ទីបំផុតពិធីករដែលមានប្រជាប្រិយភាពប្រចាំស្ថានីយទូរទស្សន៍ស៊ីស៊ីធីវី ចិន គឺលោក សា ប៊ីនីង បានសារភាពពីចំណងស្នេហ៍របស់លោកជាមួយតារាភាពយន្ត ដែលមានសម្រស់ស្រស់ស្អាត និងកំពុងល្បីឈ្មោះក្នុងពិភពសិល្បៈគឺនាង ហ្សាង ហ្ស៊ីយី ។ នេះបើយោងតាមប្រភពគេហទំព័រ Apply Daily ចេញផ្សាយថ្ងៃទី៧ មករា កន្លងមក ។
ប្រភពព័ត៌មានបន្តថា ថ្មីៗនេះនៅក្នុងកម្មវិធី ផ្សាយមួយក្នុងស្ទូឌីយោរបស់ស្ថានីយទូរទស្សន៍ មានទស្សនិកជនម្នាក់បានសួរទៅពិធីករស្រស់សង្ហា វ័យ៣៦ឆ្នាំនោះថា “ ប្រសិនបើពិធីការិនីបីរូបដែលជាមិត្តភ័ក្តិលោក ក្នុងនោះមាននាងហ្សាង ហ្ស៊ីយី ដែរនោះ បានធ្លាក់ចូលទឹកក្នុងពេលតែមួយ តើលោកជួយអ្នកណាមុនគេ ? ” ។
ស្ថិតក្នុងសំនួរបែបនេះ ពិធីករស្រស់សង្ហា បានសញ្ជឹងគិតមួយភ្លែត រួចនិយាយដោយទឹកដមសម្តីផ្អែមថា “ តើនាងអាចធ្លាកទឹកដោយវិធីណា បើខ្ញុំនៅក្បែរនាងហើយនោះ ។ ពិតជាមិនអាចទៅរួចឡើយ ដែលបណ្តោយឱ្យនាងធ្លាក់ទឹកនោះ ” ។ ភ្លាមនោះទស្សនិកជនបានទះដៃគ្រប់ៗគ្នា បន្ទាប់មកពិធីការិនីជនជាតិចិន មានកំណើតនៅអាមេរិកឈ្មោះ Henry Lee បានឡើងមកដល់វេទិកា រួចបានបញ្ជាក់ថា “ លោក សា ប៊ីនីង កំពុងធ្លាក់ក្នុងអន្លុងស្នេហ៍ហើយ ” ។
ដោយដឹងថា ខ្លួនមិនអាចលាក់អាថ៌កំបាំងនេះបានតទៅទៀត លោកបានសារភាពថា “ ថ្ងៃនេះជាលើកទី១ហើយដែលលោកបាននិយាយនៅមុខប្រព័ន្ធផ្សព្វផ្សាយពីរឿងស្នេហារបស់លោក ដូច្នេះភាពមន្ទិលសង្ស័យទាំងអស់ ត្រូវបានលាតត្រដាងនាពេលនេះហើយ ។
គូស្នេហ៍មួយគូនេះត្រូវបានគេដឹងថា បានចាប់ផ្តើមណាត់ជួបគ្នាតាំងពីខែកញ្ញា ឆ្នាំ២០១១មកម៉្លេះ បន្ទាប់ពីលោក ប៊ីនីង បានបញ្ជាក់ពីការស្រឡាញ់របស់គាត់ទៅលើនាង ហ្សាង ហ្ស៊ីយី វ័យ៣៣ឆ្នាំរូបនោះ ខណៈពេលដែលនាងមានវត្តមាននៅក្នុងកម្មវិធីទូរទស្សន៍ ។
ផ្ទុយពីការអះអាងរបស់លោក សា ប៊ីនីង ដែលបានសារភាពជាសាធារណៈបែបនេះ នាងហ្សាង ហ្ស៊ីយី នៅតែបដិសេធពីទំនាក់ទំនងស្នេហារបស់នាងជាមួយលោកសា ប៊ីនីង ខណៈដែលនាងធ្វើសន្និសីទកាសែតផ្សព្វផ្សាយស្នាដៃថតខ្សែភាពយន្តថ្មីរបស់នាង រឿង “ The Grandmasters ” កាលពីថ្ងៃទី ៥ ខែមករា ឆ្នាំ២០១៣ នៅទីក្រុងប៉េកាំង នាពេលកន្លងមក ៕
ចែករំលែកព័តមាននេះ