ខេត្តរតនគិរី ៖ កម្លាំងចំរុះស្រុកអូរយាដាវ បានចុះឃាត់ខ្លួនជនជាតិវៀតណាមចំនួន១០នាក់ និងរឹបអូសបានគោយន្តកែច្នៃចំនួន៣គ្រឿង ខណៈដែលពួកគេធ្វើការឆ្លងដែនដោយខុសច្បាប់ដែលសង្ស័យថា ចូលមកកាប់ឈើ។ ការចុះបង្ក្រាបនេះធ្វើឡើងកាលពីវេលាម៉ោង២រសៀលថ្ងៃទី១ មេសា ស្ថិតនៅត្រង់ចំណុចបង្គោលឡាក់លេខ២៦/២…
ខេត្តរតនគិរី ៖ កម្លាំងចំរុះស្រុកអូរយាដាវ បានចុះឃាត់ខ្លួនជនជាតិវៀតណាមចំនួន១០នាក់ និងរឹបអូសបានគោយន្តកែច្នៃចំនួន៣គ្រឿង ខណៈដែលពួកគេធ្វើការឆ្លងដែនដោយខុសច្បាប់ដែលសង្ស័យថា ចូលមកកាប់ឈើ។ ការចុះបង្ក្រាបនេះធ្វើឡើងកាលពីវេលាម៉ោង២រសៀលថ្ងៃទី១ មេសា ស្ថិតនៅត្រង់ចំណុចបង្គោលឡាក់លេខ២៦/២ ក្នុងភូមិភិៈ ឃុំសេសាន្ត ស្រុកអូរយាដាវ ។
ជនជាតិវៀតណាមដែលឃាត់ខ្លួនបានចំនួន១០នាក់នោះមាន ១-ឈ្មោះ ឌី កុកហាយ ២-ឈ្មោះ តឹង៉ុក ហ្វុង ៣-ឈ្មោះ ថាង សុងកឿន ៤-ឈ្មោះ ដូថាន់ មីន ៥-ឈ្មោះ ហ្វាម វ៉ាន់ថាញ់ ៦-ឈ្មោះ ធឿ វ៉ានតិ ៧-ឈ្មោះ ហ្វៀង វ៉ាន់ឡុង ៨-ឈ្មោះ តឹង ស៊ិនហាយ ៩-ឈ្មោះ ថឹង អាញវ៉ូ និង១០-ឈ្មោះ ហ្វៀន តាងតួន រួមទាំងគោយន្តកែច្នៃចំនួន៣គឿង។
បើតាមប្រភពពីកម្លាំងសមត្ថកិច្ចចុះបង្ក្រាបបានឱ្យដឹងថា ក្រុមការងាចុះបង្ក្រាបនោះបានឃើញជនជាតិវៀតណាមចំនួន១០នាក់ និងគោយន្តកែច្នៃ៣គ្រឿងដែលទុកនៅលើច្រាំងទន្លេសេសាន្ត ថែមទាំងមានទូក កាណូតកំពុងចម្លងមនុស្សទាំង១០នាក់នោះមកត្រើយម្ខាងនៃកម្ពុជា។ ទើបកម្លាំងធ្វើការឃាត់ខ្លួនទាំងមនុស្ស ទាំងគោយន្តកែច្នៃនោះទៀតតែម្តង រួចរាយការណ៍ជូនថ្នាក់លើ។ ក្រោយមកលោកអភិបាលខេត្តបានបញ្ជាឱ្យនាំខ្លួនជនជាតិវៀតណាមទាំង១០នាក់នោះទៅប្រគល់ឱ្យខាងវៀតណាមវិញ ដោយឃាត់រក្សាទុកតែគោយន្តកែច្នៃទាំង៣គ្រឿងប្រគល់ឱ្យផ្នែកជំនាញរដ្ឋបាលព្រៃឈើបកែវ ដើម្បីចាត់ការតាមច្បាប់ព្រៃឈើ។
បើតាមប្រភពបានបង្ហើបថា ក្រុមជនជាតិវៀតណាម និងគោយន្តទាំអស់នោះបំរុងឆ្លងចូលទៅកាប់ និងដឹកជញ្ជូនឈើនៅក្នុងទឹកដីតំបន់ភ្នំអូរយក្សគ្រាក់និងអូរយក្សគ្រឹម ភូមិចង ឃុំញ៉ាង ស្រុកអណ្តូងមាស ដែលនៅជាប់ព្រំប្រទល់ស្រុកតាវែង។ បច្ចុប្បន្នមានក្រុមឈ្មួញមួយក្រុមកំពុងរត់ការ ដើម្បីសំរុកធ្វើសកម្មភាពនាកំឡុងពេលបុណ្យចូលឆ្នាំខ្មែរនេះតែម្តង ប៉ុន្តែដោយសារការនាំចូលនេះ ឆ្លងកាត់ក្នុងទឹកដីស្រុកអូរយាដាវ ទើបកម្លាំងធ្វើការបង្ក្រាបតែម្តង។
តែទោះជាយ៉ាងណាប្រភពផ្លូវការមួយនេះ មិនអាចសុំការបំភ្លឺពីសមត្ថកិច្ចពាក់ព័ន្ធបានទេ ដោយខ្លះឆ្លើយថា មនុស្សដែលឃាត់ខ្លួននោះឱ្យត្រឡប់ទៅវិញ ហើយឯគោយន្តច្នៃប្រគល់ឱ្យជំនាញគេចាត់ការរួចរាល់អស់ហើយ៕
ចែករំលែកព័តមាននេះ