ខេត្តព្រៃវែង ៖ ត្រឹមតែរយៈពេល៣ម៉ោង មានក្មេងប្រុសពីរនាក់បានលង់ទឹកស្លាប់ជាបន្តបន្ទាប់ ព្រោះតែឪពុកម្តាយមិនមានការប្រុងប្រយ័ត្ន ហើយទុកពួកគេនៅផ្ទះ គ្មានអ្នកមើលថែ ខណៈហេតុការណ៍ទាំង២ នេះបានកើតឡើងនៅទីតាំងពីរផ្សេងគ្នា ។
បើតាមរបាយការណ៍របស់សមត្ថកិច្ចបានឲ្យទឹកដឹងថា ករណីកុមារលង់ទឹកទី១ បានកើតឡើងកាលពីវេលាម៉ោងប្រមាណ៨និង៣០នាទីព្រឹក ថ្ងៃទី២៩ ខែមិនា នៅចំណុច ស្រះទឹកជម្រៅ ២ម៉ែត្រ ខាងលិចចម្ងាយ៣៥ម៉ែត្រ ពីផ្ទះឪពុករបស់ខ្លួនដែលស្ថិតក្នុងភូមិប្រោះស្វា ឃុំបន្ទាយចក្រី ស្រុកព្រះស្តេច ខេត្តព្រៃវែង ។
ប្រភពបានបន្តថា កុមារារងគ្រោះឈ្មោះ ថាក់ មនោរ៉ា ភេទប្រុស អាយុ៣ឆ្នាំ មានឪពុកឈ្មោះ ថេង ថាក់ អាយុ៣១ឆ្នាំ និងម្តាយឈ្មោះ មិត្ត សាម៉េន អាយុ២៥ឆ្នាំរស់នៅក្នុងភូមិឃុំកើតហេតុហេតុខាងលើ ។ ប្រភពបានបញ្ជាក់ថា នៅមុនពេលកើតហេតុគេឃើញកុមារារងគ្រោះបានចុះទៅដើរលេងជិតមាត់ស្រះ ស្រាប់តែមួយសន្ទុះក្រោយមកមិនដឹងថា យ៉ាងមិច កុមាររងគ្រោះក៏រអិលធ្លាក់ចូលទឹកស្រះ ទើបបណ្តាលឲ្យស្លាប់បាត់ទៅ ។
បន្ទាប់ពីនោះប្រមាណជាងបីម៉ោងក៏កើតមានករណីស្រដៀងគ្នានេះម្តងទៀត ដែលធ្វើឲ្យកុមារាម្នាក់ ដែលរស់នៅស្រុកព្រះស្តេច បានស្លាប់បាត់បង់ជីវិតដូចគ្នា ដែលហេតុការណ៍នោះបានកើតឡើងនៅម៉ោងប្រមាណជា១១និង៣០នាទី នៅចំណុចខាងលិចផ្ទះ របស់ឈ្មោះ អេង អេន ដែលត្រូវជាជីតារបស់កុមាររងគ្រោះទី២ ដែលស្ថិតក្នុងភូមិក្រាំង ឃុំស្ពឺ (ក)ស្រុកបាភ្នំ ខេត្តព្រៃវែង ។ ប្រភពបន្តថា កុមារារងគ្រោះមានឈ្មោះ ម៉េត តុលា ភេទប្រុស អាយុ៤ឆ្នាំ និងមានឪពុកឈ្មោះ អេន ម៉េត ភេទប្រុស អាយុ៣៥ឆ្នាំ នៅភូមិឃុំកើតហេតុ និងជាពោះម៉ាយផងដែរ ។
នៅមុនពេលកើតហេតុឪពុករបស់កុមាររងគ្រោះត្រូវទៅបុណ្យញាតិក្នុងភូមិ ហើយក៏ទុកកូនឲ្យនៅផ្ទះម្នាក់ឯងដោយគ្មានមនុស្សនៅមើល ទើបបណ្តាលឲ្យក្មេងចុះទៅលេងទឹក ហើយក៏លង់ទឹកស្លាប់ដូច្នេះទៅ ។
បច្ចុប្បន្នសពរបស់ក្មេងប្រុសទាំង២ត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ