ខេត្តព្រៃវែង ៖ ករណីអគ្គិភ័យមួយបានធ្វើឱ្យស្ត្រីម្នាក់បានស្លាប់ និងផ្ទះល្វែង១ខ្នង ទទឹង៥.២ម៉ែត្រ បណ្ដោយ១៥ម៉ែត្រ ព្រមទាំងទ្រព្យសម្បត្តិមួយចំនួនធំបានឆេះអស់ ខណៈពេលដែលប្តី និងកូនប្រុសពីរនាក់រវល់ទៅឆេងមេង ។…
ខេត្តព្រៃវែង ៖ ករណីអគ្គិភ័យមួយបានធ្វើឱ្យស្ត្រីម្នាក់បានស្លាប់ និងផ្ទះល្វែង១ខ្នង ទទឹង៥.២ម៉ែត្រ បណ្ដោយ១៥ម៉ែត្រ ព្រមទាំងទ្រព្យសម្បត្តិមួយចំនួនធំបានឆេះអស់ ខណៈពេលដែលប្តី និងកូនប្រុសពីរនាក់រវល់ទៅឆេងមេង ។ ហេតុការណ៍ដ៏អាក្រក់នេះបានកើតឡើងកាលពីវេលាម៉ោង០៩និង៤៥នាទីព្រឹក ថ្ងៃទី០៣ ខែមេសា ឆ្នាំ២០១៨ ។
ប្រភពពីសមត្ថកិច្ចបានឱ្យដឹងថា ផ្ទះដែលឆេះមានម្ចាស់ឈ្មោះ អន គ្រីម ភេទប្រុស អាយុ៤៨ឆ្នាំ មុខរបរជាងជួសជុសរថយន្ត មានទីលំនៅភូមិលេខ៤ សង្កាត់កំពង់លាវ ក្រុងព្រៃវែង ហើយស្រី្តដែលស្លាប់នៅក្នុងករណីអគ្គិភ័យនេះមានឈ្មោះ ញឹម ទៀង អាយុ៤៧ឆ្នាំ ត្រូវជាប្រពន្ធរបស់ម្ចាស់ផ្ទះតែម្តង ។
ប្រភពបានបន្តថា នៅមុនពេលកើតហេតុ ប្ដី និងកូនប្រុស២នាក់នាំគ្នាទៅសែនផ្នូរជីដូនជីតា ដែលគេហៅថាសែនឆេងមេង ចំណែកប្រពន្ធមិនបានទៅជាមួយនៅចាំផ្ទះ ។ លុះមកដល់ម៉ោង០៩និង៤៥នាទីព្រឹក ស្រាប់តែមានផ្សែងខ្មួលខ្មាញ់ចេញមកពីក្នុងផ្ទះ នៅពេលឃើញហេតុការណ៍បែបនេះ បងប្អូនប្រជាពលរដ្ឋក៏បានទាក់ទងទៅសមត្ថកិច្ច ហើយកម្លាំងនគរបាលក្រុង និងកម្លាំងស្នងការបានសហការណ៍ជួយសង្គ្រោះបន្ទាន់ភ្លាមផងដែរ តែនៅពេលសមត្ថកិច្ចទៅដល់ឃើញផ្ទះកើតហេតុជាប់សោ២ ដោយជាន់ទី១ជាសោកន្លែងជួសជុលរថយន្ត និងសោទី២ជាកន្លែងចូលបន្ទប់ដេក ដែលព្រោះបញ្ហានេះហើយទើបបណ្ដាលឱ្យម្ចាស់ផ្ទះជាប្រពន្ធ មិនអាចរត់ចេញមក ហើយសមត្ថិច្ចក៏ពិបាកក្នុងការជួយសង្គ្រោះ ហើយស្ត្រីជាប្រពន្ធក៏បានស្លាប់នៅក្នុងភ្លើង រួមនិងសម្ភារស្ទើរទាំងស្រុង ។
គួរបញ្ជាក់ផងដែរថា នៅក្នុងការអន្តរាគមន៍ពន្លត់ភ្លើងនេះដែរ សមត្ថកិច្ចបានប្រើប្រាស់រថយន្តពន្លត់អគ្គិភ័យអស់ចំនួន៤គ្រឿង ប្រើទឹកអស់៨រថយន្ត ទើបអាចគ្រប់គ្រង់ស្ថានការណ៍បាន និងមិនបណ្ដាលឱ្យឆេះឆ្លងផ្ទះនៅជាប់ឡើយ ។ ករណីនេះដែរ កម្លាំងជំនាញមិនទាន់អាចកំណត់រកមូលហេតុដែលបណ្ដាលឱ្យកើតមានអគ្គិភ័យបាននៅឡើយទេ ៕
ចែករំលែកព័តមាននេះ