ខេត្តកណ្តាល ៖ កូនស្រីចិត្តតិរិច្ឆានម្នាក់ បានលើកកាំបិតផ្គាក់កាប់ឪពុកខ្លួនឯងស្លាប់ក្នុងថ្លុកឈាម ខណៈខឹងបាត់លុយ៣.០០០រៀល ពេលត្រលប់មកពីលក់ឆៃថាវវិញ។ ហេតុការណ៍កាប់សម្លាប់ យ៉ាងសាហាវឃោរឃៅនេះបានកើតឡើងនៅថ្ងៃទី០៥ ខែមេសា ឆ្នាំ២០១៨ វេលាម៉ោង៤ និង៣០នាទីល្ងាច នៅចំណុចផ្ទះជនរងគ្រោះឈ្មោះ ឯម សារឿន ភូមិល្វាសរ កណ្តាល ឃុំល្វាសរ ស្រុកល្វាឯម ខេត្តកណ្តាល។ លោកឧត្តមសេនីយ៍ទោ អ៊ាវ ចំរើន ស្នងការដ្ឋាននគរបាលខេត្តកណ្តាល បានប្រាប់ឲ្យដឹងថា ជនរងគ្រោះម្នាក់ឈ្មោះ ឯម សារឿន ភេទប្រុស អាយុ៦៦ឆ្នាំ ជាតិខ្មែរ មុខរបរកសិករ ទីលំនៅភូមិល្វាសរកណ្តាល ឃុំល្វាសរ ស្រុកល្វាឯមខេត្តកណ្តាល។
ជនសង្ស័យម្នាក់ឈ្មោះ ឃុត ចន្នី ភេទស្រី អាយុ៣៧ឆ្នាំ ជនជាតិខ្មែរ មុខរបរកសិករ ទីលំនៅភូមិល្វាសរកណ្តាល ឃុំល្វាសរ ស្រុកល្វាឯម ខេត្តកណ្តាល។ វត្ថុតាងចាប់យកកាំបិតផ្គាក់ដងខ្លី ដងឫស្សីប្រវែង៦៩ស.ម ផ្លែមានប្រវែង៣១ស.ម។ លោកស្នងការបានបញ្ជាក់ថា នៅថ្ងៃទី០៥ ខែមេសា ឆ្នាំ២០១៨ វេលាម៉ោងប្រហែលម៉ោង២រសៀល ជន សង្ស័យបានត្រលប់មកពីលក់ឆៃថាវ មកដល់ផ្ទះបានរាប់លុយឃើញ ៧០.០០០រៀល ហើយរៀបទុកនៅក្នុងកាបូបស្ពាយ។
បន្ទាប់មកបានដេកអង្រឹងប្រឡែងលេងជាមួយកូនឆ្កែ ដែលមានស្ពាយកាបូបជាប់នឹងខ្លួន។ ប៉ុន្តែមិនបានដេកលក់ទេ លុះមួយស្របក់ក្រោយមក មានអារម្មណ៍ថាសង្ស័យបាត់លុយ ក៏រាប់ម្តងទៀត ឃើញថាលុយខ្លួនបាត់ចំនួន៣.០០០រៀល។ ស្រាប់តែមានកំហឹងក្នុងខ្លួន ចុកពោះ ជួនពេលឪពុកឈ្មោះ ឯម សារឿន បានដើរមកដល់ផ្ទះ អង្គុយលើគ្រែ ហើយសម្លឹងមកកូន ភ្លាមនោះ កូនឈ្មោះ ឃុត ចន្នី បានទាញយកកាំបិត នៅលើគ្រែ មកកាប់ឪពុកត្រូវចំកខាងក្រោយបណ្តាលឲ្យធ្លាក់ពីលើគ្រែស្លាប់ភ្លាមតែម្តង។ ករណីនេះ កម្លាំងជំនាញបានឃាត់ខ្លួនជនសង្ស័យ មកប៉ុស្តិ៍នគរបាលរដ្ឋបាល ល្វាសរ ដើម្បីបន្តចាត់ការតាមនីតិវិធី៕
ចែករំលែកព័តមាននេះ