ខេត្តបន្ទាយមានជ័យ ៖ បុរសជាជាងសំណង់ខាងរៀបការ៉ូម្នាក់ត្រូវម៉ូទ័រកាត់ការ៉ូ កាត់ដាច់បំពង់.កខាងឆ្វេង បណ្តាលហូរឈាមស្លាប់ភ្លាមៗនៅក្នុងបន្ទប់ទឹក ហេតុការណ៍នេះបង្កឱ្យមានភ្ញាក់ផ្អើលកាលពីម៉ោងប្រហែល5ល្ងាច ថ្ងៃទី7 ខែមេសា ឆ្នាំ2018 ស្ថិតនៅភូមិមិត្តភាព សង្កាត់និងក្រុងប៉ោយប៉ែត។
ជនរងគ្រោះខាងលើឈ្មោះ ឌឿន ចយ ភេទប្រុស អាយុ36ឆ្នាំ ជាកម្មករសំណង់ ស្នាក់នៅភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត និងមានស្រុកកំណើតនៅភូមិបឹងរាំង ឃុំភ្នំតូច ស្រុកមង្គលបូរី ខេត្តបន្ទាយមានជ័យ។
តាមសម្តីបុរសឈ្មោះម៉ៃរ៉ូ ស្ថិតនៅកន្លែងកើតហេតុនិយាយថា មុនកើតហេតុខ្លួនកំពុងលាយស៊ីម៉ង់ត៍នៅខាងមុខផ្ទះ ស្រាប់តែឮសម្លេងប្រាវក៏ស្ទុះទៅមើល ដឹងអីឃើញជនរងគ្រោះហូរឈាមដោយដកចង្កាមាន់។ ដំបូងជនរងគ្រោះដួលអង្គុយផ្អែកជញ្ជាំង លុះខ្លួនភ័យពេករវល់ចុចទូរស័ព្ទរាយការណ៍ទៅមេការ ហើយត្រឡប់ទៅមើលម្តងទៀត ស្រាប់តែឃើញជនរងគ្រោះដេកផ្ងារពោះស្លាប់បាត់ទៅហើយ ពេលនោះម៉ូទ័រកាត់ការ៉ូនោះរលត់លែងដំណើការ ដោយខ្លាចមានបញ្ហាដល់អ្នកចេញ-ចូលទៅមើល ខ្លួនក៏ដកឌុយម៉ូទ័រដោតចេញពីព្រីនភ្លើងតែម្តង។
ដោយឡែកតាមសម្តីមេការសំណង់ឈ្មោះ ហុន បារាំង ភេទប្រុស អាយុ36ឆ្នាំ មានទីលំនៅក្នុងភូមិ-ឃុំជាមួយជនរងគ្រោះបានប្រាប់ថា ជនរងគ្រោះបានមកធ្វើការនៅកន្លែងកើតហេតុជាង10ថ្ងៃមកហើយ គឺធ្វើជាមួយកម្មករម្នាក់ទៀតឈ្មោះ ម៉ៃរ៉ូ ។ ចំណែករូបគាត់រវល់មើលការខុសត្រូវកន្លែងផ្សេងទៀត។
ក្រោយពេលកើតហេតុនគរបាលជំនាញមកពីស្នងការដ្ឋាននគរបាលខេត្តសហការជាមួយនគរបាលក្រុងប៉ោយប៉ែត អាវុធហត្ថក្រុង បានចុះត្រួតពិនិត្យ ហើយបញ្ជាក់ថា ជនងគ្រោះស្លាប់ដោយម៉ូទ័រមែន ពុំមែនជាអំពើឃាតកម្មទេ។ ដោយឡែកសមត្ថកិច្ចជំនាញបញ្ជាក់ថា ជនរងគ្រោះមានស្នាមរបួសដាច់ចំណុច.កខាងឆ្វេងប្រវែង13សង់ទីម៉ែត្រ ដោយសង្ស័យថា ជនរងគ្រោះខណៈកំពុងកាន់ម៉ូទ័រកាត់ការ៉ូនោះ ក៏រអិលជើងត្រូវម៉ូទ័រដែលនៅដៃខាងស្តាំងមុតចំ.ក បណ្តាលឲ្យហូរឈាមស្លាប់តែម្តង។ ក្រោយពេលពិនិត្យរួច សពជនរងគ្រោះត្រូវបានសមត្ថកិច្ចប្រគល់ឲ្យសាច់ញាតិដឹកទៅលំនៅដ្ឋាន ដើម្បីធ្វើបុណ្យតាមប្រពៃណី៕
ចែករំលែកព័តមាននេះ