រាជធានីភ្នំពេញ ៖ ដោយមើលឃើញទម្រង់សិល្បៈគែន កំពុងស្ថិតក្នុងស្ថានភាពបាត់បង់ ព្រោះមានអ្នកចេះចាំតិចពេក ទើបនៅថ្ងៃទី១០ ខែមីនា ឆ្នាំ២០១៨ កម្មវិធីរថយន្តតន្ត្រីទិព្វខ្មែរ នៃអង្គការសិល្បៈខ្មែរអមតៈ បានទៅរៀបចំបង្កើតថ្នាក់បង្រៀនឧបករណ៍គែន នៅខេត្តឧត្តរមានជ័យ ដើម្បីជួយបណ្ដុះបណ្ដាល កូនខ្មែរជំនាន់ក្រោយឲ្យបានចេះជំនាញទម្រង់សិល្បៈ ដ៏កម្រនៅប្រទេសកម្ពុជា និងក៏ដូចជាអភិរក្សការពារមរតកនេះកុំឲ្យបាត់បង់ ។
ថ្នាក់គែនដែលត្រូវបង្កើតឡើងនេះនៅភូមិក្រសាំង ឃុំបុស្សស្បូវ ក្រុងសំរោងខេត្តឧត្តរមានជ័យ មានសិស្សចូលរៀនដំបូងចំនួន៤នាក់ ជាសិស្សស្រី អាយុពីចន្លោះ១១ទៅ១២ឆ្នាំ បង្ហាត់បង្រៀនដោយព្រឹទ្ធាចារ្យម៉ុន ហៃ។ លោកគ្រូម៉ុន ហៃ ជាមនុស្សម្នាក់គត់ ដែលចេះចាំច្រើនអំពីគែន នៅប្រទេសកម្ពុជា ។ ក្នុងចំណោមនេះមានម្នាក់ជាចៅស្រីរបស់លោកព្រឹទ្ធាចារ្យផងដែរ ។ ពួកគេនឹងត្រូវរៀន៦ម៉ោងក្នុងមួយសប្ដាហ៍ដោយឥតគិតថ្លៃ ។
ជាមួយនឹងថ្នាក់រៀននេះក៏មានផ្ដល់នូវឧបករណ៍គែនចំនួន៤គ្រឿងទៅដល់សិស្សនិងបៀវត្សរសម្រាប់លោកព្រឹទ្ធាចារ្យផងដែរ។ បន្ទាប់ពីការបណ្ដុះបណ្ដាលមួយឆ្នាំសង្ឃឹមថា សិស្សនឹងអាចទៅចូលរួមសម្ដែងបង្ហាញឧបករណ៍គែនក្នុងគម្រោងកម្មវិធីរថយន្តតន្ត្រីទិព្វខ្មែរ ដែលនឹងនាំយកតន្ត្រី និងសិល្បៈខ្មែរ កម្រៗទៅបង្ហាញនៅតាមសហគមន៍នានាជុំវិញប្រទេសកម្ពុជា ដើម្បីអាចឲ្យទម្រង់សិល្បៈទាំងនោះនៅតែមានសកម្មភាព ។
ព្រឹទ្ធាចារ្យម៉ុន ហៃ មានប្រសាសន៍ថា «ខ្ញុំសប្បាយចិត្តណាស់ ដែលខ្ញុំអាចមានថ្នាក់សមរម្យបណ្ដុះបណ្ដាលសិស្សឲ្យចេះឧបករណ៍គែន ។ ខ្ញុំព្រួយបារម្ភជាច្រើនឆ្នាំមកហើយ ខា្លចថាវាបាត់បង់ ដោយសារវ័យខ្ញុំកាន់តែចាស់ ហើយ ក្មេងៗក៏មិនបានមករៀនបន្តចំណេះនេះដែរ ។ ខ្ញុំចង់ផ្ទេរចំណេះដល់ក្មេងជំនាន់ក្រោយ និងចង់ឃើញពួកគេចេញសម្ដែងណាស់ ។ ខ្ញុំសូមអរគុណដល់រថយន្តតន្ត្រីទិព្វខ្មែរ និងអង្គការសិល្បៈខ្មែរអមតៈ ដែលបានជួយជ្រោមជ្រែងបង្កើតថ្នាក់គែននេះ ហើយខ្ញុំនឹងខិតខំបង្ហាត់បង្រៀនសិស្សឲ្យបានល្អ » ។
រថយន្តតន្ត្រីទិព្វខ្មែរ និងអង្គការសិល្បៈខ្មែរអមតៈ បានប្រកាសរួមគ្នាអំពីកិច្ចសហការ៥ឆ្នាំ ដែលរថយន្តតន្ត្រីទិព្វខ្មែរ នឹងក្លាយជាកម្មវិធីមួយរបស់អង្គការសិល្បៈខ្មែរអមតៈ ដើម្បីផ្សព្វផ្សាយសិល្បៈបុរាណនៅទូទាំងប្រទេស ។
ការចូលរួមនេះនឹងធ្វើឲ្យរថយន្តតន្ត្រីទិព្វខ្មែរកាន់តែមានសមត្ថភាពពេញលេញក្នុងការនាំទម្រង់សិល្បៈខ្មែរ កម្រៗទៅផ្សព្វផ្សាយ និងសម្ដែងទូទាំងប្រទេសកម្ពុជាកាន់តែច្រើនជាងមុន ក៏ដូចជាអភិរក្សទម្រង់សិល្បៈទាំងនោះឲ្យគង់វង្សស្ថិតស្ថិរសម្រាប់កូនខ្មែរជំនាន់ក្រោយ ជាពិសេសគម្រោង ថ្មីៗរបស់ខ្លួនដូចជាការផលិតឧបករណ៍ភ្លេង និងការឧបត្ថម្ភសកម្មភាពសិល្បករនៅសហគមន៍ចំនួនពីរនៅអារ៉ែង និងខេត្តឧត្តរមានជ័យ ។
កាន់តែពិសេស ទាំងរថយន្តតន្ត្រីទិព្វខ្មែរ និងសិល្បៈខ្មែរអមតៈ នឹងរួមគ្នាលើការពង្រីកការទាក់ទងជាមួយសហគមន៍ខ្មែរនៅបរទេស ដូចជាគម្រោងនាំយកសិល្បកររថយន្តតន្ត្រីទិព្វខ្មែរទៅធ្វើបទបង្ហាញ និងសម្ដែងទម្រង់សិល្បៈខ្មែរកម្រៗនៅសហគមន៍ខ្មែរនៅសហរដ្ឋអាមេរិក ។ ព្រមទាំងការអនុវត្តបច្ចេកវិទ្យាទំនើប (កាមេរ៉ា៣៦០) ក្នុងការរក្សាទុក និងផ្សព្វផ្សាយអំពីទម្រង់សិល្បៈ និងឧបករណ៍ភ្លេង កម្រៗផងដែរ។ តាមរយៈការងារទាំងនេះ រថយន្តតន្ត្រីទិព្វខ្មែរនឹងអាចរក្សាបេសកកម្មរបស់ខ្លួនប្រកបដោយនិរន្តរភាព និងពេញលេញក្នុងរយៈពេលវែង ។
ចាប់តាំងពីការបង្កើតឡើងនៅចុងឆ្នាំ២០១៣ រហូតមកដល់ពេលនេះ រថយន្តតន្ត្រីទិព្វខ្មែរ បានរៀបចំការប្រគំតន្ត្រី ធំៗ៣០ដង និងសកម្មភាពសិល្បៈរយៈពេលខ្លីជាច្រើននៅតាមតំបន់ និងសហគមន៍នានាទូទាំងប្រទេស ។
រថយន្តតន្ត្រីទិព្វខ្មែរមានបេសកកម្មនាំយកតន្ត្រីបុរាណទៅកាន់ភូមិនានាទូទាំងប្រទេសកម្ពុជា ជាពិសេសតំបន់ជនបទដាច់ស្រយាលដែលពុំសូវមានឱកាសបានទស្សនាផ្ទាំងទស្សនីយភាព ។ រថយន្តតន្ត្រីទិព្វខ្មែរ ជាគម្រោងឯករាជ្យបង្កើតឡើងដោយលោកអាន ចនផន ជាស្ថាបនិក និង Steve RIEGE ក្នុងឆ្នាំ២០១២ ៕
ចែករំលែកព័តមាននេះ