ខេត្តឧត្តរមានជ័យ ៖ លោក ថៃ នរក្សសត្យា រដ្ឋលេខាធិកាតំណាងដ៏ខ្ពង់ខ្ពស់លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានដឹកនាំគណៈប្រតិភូមួយក្រុមអញ្ជើញចុះសាកសួរសុខទុក្ខប៉ូលិសការពារព្រំដែនគោកកម្ពុជា-ថៃក្នុងកងវរៈលេខ៩០៥ ដោយមានការចូលរួមពីលោកឧត្តមសេនីយ៍ត្រី ហង្ស បូ ស្នងការងទទួលកិច្ចការព្រំដែន លោកមេបញ្ជាការ លោកមេបញ្ជាការង ពលប៉ូលិសជាច្រើនរូបទៀតកាលពីព្រឹកថ្ងៃទី៧ ខែមេសា ឆ្នាំ២០១៨ ស្ថិតនៅក្នុងទីបញ្ជាការកងវរៈ ក្នុងភូមិត្រពាំងតាវ ស្រុកអន្លង់វែង ខេត្តឧត្តរមានជ័យ ។
លោកវរៈសេនីយ៍ឯក ស៊ុ សារឿន មេបញ្ជាការកងវរៈសេនាតូចលេខ៩០៥ប៉ូលិសការពារព្រំដែនគោកកម្ពុជា ថៃបានឡើងអាននូវរបាយការណ៍ជូនគណៈប្រតិភូ កម្លាំងប៉ូលិសចំនួនរួម១៦០នាក់ដែលកំពុងឈរជើងការពារតាមខ្សែបន្ទាត់ព្រំដែនមានប្រវែង១១២គីឡូម៉ែត្រ មានប៉ុស្តិ៍ឈរជើងចំនួន៥ខាងកើតជាប់ព្រំប្រទល់ខេត្តព្រះវិហារខាងលិចជាប់នឹងប៉ូលិសការពារព្រំដែនគោកកងវរៈលេខ៧០២ ។
លោកវរៈសេនីយ៍ឯកបន្តថា តាមខ្សែបន្ទាត់ព្រំដែននាពេលនេះមានសភាពស្ងប់ស្ងាត់ល្អតែទោះជាបែបណារក៏ដោយកម្លាំងប៉ូលិសនៅតែមានស្មារតីប្រុងប្រយ័ត្នរាល់បញ្ហាដែលកើតមាននៅក្នុងភូមិសាស្ត្រឈរជើងមិនអាចធ្វេសប្រហែសដើរល្បាតជាប្រចាំ និងចូលរួមក្រុមការងារវាស់វែងរុករកបង្គោលសីម៉ានៅក្នុងតំបន់ត្រូវបានបញ្ចប់លើសពីនោះការពាររត់ពន្ធមនុស្ស ពលករឆ្លងដែន ឬទំនិញ គ្រឿងញៀនផ្សេងដោយខុសច្បាប់ផងដែរ ៕
ចែករំលែកព័តមាននេះ