ខេត្តបាត់ដំបង ៖ ក្នុងឱកាសមុនចូលឆ្នាំប្រពៃណីខ្មែរខាងមុខនេះដៃគូរសម្ព័ន្ឋមេត្រីភាពរបស់កងពលតូចថ្មើរជើងលេខ៥១ ស្ថិតនៅស្រុកព្រះនេត្រព្រះ ខេត្តបន្ទាយមានជ័យ វេលាព្រឹកថ្ងៃទី៣១ ខែមីនា ឆ្នាំ២០១៨ មានក្រសួងសុខាភិបាលក្រុមហ៊ុន សូគីមិច ក្រុមហ៊ុនសុខាអូតែល ដែលមានលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានដឹកនាំយកអំណោយមានថ្នាំពេទ្យ គ្រឿងបរិក្ខាពេទ្យ គ្រឿងឧបភោគ បរិភោគ មកចែកជូនដល់ទាហានចំនួន៥០០នាក់ គ្រួសារកងទ័ព១០០គ្រួសារ និវត្តន៍ជន១០០នាក់ ភ្ញៀវមកចូលរួម២០០នាក់ ដោយបានផ្តល់ថវិកាក្នុងម្នាក់ទទួលបាន៤ម៉ឺនរៀល និងប្រគល់អាគារ១ខ្នងតម្លៃជាង៤ម៉ឺនដុល្លាដល់វរសេនាតូចលេខ៥១៤ស្ថិតនៅក្នុងឃុំបន្ទាយឆ្មាស្រុកថ្មពួក ខេត្តបន្ទាយមានជ័យ ។
លោកឧត្តមសេនីយ៍ត្រី សេង ធារិន មេបញ្ជាការស្តីទីកងពលលេខ៥១ បានមានមតិស្វាគមន៍ និងរាយការណ៍អំពីការរីកចំរើនក្នុងអង្គភាព ការកសាងអង្គភាពរឹងមាំលើគ្រប់វិស័យការហ្វឹកហ្វឺនដល់កងកម្លាំងដើម្បីធានាគុណភាព ការបង្កបង្កើនផល ការចីញ្ចឹមសត្វដើម្បីធានាជីវភាពកងទ័ពបន្ថែមទៀត ដែលកន្លងមកទទួលបានស្នាដៃលេខ១រៀងរាល់ឆ្នាំក្នុងទូទាំងកងពលចំណុះឲ្យយោធភូមិភាគទី៥ ។
លោក គឹម ស្រ៊ុន តំណាងក្រុមហ៊ុន សូគីមិច បានបញ្ជាក់ថា ក្នុងនាមសមរភូមិក្រោយជួយសមរភូមិមុខក្រុមហ៊ុនសូគីមិចតែងតែជួយជាប្រចាំរាល់ពេលមានតម្រូវការ ព្រោះកងទ័ពគឺជាអ្នកធានាឲ្យយើងបានសុខសន្តិភាព ទើបយើងអាចមានក្រុមហ៊ុន ដំណើរការរកស៊ីបានរហូតដល់សព្វថ្ងៃដោយគ្មានការភ័យខ្លាចអ្វីឡើយ ។
ចុងក្រោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានផ្តាំផ្ញើថា សូមគ្រប់កងកម្លាំងទាំងអស់នាំគ្នាថៃរក្សាសុខភាពបន្ថែមទៀតដោយត្រូវចងមុងជាប្រចាំនៅពេលទទួលទានដំណេក ដើម្បីការពារមេរោគគ្រុនចាញ់ដែលឆ្លងតាមមូសខាំដែលកំពុងមាននៅគ្រប់ទីកន្លែង ហើយត្រូវនៅតែរក្សាជាប់ជានិច្ចចំពោះកងទ័ពត្រូវប្រើប្រាស់ស្រោមអនាម័យកុំធ្វេសប្រហែសឡើយ ទោះបីឥឡូវមានការថយចុះអំពីមេរោគអេដស៍ហើយក៏ដោយ ៕
ចែករំលែកព័តមាននេះ