អនន្តរិយកម្មប្រែថា អំពើបាបធ្ងន់ឲ្យផលមិនរំលងជាតិទី២ ឬកម្មឱ្យផលគ្មានចន្លោះ គឺមិនមានកម្មដទៃឯណាធ្ងន់ជាងនេះទេ កាលបើចុតិចាកភពនេះហើយ ត្រូវទៅកើតក្នុងទុគតិភពជាមិនខាន ។ ន័យមួយទៀតថា ជាកម្មដែលធ្ងន់បំផុតមិនមានកម្មឯណាៗនឹងធ្ងន់ក្រៃលែងជាងឡើយ ។…
អនន្តរិយកម្មប្រែថា អំពើបាបធ្ងន់ឲ្យផលមិនរំលងជាតិទី២ ឬកម្មឱ្យផលគ្មានចន្លោះ គឺមិនមានកម្មដទៃឯណាធ្ងន់ជាងនេះទេ កាលបើចុតិចាកភពនេះហើយ ត្រូវទៅកើតក្នុងទុគតិភពជាមិនខាន ។ ន័យមួយទៀតថា ជាកម្មដែលធ្ងន់បំផុតមិនមានកម្មឯណាៗនឹងធ្ងន់ក្រៃលែងជាងឡើយ ។ បណ្តាកម្មដែលជាបាបដូចគ្នាក្នុងផ្លូវព្រះពុទ្ធសាសនា គឺអនន្តរិយកម្មនេះជាបាបធ្ងន់យា៉ងក្រៃលែង ហាមមិនឱ្យធ្វើជាដាច់ខាត ។ អនន្តរិយកម្មនោះមាន៥គឺ ៖
១-មាតុឃាត សម្លាប់មាតា
២-បិតុឃាត សម្លាប់បិតា
៣-អរហន្តឃាត សម្លាប់ព្រះអរហន្ត
៤-លោហិតុប្បាទ ប្រទូស្តព្រះពុទ្ធអង្គរហូតដល់ញាំុងព្រះលោហិតឱ្យពុរពង ឬឱ្យជោរជាំដាំ ។
៥-សង្ឃភេទ ញាំុងសង្ឃឱ្យបែកគ្នា ។
មាតាបិតាចាត់ថា ជាបុព្វបុរសរបស់ត្រកូលមានគុណានុគុណយា៉ងក្រៃលែង ។ ជនណាសម្លាប់មាតាបិតា ជននោះឈ្មោះថា បំផ្លាញត្រកូលរបស់ខ្លួន ។ បើហ៊ានដល់ទៅសម្លាប់មាតាបិតារបស់ខ្លួនយា៉ងនេះហើយ ថ្ងៃក្រោយមុខជានឹងហា៊នសម្លាប់មនុស្សដទៃទៀតក្នុងពេលដែលខ្លួនក្រោធខឹង ។
ព្រះអរហន្តលោកមានកាយវាចារៀបរយសង្រួមល្អ និងមិនដែលប្រទូស្តដល់ជនណាឡើយ ហើយក៏ជាទីរាប់អានរបស់មហាជនផង។ អ្នកណាហា៊នសម្លាប់ព្រះអរហន្តហើយ អ្នកនោះឈ្មោះថា បំផ្លាញសេចក្តីរាប់អានរបស់មហាជន។ មួយវិញទៀត ក្នុងពេលដែលខ្លួនក្រោធខឹងវេលាណាមួយមុខជានឹងហា៊នសម្លាប់អ្នកដទៃមិនខានឡើយ ។
មនុស្សដែលហា៊នប្រទូស្តព្រះពុទ្ធអង្គជាព្រះសាស្តារបស់ខ្លួនឯង រហូតដល់ញាំុងព្រះលោហិតឱ្យពុរពង ឬឱ្យជោរជាំដាំដោយអាការផ្សេងៗហើយ ក៏ឈ្មោះថា អស់គោលក្នុងផ្លូវព្រះពុទ្ធសាសនា ប្រៀបដូចជាមនុស្សដែលគិតក្បត់ប្រទូស្តចំពោះព្រះរាជាម្ចាស់ផែនដីរបស់ខ្លួនដែរពិតជាមានទោសធ្ងន់ណាស់ ។
ភិក្ខុអ្នកញាំុងសង្ឃឱ្យបែកគ្នាចេញទៅជាពួក ជាក្រុម បើហ៊ានបំបែកគណៈរបស់ខ្លួនដូច្នេះហើយ គណៈដទៃដែលមិនមែនជាគណៈរបស់ខ្លួននោះ គេមុខជាហា៊នបំបែកឲ្យអន្តរធានមិនខានឡើយ ដូចជាមនុស្សដែលគិតតែពីមហិច្ឆតាអំណាចរបស់ខ្លួន ប្រើឧបាយកលញុះញង់ធ្វើឱ្យជាតិរបស់ខ្លួនបែកបាក់សាមគ្គីគ្នា បុគ្គលប្រភេទនេះគ្រោះថ្នាក់ណាស់ ។
កម្ម៥យា៉ងនេះជាបាបធ្ងន់ណាស់ ឃាត់សួគ៌ ឃាត់និព្វាន តាំងនៅក្នុងឋានបារាជិករបស់អ្នកកាន់ព្រះពុទ្ធសាសនា ហាមមិនឱ្យធ្វើយា៉ងដាច់ខាត ៕
ចែករំលែកព័តមាននេះ