ស្តាប់លោកឡាយ ណារិទ្ធ និងលោកឡាយ វណ្ណៈ និយាយថា…
- តាកែវ
តាមចម្លើយ៣នាក់ទៀត ក៏ប្រហាក់ប្រហែលស្ត្រីឈ្មោះ ចាន់ រី នេះដែរ ដោយឡែក ចម្លើយលោក ឡាយ ណារិទ្ធ ទាំងនៅសមត្ថកិច្ច…
តាមចម្លើយ៣នាក់ទៀត ក៏ប្រហាក់ប្រហែលស្ត្រីឈ្មោះ ចាន់ រី នេះដែរ ដោយឡែក ចម្លើយលោក ឡាយ ណារិទ្ធ ទាំងនៅសមត្ថកិច្ច និងនៅអយ្យការសាលាដំបូងរាជធានីភ្នំពេញ ត្រូវមេធាវីការពារក្តីបង្ហើបឱ្យដឹងថា លោកឡាយ ណារិទ្ធ នៅតែរក្សាជំហរដដែល ពោលគឺនៅថ្ងៃទី២៦ មករា ២០១៨ ខ្លួននិងស្នងការរង២នាក់ទៀតឈ្មោះ ឈុន សារ៉េត ទទួលបន្ទុកការងារសន្តិសុខ និងលោក ម៉ៅ សុផល ទទួលការងារអាវុធជាតិផ្ទុះ និងអគ្គិភ័យ នៅម៉ោងប្រហែល៦ល្ងាច ថ្ងៃកើតហេតុនោះ ខ្លួននិងអ្នកបើកបរឈ្មោះ តាក រតនា ហៅ
ទុយ បានជិះម៉ូតូម្នាក់មួយគ្រឿង ទៅហូបបាយជាមួយឈ្មោះ ជាតិ ភេទប្រុស អាយុ៤០ឆ្នាំ មុខរបរជាអ្នករកស៊ី នៅភោជនីយដ្ឋាន យីហោឌីនី កាហ្វេ ។ រហូតដល់ម៉ោង៧ និង២០នាទីខ្លួនបានទទួលទូរស័ព្ទពីលោកអភិបាលខេត្ត គឺលោក ឡាយ វណ្ណៈ ដែលត្រូវជាប្អូនប្រុស បានប្រាប់ឲ្យខ្លួនទៅផ្ទះអ្នកស្រី ចេវ សុវឌ្ឍនា ព្រោះនាងចង.កធ្វើអត្តឃាតសម្លាប់ខ្លួន និងឲ្យហៅនគរបាលទៅ ព្រមទាំងរថយន្តសង្គ្រោះបន្ទាន់ទៅជាមួយផង ។ បន្ទាប់មកខ្លួន(ឡាយ ណារិទ្ធ)បានទូរស័ព្ទទៅឈ្មោះ តុប សុភា និងទូរស័ព្ទទៅឈ្មោះ ឆាយ
សវុធ ជាអធិការនគរបាលក្រុងដូនកែវ ដើម្បីសួរនាំផ្លូវទៅផ្ទះកើតហេតុ ព្រោះលោកមិនដែលស្គាល់ផ្ទះជនរងគ្រោះទេ ។
លោកសារភាពទៀតថា ពេលទៅដល់ខ្លួនបានជួបស្ត្រីឈ្មោះ ចាន់ រី ជាអ្នកបម្រើផ្ទះរបស់ខ្លួនកាលពីមុន ហើយនិងអធិការនគរបាលក្រុងដូនកែវ បានឡើងទៅកាន់បន្ទប់កើតហេតុក៏ឃើញឈ្មោះ ចេវ សុវឌ្ឍនា ចង.កស្លាប់ នៅក្បែរមាត់បង្អួច ហើយខ្លួនបានចុះមកក្រោមសួរនាំឈ្មោះ ចាន់ រី គាត់ប្រាប់ថា មុនពេលកើតហេតុឈ្មោះ ចេវ សុវឌ្ឍនា បានឈ្លោះប្រកែកគ្នាតាមទូរស័ព្ទ តែមិនដឹងឈ្លោះជាមួយអ្នកណាទេ បន្ទាប់មកឃើញជនរងគ្រោះបានយកកាំបិតបម្រុងអារដៃ តែត្រូវគាត់ ជាអ្នកបម្រើ(ចាន់ រី) ជួយឃាត់ ហើយក៏រត់ឡើងទៅកាន់បន្ទប់ ចង.កសម្លាប់ខ្លួនតែម្តងទៅ ។ ពេលនោះ ចាន់ រី បានប្រាប់ថា គាត់រត់ទៅតាមក្រោយដើម្បីជួយដែរ ប៉ុន្តែបន្ទប់ត្រូវជាប់សោខាងក្នុង ហើយក៏បានទៅបើកបង្អួចឃើញឈ្មោះ ចេវ សុវឌ្ឍនា ចងកសម្លាប់ខ្លួនបាត់ទៅហើយ ។
ទោះបីជាចម្លើយបែបណាក្តី សមត្ថកិច្ចបានសន្និដ្ឋាន និងកសាងសំណុំរឿងនេះ បញ្ជូនជនសង្ស័យទាំង៥នាក់ទៅកាន់សាលាដំបូងរាជធានីភ្នំពេញ ទី១-គឺឈ្មោះ ឡាយ ណារិទ្ធ ជាជនដៃដល់ប្រព្រឹត្តបទល្មើស ឃាតកម្ម សម្លាប់ស្ត្រីឈ្មោះ ចេវ សុវឌ្ឍនា អាយុ៣៦ឆ្នាំ (តាមចម្លើយឈ្មោះ ចាន់ រី ឈ្មោះ ជឹម វុធ និងឈ្មោះ ម៉េន សាម៉ៃ) ពិតប្រាកដមែន ។ សំណុំរឿងជនជាប់សង្ស័យទាំង៥នាក់ បានស្ថិតនៅដៃព្រះរាជអាជ្ញារង៣នាក់សាកសួរ គឺលោក សៀង សុខ លោក កុល ប៊ុន និងលោក សេង ហៀង ក្រោមការតាមស្តាប់ចម្លើយពីសំណាក់មេធាវីការពារក្តីឲ្យជនសង្ស័យរៀងខ្លួន។ នៅរសៀលថ្ងៃទី៣១ មីនា ការសាកសួរយកចម្លើយនៅដំណាក់កាលតំណាងអយ្យការ មិនទាន់បានត្រូវបញ្ចប់ទេ ដូច្នោះជនសង្ស័យត្រូវបានផ្ញើទៅសមត្ថកិច្ចវិញ លុះព្រឹកថ្ងៃទី១ មករា បាននាំមកសួរបន្ត ។
អ្នកនាំពាក្យក្រសួងមហាផ្ទៃ លោកនាយឧត្តមសេនីយ៍ ខៀវ សុភ័ក បានថ្លែងបញ្ជាក់ប្រាប់អ្នកយកព័ត៌មានឲ្យដឹងនៅយប់ថ្ងៃទី៣១ មីនា ថា តាមការស៊ើបអង្កេតរបស់សមត្ថកិច្ច ករណីឃាតកម្មលើអ្នកស្រី ចេវ សុវឌ្ឍនា អាចជាប់ពាក់ព័ន្ធនឹងលោក ឡាយ វណ្ណៈ អតីតអភិបាលខេត្តតាកែវ ។ អ្នកនាំពាក្យក្រសួងមហាផ្ទៃរូបនេះបានដកស្រង់សម្តីថា តាមការស៊ើបអង្កេតរបស់សមត្ថកិច្ច និងចម្លើយសារភាព លើករណីឃាតកម្មនៅតាកែវ ទំនងអាចជាប់ពាក់ព័ន្ធនឹងលោក ឡាយ វណ្ណៈ ប៉ុន្តែយ៉ាងណានោះសូមរង់ចាំលទ្ធផលពីស្ថាប័នតុលាការសិន»។
លោក ឡាួយ វណ្ណៈ សារភាព
មានការកត់សម្គាល់ថា នៅយប់ថ្ងៃទី៣១ មីនា អតីតអភិបាលខេត្តតាកែវ លោក ឡាយ វណ្ណៈ បានទទួលសារភាពថា លោកមានទំនាក់ទំនងស្នេហាជាមួយអ្នកស្រី ចេវ សុវឌ្ឍនា នារីដែលគេប្រទះឃើញស្លាប់ក្នុងរូបភាពចង.កក្នុងគេហដ្ឋានដ៏ស្គឹមស្កៃនៅក្រុងដូនកែវ កាលពីខែមករា ឆ្នាំ២០១៨ កន្លងទៅ ។
លោក ឡាយ វណ្ណៈ បានបញ្ជាក់នៅលើហេ្វសប៊ុករបស់លោក នាល្ងាចថ្ងៃទី៣១ ខែមីនាថា ជូនចំពោះជនរួមជាតិទូទាំងប្រទេស! ពិសេសប្រជាពលរដ្ឋខេត្តតាកែវ ជាទីគោរពស្រឡាញ់របស់ខ្ញុំ ! ខ្ញុំសូមបញ្ជាក់អះអាងថា រូបខ្ញុំនិងប្អូនស្រី ចេវ សុវឌ្ឍនា មានទំនាក់ទំនងស្នេហាស្រឡាញ់គ្នាជាមួយគាត់ពិតប្រាកដមែនក្នុងរយៈពេលជាង១ឆ្នាំកន្លងមកនេះ ! ក្រោយមកខ្ញុំបានសុំកាត់ផ្តាច់ទំនាក់ទំនងជាមួយគាត់ ដែលធ្វើឱ្យគាត់ខឹងសម្បានឹងខ្ញុំរហូតដល់គាត់គិតខ្លីធ្វើអត្តឃាតខ្លួនឯង ! នេះជារឿងពិត ! អ្វីដែលខ្ញុំធ្វើខុសឆ្គង ខ្ញុំហ៊ានទទួល ! ខ្ញុំសុំទោសចំពោះបងប្អូនប្រជាពលរដ្ឋទាំងអស់ ពិសេសបងប្អូនប្រជាពលរដ្ឋខេត្តតាកែវទាំងមូល ។ប៉ុន្តែខ្ញុំសូមបដិសេធទាំងស្រុងនូវរាល់ការចោទប្រកាន់ដែលថា រូបខ្ញុំនិងបងប្រុសខ្ញុំ បានសម្លាប់ប្អូនស្រី ចេវ សុវឌ្ឍនា ! ខ្ញុំនិងបងប្រុសខ្ញុំពុំមានចិត្តបាបសាហាវព្រៃផ្សៃសម្លាប់គាត់ទេ ។
សូមបងប្អូនពិចារណាមើលចុះថា បើខ្ញុំនិងបងប្រុសខ្ញុំបានសម្លាប់ប្អូនស្រី ចេវ សុវឌ្ឍនាមែននោះ ម្លេ៉ះ ក្រោយពីគេដកតំណែងខ្ញុំចេញពីអភិបាលខេត្ត ហើយក្រសួងមហាផ្ទៃបើកការស៊ើបអង្កេតនោះ ខ្ញុំនិងបងប្រុសខ្ញុំរត់ចេញទៅក្រៅប្រទេសសុំសិទ្ធិជ្រកកោននយោបាយពីស្ថានទូតបរទេសបាត់ទៅហើយ ។ ខ្ញុំនៅទីនេះ មិនរត់ចោលគណបក្សប្រជាជនកម្ពុជា និងប្រទេសជាតិរបស់ខ្ញុំទេ ។
ខ្ញុំជឿជាក់លើប្រព័ន្ធច្បាប់ និងតុលាការរបស់ប្រទេសយើងថានឹងផ្តល់យុត្តិធម៌ដល់រូបខ្ញុំ និងបងប្រុសខ្ញុំ និងមន្ត្រីដ៏ទៃទៀតដែលរងការចោទប្រកាន់ ។ ស្អែកនេះ ខ្ញុំនៅខេត្តតាកែវដើម្បីចូលរួមពិធីផ្ទេរមុខតំណែងប្រធានគណៈកម្មាធិការគណបក្សប្រជាជនខេត្តតាកែវពីខ្ញុំ ឱ្យទៅលោក អ៊ូច ភា ដែលជាអភិបាលថ្មីខេត្តតាកែវយើង ក្រោមអធិបតីភាពលោកឧបនាយករដ្ឋមន្ត្រីប្រចាំការ ប៊ិន ឈិន ។ ពេលខ្ញុំនៅធ្វើជាអភិបាលខេត្តតាកែវ ខ្ញុំបានដោះស្រាយរកយុត្តិធម៌រាប់មិនអស់ ករណីជូនប្រជាពលរដ្ឋរបស់ខ្ញុំ ! ខ្ញុំសង្ឃឹមជឿជាក់ថា យុត្តិធម៌នឹងមានសម្រាប់រូបខ្ញុំ និងបងប្រុសខ្ញុំ ឡាយ ណារិទ្ធ !
សូមបងប្អូនប្រជាពលរដ្ឋទាំងអស់ ពិសេសបងប្អូនប្រជាពលរដ្ឋខេត្តតាកែវ ជឿជាក់ចុះថាខ្ញុំ ឡាយ វណ្ណៈ មិនរត់ចោលបងប្អូនទេ ។
ចែករំលែកព័តមាននេះ