ខេត្តសៀមរាប ៖ កម្លាំងការិយាល័យប្រឆាំងគ្រឿងញៀនដោយបានការចូលរួមសហការពីកម្លាំងប៉ុស្តិ៍នគរបាលរដ្ឋបាលសង្កាត់ស្លក្រាម និងកម្លាំងប្រជាការពារភូមិ បានចុះបង្ក្រាបករណីរក្សាទុក និងជួញដូរដោយខុសច្បាប់នូវសារធាតុញៀន ឈានដល់ធ្វើការឃាត់ខ្លួនបានជនសង្ស័យ២នាក់ និងវត្ថុតាងគ្រឿងញៀនមួយចំនួន យកមកសួរនាំនៅការិយាល័យជំនាញខេត្ត ដើម្បីរៀបចំកសាងសំណុំបញ្ជូនទៅតុលាការចាត់ការទៅតាមផ្លូវច្បាប់ ។
ហេតុការឃាត់ខ្លួនជនសង្ស័យជួញដូរនោះបានធ្វើឡើងនៅវេលាម៉ោង២២និង២០នាទី ថ្ងៃទី០២ ខែមេសា ឆ្នាំ២០១៨ ស្ថិតនៅចំនុចភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប ។
តាមប្រភពពីសមត្ថកិច្ចខេត្ត បានប្រាប់ថា ជនសង្ស័យទាំង២នាក់មាន ទី១.ឈ្មោះ ម៉ៅ ហ៊ៀង ហៅ ហេង ភេទប្រុស អាយុ៣០ឆ្នាំ មុខរបរបុគ្គលិកដឹកហ្គាសទីលំនៅ ភូមិក្រាំងតាយ៉ង ឃុំក្រាំងតាយ៉ង ស្រុកពាមជរ ខេត្តព្រៃវែង សព្វថ្ងៃស្នាក់នៅភូមិមណ្ឌល៣ សង្កាត់ស្លក្រាម ក្រុងសៀមរាប ខេត្តសៀមរាប (រក្សាទុក និងជួញដូរ) (គ្មានសារធាតុញៀនក្នុងខ្លួន) និងទី២.ឈ្មោះ អ៊ួន សីហា ហៅ កូ ភេទប្រុស ឆ្នាំកំណើត១៩៨៦ មុខរបរបុគ្គលិកដឹកហ្គាស ទីលំនៅភូមិ៤ សង្កាត់អូរឫស្សីទី២ ខណ្ឌ៧មករា រាជធានីភ្នំពេញ សព្វថ្ងៃស្នាក់នៅបន្ទប់ជួលភូមិស្លក្រាម សង្កាត់ស្លក្រាម ក្រុងសៀមរាប ខេត្តសៀមរាប (រក្សាទុក និងជួញដូរ) (មានសារធាតុញៀនក្នុងខ្លួន) ។
បន្ទាប់ពីកម្លាំងជំនាញបានឃាត់ខ្លួនបានជនសង្ស័យ២នាក់រួចមក ក្នុងនោះបានដកហូតវត្ថុតាងរួមមាន ម្សៅកេតាមីន (ខេ) ចំនួន១១កញ្ចប់ ស្មើនឹងទំងន់៣.២ក្រាម (ទំងន់សុទ្ធ) ថ្នាំគ្រាប់កេតាមីន ចំនួន២២គ្រាប់និង១កំណាត់ ស្មើនឹងទំងន់៧.១ក្រាម (ទំងន់សុទ្ធ) ក្រដាសវេរប្រាក់វីងចំនួន៥សន្លឹក ទូរស័ព្ទដៃ ចំនួន៣គ្រឿង និងម៉ូតូចំនួន១គ្រឿង ។ បច្ចុប្បន្ន ជនសង្ស័យទាំង២នាក់ និងវត្ថុតាង ត្រូវបញ្ចូនកម្លាំងជំនាញរៀបចំកសាងសំណុំរឿងបញ្ជូនទៅសាលាដំបូងថ្ងៃទី០៤ ខែមេសា ឆ្នាំ២០១៨ ដើម្បីចាត់ការទៅតាមផ្លូវច្បាប់ ៕
ចែករំលែកព័តមាននេះ