ខេត្តបន្ទាយមានជ័យ ៖ ក្រោយមានការភ្ញាក់ផ្អើលថា បុរសជាប្តីសម្លាប់ប្រពន្ធហើយអ្នកយកព័ត៌មាន និងអ្នកលេងហ្វេសប៊ុកយកទៅផ្សព្វផ្សាយព្រោងព្រៀតតាមគ្នា ដោយយោងលើការផ្តល់ព័ត៌មានពីលោកវរសេនីយ៌ឯក ធិន ស៊ិនដេត អធិការនគរបាលក្រុងប៉ោយប៉ែត លុះសមត្ថកិច្ចជំនាញបច្ចេកទេសមកពីស្នងការដ្ឋាននគរខេត្តសហការជាមួយនគរបាលក្រុងប៉ោយប៉ែត…
ខេត្តបន្ទាយមានជ័យ ៖ ក្រោយមានការភ្ញាក់ផ្អើលថា បុរសជាប្តីសម្លាប់ប្រពន្ធហើយអ្នកយកព័ត៌មាន និងអ្នកលេងហ្វេសប៊ុកយកទៅផ្សព្វផ្សាយព្រោងព្រៀតតាមគ្នា ដោយយោងលើការផ្តល់ព័ត៌មានពីលោកវរសេនីយ៌ឯក ធិន ស៊ិនដេត អធិការនគរបាលក្រុងប៉ោយប៉ែត លុះសមត្ថកិច្ចជំនាញបច្ចេកទេសមកពីស្នងការដ្ឋាននគរខេត្តសហការជាមួយនគរបាលក្រុងប៉ោយប៉ែត និងគ្រូពេទ្យធ្វើការត្រួតពិនិត្យ និងកោសល្យវិច្ច័យបែរជារកឃើញថា ជនរងគ្រោះស្លាប់ដោយជម្ងឺមិនមែនជាអំពើរឃាតកម្មនោះទេ ។ ករណីខាងលើកើតឡើងកាលពីរសៀលថ្ងៃទី៤ ខែមេសា ឆ្នាំ២០១៨ នៅភូមិក្បាលស្ពាន០១សង្កាត់-ក្រុងប៉ោយប៉ែត ជិតផ្ទះសំណាក់៩៩៩ ។
ជនរងគ្រោះឈ្មោះ ឃិន វណ្ណា អាយុ៣៧ឆ្នាំ ។ ជនរងគ្រោះបានស្លាប់នៅលើផ្ទះឈើតូចមួយ និងដោយមានសេចក្តីរាយការណ៌ពីពលរដ្ឋថា បាត់មិនឃើញប្តីប្រពន្ធគ្រួសារនេះចេញពីផ្ទះទិញម្ហូបអាហារដូចសព្វមួយដង ខណៈសមត្ថកិច្ចចុះពិនិត្យមើល និងបើកមុងស្រាប់តែឃើញជនរងគ្រោះដេកស្លាប់ហើយបុរសជាប្តីដេកឱបសពប្រពន្ធទាំងស្រវឹងជោកជាំសួរលែងដឹងអី ។ ភ្លាមៗដោយសារលោកវរសេនីយ៌ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់អ្នកយកព័ត៌មានទាំងមិនទាន់បានធ្វើកោសល្យវិច្ច័យថា ជាអំពើរឃាតកម្មប្តីសម្លាប់ប្រពន្ធទើបធ្វើឲ្យបុរសជាប្តីរងភាពអាម៉ាស់ និងជាប់បណ្តឹងអាជ្ញា ។
យ៉ាងណាក៏ដោយក្រោយកើតហេតុនៅថ្ងៃទី៥ ខែមេសា ឆ្នាំ២០១៨ នេះសមត្ថកិច្ចជំនាញមកពីស្នងការដ្ឋាននគរបាលខេត្តសហការណ៌ជាមួយនគរបាលក្រុងប៉ោយប៉ែតរួមទាំងគ្រូពេទ្យបានចុះបើកការស៊ើបអង្គេតក្នុងករណីខាងលើយ៉ាងល្អិតល្អន់ទីបំផុតរកឃើញថា ស្ត្រីស្លាប់ដោយជម្ងឺមិនមែនប្តីសម្លាប់ទេ ។ ក្រៅពីការចុះត្រួតពិនិត្យ និងធ្វើកោសល្យវិច្ច័យយ៉ាងល្អិតល្អន់បញ្ជាក់ថា ជនរងគ្រោះស្លាប់ដោយជម្ងឺអ្នកស្រុកដែលរស់នៅជុំវិញកន្លែងកើតហេតុបានចេញមុខបកស្រាយព្រោងព្រៀតប្រាប់សមត្ថកិច្ចថា បុរសជាប្តីរបស់ស្ត្រីរងគ្រោះជាមនុស្សស្អាតស្អំ និងស្រឡាញ់ប្រពន្ធខ្លាំងណាស់រហូតពេលខ្លះបញ្ចុកបាយ និងងូតទឹកឲ្យប្រពន្ធទៀត ។
ជួបសម្ភាសផ្ទាល់មាត់ជាមួយជនសង្ស័យឈ្មោះ អ៊ុក ចាន់សី អាយុ៣៨ឆ្នាំ ជាអ្នករកស៊ីចាប់ម៉ូយដាក់រថយន្តនៅចំណុចរង្វង់មូលច្រកទ្វារអន្តរជាតិប៉ោយប៉ែត មានកូនស្រីម្នាក់ជាចំណងដៃ អាយុ៣ឆ្នាំឈ្មោះ ណង បួ បច្ចុប្បន្នរស់នៅជាមួយបងស្រីបង្កើតនៅឯស្រុកអារញ្ញ ខេត្តស្រះកែវ ប្រទេសថៃ បានអះអាងទាំងទឹកភ្នែកថា មិនបានសម្លាប់ប្រពន្ធដូចការចោទប្រកាន់ទេ ។ ជនសង្ស័យបន្តថា មុនកើតហេតុនៅយប់ថ្ងៃទី០៣ ខែមេសា ឆ្នាំ២០១៨ ប្រពន្ធឈឺឲ្យខ្លួនកោសខ្យល់ឲ្យ និងបន្ទាប់មកលើកប្រពន្ធទៅងូតទឹក និងផ្លាស់សម្លៀកបំពាក់ឲ្យ ។ ក្រោយមកនាងជាប្រពន្ធប្រាប់ថា ឃ្លានផឹកស្រាខ្លួនក៏ទិញស្រាថ្នាំ១លីត្រផឹក២នាក់ប្តីប្រពន្ធលុះម៉ោង៦និង៣០នាទីព្រឹកថ្ងៃទី៤ ខែមេសា ឆ្នាំ២០១៨ ទើបស្លាប់ ។
បុរសខាងលើប្រាប់ថា ក្រោយប្រពន្ធស្លាប់ខ្លួនមិនហ៊ានប្រាប់គេឯងទេសុខចិត្តដេកឱបសពប្រពន្ធដោយអះអាងថា មិនចង់ឲ្យនាងទៅណាឆ្ងាយពីខ្លួន ។ បុរសជាប្តីថា សមត្ថកិច្ចឲ្យទៅអុចធូប និងបើកមឈូសមើលមុខប្រពន្ធទាំងបង្ហូរទឹកភ្នែកថើបសពក្នុងមឈូសនៅវត្តឃោស្ថារាម ហៅវត្តត្រាច ប៉ុន្តែក្រោយមកសមត្ថកិច្ចយកត្រឡប់ទៅអធិការដ្ឋាននគរបាលក្រុងវិញដោយលោក ព្រំ ពិសិដ្ឋ អធិការរងទទួលបន្ទុកព្រហ្មទណ្ឌក្រុងប៉ោយប៉ែតអះអាងថា រងចាំគោលការណ៌ពីលោកព្រះរាជអាជ្ញាសិនបើឲ្យបញ្ជូនគឺបញ្ជូនបើឲ្យដោះលែងគឺដោះលែង ៕
ចែករំលែកព័តមាននេះ