្បកម្ម គ្រឿងសំណង់ វត្ថុអនុស្សាវរីយ៍ ម្ហូបអាហារ និងភេសជ្ជៈ ផលិតផលសុខភាព និងសម្រស់ សេវាទេសចរណ៍ និងអប់រំ ព្រមទាំងមានរៀបចំសិក្ខាសាលា និងវេទិកាជំនួបពិគ្រោះយោបល់រវាងអ្នកលក់ និងអ្នកទិញផងដែរ ៕
ចែករំលែកព័តមាននេះ