ខេត្តព្រៃវែង ៖ ក្រុមក្មេងស្ទាវពីរក្រុមកាប់ចាក់គ្នាផ្អើលវង់រាំក្នុងកម្មវិធីរៀបអាពាហ៍ពិពាហ៍មួយ ខណៈមួយក្រុមជាភ្ញៀវខាងស្រី និងមួយក្រុមទៀតជាភ្ញៀវខាងប្រុស។ ហេតុការណ៍នេះបានបង្កការ ភ្ញាក់ផ្អើលនៅថ្ងៃទី៨ ខែមេសា ឆ្នាំ២០១៨នេះ វេលាម៉ោង១…
ខេត្តព្រៃវែង ៖ ក្រុមក្មេងស្ទាវពីរក្រុមកាប់ចាក់គ្នាផ្អើលវង់រាំក្នុងកម្មវិធីរៀបអាពាហ៍ពិពាហ៍មួយ ខណៈមួយក្រុមជាភ្ញៀវខាងស្រី និងមួយក្រុមទៀតជាភ្ញៀវខាងប្រុស។ ហេតុការណ៍នេះបានបង្កការ ភ្ញាក់ផ្អើលនៅថ្ងៃទី៨ ខែមេសា ឆ្នាំ២០១៨នេះ វេលាម៉ោង១ និង៣០នាទីរសៀល នៅចំណុចផ្ទះ ពិធីអាពាហ៍ពិពាហ៍កូនស្រីរបស់ឈ្មោះ ប៊ិន វី ភេទប្រុស អាយុ៤៤ឆ្នាំ នៅភូមិងែកងក ឃុំបន្ទាយចក្រី ស្រុកព្រះស្ដេច ខេត្តព្រៃវែង។ បើតាមសមត្ថកិច្ចស្រុកព្រះស្តេចបានឱ្យដឹងថា ករណីក្រុមក្មេងស្ទាវ កាប់ចាក់គ្នានេះកើតឡើងគឺបណ្តាលមកពីក្រុមទាំងពីរមានទំនាស់ពាក្យសម្តីគ្នានៅក្នុងវង់រាំ។
ហើយក៏បណ្តាលឲ្យក្រុមទាំងពីរវាយតប់គ្នារហូតដល់ភ្ញៀវខាងកូនប្រុសបានទាញបានកូនកាំបិតហាន់បន្លែចាក់ទៅលើភ្ញៀវខាងកូនស្រីឈ្មោះ ទូក ឌឿ ភេទប្រុស អាយុ២៦ឆ្នាំនៅភូមិងែកងក ឃុំបន្ទាយចក្រី ស្រុកព្រះស្ដេច ឱ្យរងរបួសត្រង់កំភួនដៃខាងឆ្វេងធ្ងន់ធ្ងរ ហើយក៏ត្រូវបញ្ជូនទៅមន្ទីរពេទ្យនៃប្រទេស វៀតណាម។ សមត្ថកិច្ចបានបន្តថា ក្រុមវាយតប់គ្នាទាំងពីរ មួយក្រុមនៅភូមិងែកងក ឃុំបន្ទាយចក្រី ស្រុកព្រះស្តេច(ភ្ញៀវខាងស្រី )និងមួយក្រុមទៀត ភូមិផុត ឃុំព្រះស្ដេច ស្រុកព្រះស្តេច(ភ្ញៀវខាងប្រុស)។
ក្រោយពីបង្កភាពចលាចល សមត្ថកិច្ចបានចុះទៅចាប់ខ្លួនបានជនសង្ស័យចំនួ៤នាក់ ទៅអធិការដ្ឋាននគរបាលស្រុកព្រះស្ដេច ដែលក្នុងនោះ ១.ឈ្មោះ គង់ គីម(ហៅម៉ិ) ភេទប្រុស អាយុ២៥ឆ្នាំ នៅភូមិផុត ឃុំព្រះស្ដេច ស្រុកព្រះស្តេច ២.ឈ្មោះ គង់ ជៃ(ហៅ ទិត្យ) ភេទប្រុស អាយុ២៥ឆ្នាំ នៅភូមិឫស្សីទន្លេ ឃុំព្រះស្ដេច ស្រុកព្រះស្តេច ៣.ឈ្មោះ មិន គឹមសាន់(ហៅហ៊ៅ) ភេទប្រុស អាយុ២១ឆ្នាំ នៅភូមិផុត ឃុំព្រះស្ដេច ស្រុកព្រះស្តេច និងទី៤.ឈ្មោះ អ៊ីន អុល ភេទប្រុស អាយុ២៨ឆ្នាំ នៅភូមិផុត ឃុំព្រះស្ដេច ស្រុកព្រះស្តេច។ បច្ចុប្បន្នសមត្ថកិច្ចកំពុងកសាងសំណុំរឿង ដើម្បីចាត់ការតាមផ្លូវច្បាប់៕
ចែករំលែកព័តមាននេះ