ខេត្តបន្ទាយមានជ័យ ៖ សេចក្តីរាយការណ៍បឋមឱ្យដឹងថា មានការភ្ញាក់ផ្អើលមួយករណីទៀត នាម៉ោង០៤ និង៥៥នាទីរសៀលថ្ងៃទី០៤ មេសា នេះ ស្ថិតត្រង់ចំណុចភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ដោយសារបុរសម្នាក់កំពុងត្រូវសង្ស័យថា វាយសម្លាប់ប្រពន្ធរបស់ខ្លួន ហើយត្រូវសមត្ថកិច្ចចុះទៅអន្តរាគមន៍ ក៏ប្រទះឃើញបុរសជាប្តីនោះ បានដេកអោបសាកសពប្រពន្ធក្នុងមុង ដោយមានស្ថានភាពស្រវឹងស្រាយ៉ាងជោកជាំ ។
សេចក្តីរាយការណ៍បន្តថា ទោះបីជាយ៉ាងណា ពេលនេះគេមិនទាន់ដឹងពីអត្តសញ្ញាណទាំងស្ត្រីរងគ្រោះ និងបុរសជាប្តីនោះទេ ។ សាកសពស្ត្រីរងគ្រោះជាប្រពន្ធ គឺមានសភាពហើមទៅហើយ ដោយមិនដឹងថា ស្លាប់តាំងពីពេលណាទេ និងមានស្លាកស្នាមហើមជាំខ្មៅពេញផ្ទៃមុខតែម្តង ។
បច្ចុប្បន្ន សមត្ថកិច្ចកំពុងចុះអន្តរាគមន៍នៅកន្លែងកើតហេតុ ដោយមានមនុស្សផ្អើលចោមរោមមើលយ៉ាងកកកុញ ។
គួរបញ្ជាក់ថា គ្រួសារខាងលើ ទើបតែមករស់នៅចំណុចកើតហេតុបានជាងកន្លះខែប៉ុណ្ណោះ ។ អ្នកស្រុកនិយាថា មុនកើតហេតុនេះ បានឮសំឡេងទាំង២នាក់ឈ្លោះគ្នាយ៉ាងខ្លាំង និងក្ឌូងក្ឌាំងពេញផ្ទះទៀតផង តែក៏មិនចាប់អារម្មណ៍ដែរ ។ បើតាមលោកអធិការក្រុងប៉ោយប៉ែតបាននអះអាងថា នេះជាអំពើឃាតកម្ម ប្តីវាយសម្លាប់ប្រពន្ធ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព ។
ចែករំលែកព័តមាននេះ