ខេត្តបន្ទាយមានជ័យ ៖ សម្ភារសំណង់ ពិសេសគ្រឿងបរិក្ខារអគ្គិសនី ដែលផ្ទុកក្នុងកុងតឺន័រចំនួន៦របស់ក្រុមហ៊ុនម៉ៅការសំណង់មួយ ត្រូវបានព្រះអគ្គីលេបត្របាក់ក្លាយជាផេះផង់ និងបង្កការភ្ញាក់ផ្អើលកាលពីម៉ោងជាង៥ល្ងាចថ្ងៃទី៣ មេសា នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ចំណុចដីរបស់ក្រុមហ៊ុនកាស៊ីណូអតីតផ្កាយ៥ ដែលបច្ចុប្បន្នកំពុងដំណើរការសាងសង់អគារធំៗ ដែលម៉ៅការឱ្យក្រុមហ៊ុន R&ZT របស់ថៃ ។
មុនពេលមានការផ្អើលឆោឡោ ដំបូងមានផ្សែងខ្មួលខ្មាញ់ បានហុយទ្រលោមទៅលើអាកាស បន្ទាប់មកគេឃើញរថយន្តពន្លត់អគ្គិភ័យរបស់ក្រុមហ៊ុនកាស៊ីណូ៤ ទៅ៥គ្រឿង បានចេញទៅបាញ់ពន្លត់ ក្នុងនោះមានទាំងសមត្ថកិច្ចជំនាញពាក់ព័ន្ធចុះទៅកន្លែងកើតហេតុផងដែរ ។ ទោះជាករណីឆេះនេះ ត្រូវបានជួយបាញ់ពន្លត់ពីរថយន្តអគ្គិភ័យច្រើនគ្រឿងក្តី តែមិនអាចទប់ស្កាត់ ឬពន្លត់ភ្លើងបានភ្លាមៗទេ ព្រោះសម្ភារនៅតាមទូកុងតឺន័រទាំងនោះ បានឆេះងំបាញ់ទឹកមិនចូលដល់ខាងក្នុង ។ ទោះជាបែបណា ករណីនេះមិនឆេះរាលដាលដល់លំនៅឋានអ្នកស្រុកនោះទេ ព្រោះទីនោះជាដីរបស់ក្រុមហ៊ុនកាស៊ីណូគ្មានផ្ទះណាសង់នៅជិតឡើយ ។
ជុំវិញករណីខាងលើ ខាងក្រុមហ៊ុនម៉ៅការសំណង់ R&ZT មិនអាចទាក់ទងសុំការបំភ្លឺបានទេ ដោយសន្តិសុខយាមនៅទីនោះនិយាយថា មិនហ៊ានឱ្យជួបព្រោះខ្លាចខាងក្រុមហ៊ុនរករឿង ។ នៅពេលភ្នាក់ងារកោះសន្តិភាព សាកព្រលយសំដីលេងថា ទំហំខូចខាតអាចអស់ទឹកប្រាក់រាប់ម៉ឺនបាតទេ សន្តិសុខដែលយាមនៅទីនោះ និយាយថារាប់ម៉ឺនបាតម៉េច? គឺរាប់ម៉ឺនដុល្លារទៅវិញទេ ។
លោកវរសេនីយ៍ត្រី នួន នីណារ៉ូ មេបញ្ជាការអាវុធហត្ថក្រុងប៉ោយប៉ែតប្រាប់តាមទូរស័ព្ទនៅរសៀលថ្ងៃទី៤ មេសា ថាករណីឆេះខាងលើ ខាងក្រុមហ៊ុនគេមិនទាន់ប្រាប់ពីទំហំខូចខាតលម្អិតនៅឡើយទេ ។ ដោយឡែកលោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់តាមទូរស័ព្ទហាក់មិនច្បាស់ការថា ករណីខាងលើគ្មានអ្វីធំដុំទេ តាមពិតគ្រាន់តែឆេះខ្ទមដែលកម្មករសំណង់ស្នាក់នៅធ្វើការឱ្យក្រុមហ៊ុនតែប៉ុណ្ណោះ ។ តាមពិតជាក់ស្តែងមិនមែនឆេះខ្ទមទេ គឺឆេះសំភារស្តុកទុកក្នុងកុងតឺន័រយ៉ាងពិតប្រាកដ ឆេះសល់តែផេះស្មោះ ៕
ចែករំលែកព័តមាននេះ