រាជធានីភ្នំពេញ ៖ នារីម្នាក់ និងបុរសម្នាក់ក្នុងចំណោមមិត្តភក្តិប្រុសស្រីប្រាំបីនាក់បានអង្គុយផឹកស៊ីជុំគ្នារហូតដល់ស្រវឹងរៀងខ្លួនក៏បានទាក់សម្តីគ្នារហូតឈានទៅដល់ការវាយតប់គ្នារវាងបុរសនឹងនារីពីរនាក់ខាងលើបង្កឲ្យមានរបួសស្នាមផ្អើលដល់សមត្ថកិច្ចចុះទៅអន្តរាគមន៍ ។ ហេតុការណ៍នេះកើតឡើងកាលពីវេលាម៉ោង៦ល្ងាច ថ្ងៃទី០៣ ខែមេសា ឆ្នាំ២០១៨ ត្រង់ចំណុចតូបទឹកត្នោតជូមួយកន្លែង នៅខាងក្បែរវត្តសំរោងអណ្តែត ស្ថិតក្នុងភូមិច្រេះ សង្កាត់គោកឃ្លាង ខណ្ឌសែនសុខ ។
បើតាមសម្តីពីនារីរងគ្រោះបានឱ្យដឹងថា កាលពីវេលាម៉ោង២រសៀលថ្ងៃកើតហេតុគាត់រួមទាំងមិត្តភក្តិមានគ្នាប្រាំពីរនាក់ក្នុងនេះមានស្រីប្រាំនាក់ និងប្រុសពីរនាក់បានទៅអង្គុយផឹកទឹកត្នោតជូរនៅកន្លែងកើតហេតុខាងលើ ។ មួយស្ទុះក្រោយមកបុរសម្នាក់ក្នុងចំណោមមិត្តភក្តិរបស់គាត់បានទូរស័ព្ទហៅបុរសម្នាក់ទៀតដែលជាជនបង្កទាំងដែលពួកគាត់មិនដែលស្គាល់គ្នាពីមុនមកទេ បានមកអង្គុយផឹកក្នុងវង់ជាមួយគ្នាយ៉ាងសប្បាយរីករាយ ។
លុះដល់វេលាកើតហេតុខណៈពេលស្រវឹងរៀងៗខ្លួនបុរសដែលជាជនបង្កបាននិយាយស្តីលើសលោះមើលងាយដាក់នារីរងគ្រោះរួមទាំងមិត្តភក្តិស្រីប៉ុន្មានអ្នកទៀតទើបធ្វើឲ្យផ្ទុះការឈ្លោះគ្នាផ្អើលពេញតូបលក់ទឹកត្នោតជូររហូតនារីរងគ្រោះទប់កំហឹងមិនបានក៏យកកែវជ័រដាក់ទឹកត្នោតជូរផឹកនោះគប់ទៅលើបុរសដែលជាជនបង្ក បណ្តាលឱ្យបុរសដែលបង្កខឹងក៏បានយកសោម៉ូតូស្ទុះទៅវាយលើនារីរងគ្រោះបណ្តាលឱ្យរងរបួសស្រាលស្នាមកខាងឆ្វេង ។ បន្ទាប់មកនារីរងគ្រោះបានរត់ទៅប្តឹងសមត្ថកិច្ចមូលដ្ឋានហើយសមត្ថកិច្ចមូលដ្ឋានក៏បានចុះមកធ្វើការអន្តរាគមន៍នាំបុរសបង្ក និងនារីរងគ្រោះទៅសាកសួរនាំនៅប៉ុស្តិ៍នគរបាលរដ្ឋបាលគោកឃ្លាំង ។
ក្រោយពេលកើតហេតុនារីគ្រោះមិនបានដាក់ពាក្យបន្តឹងអ្វីនោះទេ គ្រាន់តែចង់ឱ្យជនបង្កសុំទោសមួយមាត់ដើម្បីបញ្ចប់រឿង ហើយបុរសបង្កដឹងពីកំហុសរបស់ខ្លួនក៏បានសុំទោសនារីរងគ្រោះដើម្បីបញ្ចប់រឿងនៅត្រឹមប៉ុស្តិ៍នគរបាលរដ្ឋបាលគោកឃ្លាំង ៕
ចែករំលែកព័តមាននេះ