ខេត្តព្រៃវែង ៖ យុវជនម្នាក់បានឆបោកម៉ូតូអ្នកស្គាល់គ្នានៅស្រុកបាភ្នំ តាំងពីថ្ងៃ២៣ ខែមីនា ឆ្នាំ២០១៨ ហើយត្រូវបានម្ចាស់គេតាមរកឃើញនៅរាជធានីភ្នំពេញ ហើយចាប់បញ្ជូនខ្លួនមកឲ្យសមត្ថកិច្ចចាត់ការតាមផ្លូវច្បាប់នៅស្រុកបាភ្នំវិញ នាថ្ងៃទី០៥ ខែមេសា ឆ្នាំ២០១៨ ។
បើតាមរបាយការណ៍របស់សមត្ថកិច្ចបានឱ្យដឹងថា កាលពីវេលាម៉ោង១៣និង៤៥នាទី ថ្ងៃទី២៧ ខែមីនា ឆ្នាំ២០១៨ ប៉ុស្ដិ៍នគរបាលរដ្ឋបាលជើងភ្នំ បានទទួលពាក្យបណ្ដឹងមួយច្បាប់ពីឈ្មោះ សន សុង ភេទប្រុស អាយុ៤៥ឆ្នាំ ភូមិស្ដៅកោង ឃុំស្ពឺ(ក) ស្រុកបាភ្នំ ខេត្តព្រៃវែងប្ដឹងទៅលើឈ្មោះ អឿន អាម៉ី ភេទប្រុស អាយុ១៨ឆ្នាំ ភូមិឃុំជាមួយគ្នា បានឆបោកម៉ូតូម៉ាក C១២៥ ពណ៌ខ្មៅ ស៊េរី២០១៦ ពាក់ផ្លាកលេខ ព្រៃវែង ១J-២៣១៣ ពីកូនរបស់គាត់ឈ្មោះ សុង ណូវែល ភេទប្រុស អាយុ១៨ឆ្នាំ កាលពីវេលាម៉ោងប្រហែល០១រសៀល ថ្ងៃទី២៣ ខែមីនា ឆ្នាំ២០១៨ នៅចំណុចផ្ទះឈ្មោះ សំ ណាត ភេទប្រុស អាយុ៤៥ឆ្នាំ ភូមិរោងដំរី ឃុំជើងភ្នំ ស្រុកបាភ្នំ ខេត្តព្រៃវែង ខណៈពេលដែលកូនរបស់គាត់ចេញពីសាលាទៅទិញហូបបាយនៅផ្ទះរបស់ឈ្មោះ សំ ណាត និងមិត្តភក្តិបីនាក់ទៀត ។
ប្រភពបានបន្តថា ក្រោយពីហូបបាយជាមួយគ្នារួចឈ្មោះ អឿន អាម៉ី បានធ្វើល្បិចខ្ចីទូរស័ព្ទរបស់មិត្តភក្តិពីរនាក់ផ្សេងទៀត ដែលហូបបាយជាមួយគ្នា រួចក៏ដើរទៅកញ្ចុះមួយផ្សេងទៀត មួយសន្ទុះក្រោយមកឈ្មោះ អឿន អាមី ក៏ត្រលប់មកខ្ចីម៉ូតូរបស់ឈ្មោះ សុង ណូវែល ដោយប្រើលេសថា មានគេផ្ញើលុយឲ្យតាមវីងត្រូវទៅដកនៅផ្សាឈើកាច់ ហើយឈ្មោះ សុង ណូវែង ក៏ព្រមឲ្យខ្ចី ស្រាប់តែបាត់មិនឃើញត្រឡប់វិញ ទើបនៅថ្ងៃទី២៧ ខែមីនា ឆ្នាំ២០១៨ ឪពុករបស់ឈ្មោះ សុង ណូវែល បានដាក់ពាក្យបណ្តឹង ។
លុះមកដល់ថ្ងៃទី០៤ ខែមេសា ឆ្នាំ២០១៨ ជនរងគ្រោះតាមរកឃើញជនសង្ស័យនៅខណ្ឌសែនសុខ រាជធានីភ្នំពេញ រួចចាប់ខ្លួនយកមកប្រគល់ឲ្យសមត្ដកិច្ចប៉ុស្តិ៍ជើងភ្នំ នៅវេលាម៉ោង១០និង៣០នាទី ថ្ងៃទី០៥ ខែមេសា ឆ្នាំ២០១៨ ។ បច្ចុប្បន្ន សមត្ថកិច្ចបានឃាត់ខ្លួនជនសង្ស័យនៅប៉ុស្ដិ៍ជើងភ្នំ ដើម្បីដោះស្រាយតាមច្បាប់ ៕
ចែករំលែកព័តមាននេះ