ខេត្តកណ្ដាល ៖ តៃកុងរថយន្តបីនាក់ត្រូវបានសន្តិសុខប្ដឹងឲ្យនគរបាលឃាត់ខ្លួន បន្ទាប់ពីបានលួចបូមប្រេងពី រថយន្តបានពីរប៊ីដុង កាលពីម៉ោង៨និង១៥នាទីយប់ ថ្ងៃទី០១ ខែមេសានេះ នៅចំណុចក្នុងការដ្ឋានដាំកូនឈើប្រឡាយ១១ ស្ថិតក្នុងភូមិព្រែកតារត្ន័ ឃុំពោធិបាន ស្រុកកោះធំ ខេត្តកណ្ដាល ។
មន្ត្រីនគរបាលស្រុកកោះធំបានឱ្យដឹងថា ជនសង្ស័យចំនួន៣នាក់ ដែលបានឃាត់ខ្លួន ទី១-ឈ្មោះ នុន ហុងលី ភេទប្រុស អាយុ១៨ឆ្នាំ ជនជាតិខ្មែរ មុខរបរបើករថយន្ត មានទីលំនៅភូមិតាឡក ឃុំ សេមសាន្ត ស្រុកឧដ្ដុង ខេត្តកំពង់ស្ពី ។ ទី២ – ឈ្មោះ អុន ផល្លា ភេទប្រុស អាយុ២៥ឆ្នាំ ជនជាតិខ្មែរ មុខរបរបើករថយន្ត មានទីលំនៅភូមិបាគៀយ ឃុំក្រាំងចេក ស្រុកឧដ្ដុង ខេត្តកំពង់ស្ពឺ ។ ទី៣ – ឈ្មោះ ឃូន អ៊ាល (ហៅដូង) ភេទប្រុស អាយុ៣៨ឆ្នាំ ជនជាតិខ្មែរ មុខរបរបើករថយន្ត មានទីលំនៅភូមិកញ្ជំ ឃុំកញ្ជំ ស្រុកពារាំង ខេត្តព្រៃវែង ។
សម្ភារវត្ថុតាងចាប់យករួមមានប្រេងម៉ាស៊ូត ចំនួន២ប៊ីដុង ស្មើនឹង៦០លីត្រ ដែលជនសង្ស័យលួចបូមពីរថយន្ត ។ ចំណែកដើមបណ្ដឹង ជនរងគ្រោះ (តំណាងឲ្យក្រុមហ៊ុន) ឈ្មោះ ភន ស្រអែម ភេទប្រុស អាយុ៣៩ឆ្នាំ ជនជាតិខ្មែរមុរបរ សន្តិសុខ ស្នាក់នៅភូមិព្រែកតារ័ត្ន ឃុំពោធិបាន ស្រុកកោះធំ ខេត្តកណ្ដាល ។
មុនពេលកើតហេតុខាងលើ ជនសង្ស័យទាំង៣នាក់ បានបម្រើការងារជាអ្នកបើករថយន្តនៅក្នុងការដ្ឋានដឹកខ្សាច់ នៅឫស្សីកែវ ក្រុងភ្នំពេញ ។ នៅថ្ងៃទី២០ ខែមិនា ឆ្នាំ២០១៨ មេការដ្ឋានបានឲ្យពួកគេមកបើកឡានដឹកដីក្នុងការដ្ឋានដាំដើមឈើប្រលាយ១១ ក្នុងភូមិព្រែកតារ័ត្ន ឃុំពោធិបាន ស្រុកកោះធំ ខេត្តកណ្ដាល ។
នៅពេលបើកឡានដឹកដីបានចំនួន៣ទៅ៤ថ្ងៃ សន្តិសុខយាមការដ្ឋានមានការសង្ស័យទៅលើពួកគេទាំង៣ ថា លួចបូមប្រេងពីក្នុងរថយន្តក៏បានចាំឃ្លាំមើលរហូតដល់ថ្ងៃកើតហេតុខាងលើ នៅម៉ោង៨និង១៥នាទីយប់សន្តិសុខដើរទៅមើលកន្លែងចតទុកដាក់ឡាន ពេលនោះក៏បានឃើញអ្នកបើកឡានកំពុងលួចបូមប្រេងចេញពីឡានដឹកដី ។ រួមមានឈ្មោះ ឃុល អ៊ាល ហៅដូង អុន ផល្លានុនហុងលី ដោយខាងសន្តិសុខសួរនាំឈ្មោះ អុន ផល្លា នុន ហុងលីបានប្រាប់ថា ពួកខ្លួនយកបានចំនួនមួយប៊ីដុង២នាក់ ។ ចំណែក មួយប៊ីដុងទៀតនោះ ឈ្មោះ ឃុល អ៊ាល (ហៅដូង) ជានាក់យកម្នាក់ឯង ។
បច្ចុប្បន្នជនសង្ស័យទាំង៣នាក់ខាងលើត្រូវបានសមត្ថកិច្ចនគរបាលប៉ុស្ដិ៍ពោធិ៍បានចាប់ខ្លួន បញ្ជូនមកកាន់អធិការដ្ឋាននគរបាលស្រុក ដើម្បីបន្តចាត់ការតាមនីតិវិធី ៕
ចែករំលែកព័តមាននេះ