ខេត្តកំពង់ឆ្នាំង ៖ អាវុធខ្លីចំនួន៣ដើម រួមនឹងគ្រាប់មួយចំនួនត្រូវបានជាងសំណង់ប្រទះឃើញ កាលពីរសៀលថ្ងៃទី០៧ ខែមេសា ឆ្នាំ២០១៨ ខណៈដែលក្រុមជាងទាំងនោះ ជីកដីសង់លំនៅដ្ឋានឱ្យគេ ក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ។
សមត្ថកិច្ចនគរបាលសង្កាត់កំពង់ឆ្នាំង បានឱ្យដឹងថា មេជាងសំណង់ឈ្មោះ ប៉ុក ឈិន ភេទប្រុស អាយុ៥២ឆ្នាំ មានទីលំនៅភូមិស្រួស ឃុំបឹងព្រីង ស្រុកថ្មគោល ខេត្តបាត់ដំបង បានស៊ីឈ្នួលធ្វើផ្ទះឱ្យប្រជាពលរដ្ឋនៅភូមិកណ្តាល សង្កាត់កំពង់ឆ្នាំង ។ ខណៈពេលកំពុងជីកដីសង់ផ្ទះក៏ប្រទះឃើញហឹបដែក១ស្មានថា ជាកំណប់មាសប្រាក់ក៏យកទៅគាស់មើល ស្រាប់តែឃើញអាវុធខ្លី៣ដើម និងគ្រាប់សរុប៧៨គ្រាប់ រួមនឹងបង់ចំនួន២ផងដែរ ។ ហើយអាវុធខ្លី និងគ្រាប់ទាំងនោះរួមមាន អាវុធខ្លីធុន (រ៉ូឡូ) ៤អ៊ីញ មានគ្រាប់២៣គ្រាប់, អាវុធខ្លីម៉ាក ( អ៊ែកស្តាល់) មានគ្រាប់ចំនួន៥៥គ្រាប់, បង់ចំនួន0២ និងអាវុធខ្លីម៉ាក (ប៉េអាកុល) គ្មានគ្រាប់ ។
សមត្ថកិច្ចបញ្ជាក់ថា អាវុធទាំង៣ដើមនេះមានគុណភាពមធ្យមអាចប្រមាណ៧០% នៅអាចប្រើប្រាស់បាន ហើយអាវុធទាំងនេះ អាចកប់ចោលកាលពីសម័យសង្គ្រាម ។
សមត្ថកិច្ចនគរបាលមូលដ្ឋានបានទទួលយកអាវុធ និងគ្រាប់ទាំងនោះពីមេជាងសំណង់ ដើម្បីយកទៅរក្សាទុកជាបណ្តោះអាសន្ន និងរៀបចំឯកសារបញ្ជូនបន្តទៅស្នងការដ្ឋាន ដើម្បីចាត់ការបន្ត៕
ចែករំលែកព័តមាននេះ