ឯកឧត្តម ព្រុំ សុខា ចុះជួបសួរសុខទុក្ខកងកម្លាំងវរៈសេនាតូចការពារព្រំដែនគោក
- ព្រៃវែង
ខេត្តព្រៃវែង ៖ ឯកឧត្តម ព្រុំ សុខា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី…
ខេត្តព្រៃវែង ៖ ឯកឧត្តម ព្រុំ សុខា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចុះជួបសំណេះសំណាល និងសួរសុខទុក្ខ កងកម្លាំងវរៈសេនាតូចនគរបាលការពារព្រំដែនគោកលេខ ៦០៧ និងវរៈសេនាតូចយោធាការពារព្រំដែនគោកលេខ៣ នៅស្រុកព្រះស្តេចខេត្តព្រៃវែង ចំនួន៣៣៤នាក់ កាលពីរសៀលថ្ងៃទី០២ ខែមេសា ឆ្នាំ២០១៨ នៅស្រុកព្រះស្តេច ខេត្តព្រៃវែង។ ក្នុងឱកាសនោះលោក ឧត្តមសេនីយ៍ទោ ស្រេង ជា ស្នងការនគរបាលខេត្តព្រៃវែង បានមានប្រសាសន៍ថា ចំពោះសភាពការណ៍ នៅតាមព្រំដែនមានភាពល្អប្រសើរ សមត្ថកិច្ចការពារព្រំដែនបានបង្កលក្ខណៈងាយស្រួល ដល់ ប្រជាពលរដ្ឋអាចចេញចូលឆ្លងដែនទៅមក ដើម្បីផ្លាស់ប្តូរទំនិញ ព្យាបាលជំងឺ និងសួរសុខទុក្ខ សាច់ញាតិសន្តាន ដែលទៅព្យាបាលជំងឺនៅប្រទេសវៀតណាមបានល្អប្រសើរ។
ជាមួយគ្នាននេះ ភាគីទាំងពីរ កម្ពុជា វៀតណាម បានរឹតចំណងសាមគ្គីភាព មិត្តភាព និងសហការគ្នា ផ្តល់ព័ត៌មានគ្នា ទៅវិញទៅមកអំពីកិច្ចការងារនៅតាមព្រំដែនបានយ៉ាងល្អប្រសើរផងដែរ។ ឯកឧត្តម ព្រុំ សុខា រដ្ឋលេខាធិការក្រសួងមហាផ្ទៃបានថ្លែងនូវការកោតសរសើរចំពោះកងកម្លាំងប្រដាប់អាវុធទាំងអស់ ដែលបានរួមចំណែកធ្វើឲ្យប្រទេសមានសន្តិភាពពេញលេញ ធានាដល់ការអភិវឌ្ឍន៍ មានការរីកចម្រើនលើគ្រប់វិស័យ ជាការពិតណាស់មានសន្តិភាព ទើបមានការអភិវឌ្ឍន៍។ ជាមួយគ្នានេះដែរ ឯកឧត្តម បានថ្លែងអំណគុណចំពោះប្រជាពលរដ្ឋទាំងអស់ ដែលបានគាំទ្ររាជរដ្ឋាភិបាល និងបានចូលរួមថែរក្សាសន្តិភាព ជាមួយនឹងកងកម្លាំងយើងទាំងអស់គ្នា ធ្វើឲ្យប្រទេសជាតិមានការរីកចម្រើនលើគ្រប់វិស័យ ក្រោមការដឹកនាំដ៏ឈ្លាសវៃ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
នៅក្នុងឱកាសនោះដែរ ឯកឧត្តម ព្រុំ សុខា បាននាំយកថវិកាឧបត្ថមរបស់សម្តេចក្រឡាហោម និងលោកជំទាវ មកប្រគល់ជូនដល់កងកម្លាំងវរៈសេនាតូចនគរបាលការពារព្រំដែនគោកលេខ៦០៧ ចំនួន៥លានរៀល និងវរៈសេនាតូចយោធា ការពារព្រំដែនគោក លេខ៣ចំនួន៥លានរៀល។ បន្ថែមពីលើនោះ ឯកឧត្តមឯកឧត្តម ព្រុំ សុខា និងឯកឧត្តម ជា សុមេធី អភិបាលខេត្តព្រៃវែង បានឧបត្ថមថវិកាផ្ទាល់ខ្លួន ដល់កម្លាំងទាំងពីរវរៈសេនាតូចំនួន៣៣៤នាក់ ក្នុងម្នាក់ៗទទួលបានមី ទឹកសុទ្ធ ទឹកផ្លែឈើ ទឹកក្រូច និងស្រារបៀរ ព្រមទាងថវិកា១០ម៉ឺនរៀលផងដែ៕
ចែករំលែកព័តមាននេះ