ខេត្តកំពង់ឆ្នាំង ៖ ដោយអនុវត្តន៍តាមផែនការអភិវឌ្ឍន៍មាត់ច្រាំងទន្លេផ្សារក្រោម ឲ្យក្លាយជាតំបន់ទេសចរណ៍សម្រាប់ទាក់ទាញភ្ញៀវទេសចរណ៍ និងសោភ័ណភាពក្នុងក្រុងកំពង់ឆ្នាំងផងនោះ ស្តង់លក់ឈើនៅមាត់ទន្លេផ្សារក្រោម ត្រូវបានរុះរើចេញស្ទើរអស់ទាំងស្រុងហើយដែរ ដែលចំណុចនោះ អាជ្ញាធរខេត្តនឹងត្រូវចាក់ដីបំពេញបន្ថែមសម្រាប់ធ្វើសួនច្បារ និងវេទិកាបុណ្យទន្លេនៅឆ្នាំ២០១៩ ខាងមុខនេះ ។
លោក យិន សាវ៉េន អភិបាលក្រុងកំពង់ឆ្នាំង បាននិយាយឲ្យដឹងថា នៅរដូវប្រាំងខាងមុខនេះ អាជ្ញាធរខេត្តនឹងធ្វើការចាក់ដីពង្រីកច្រាំងទន្លេផ្សារក្រោម ចំណុចអតីតរោងលក់ឈើផ្លូវដាច់ក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ដើម្បីត្រៀមទុកធ្វើសួនច្បារ និងធ្វើវេទិកាបុណ្យទន្លេនៅក្នុងឆ្នាំ២០១៩ខាងមុខនេះ ។ លោកបានបញ្ជាក់ថា កាលពីខែកុម្ភៈកន្លងមក អាជ្ញាធរក្រុង និងខេត្តបានសំណូមពរជាថ្មីទៀត រួមការដាក់លក្ខណមួយចំនួនផង ដោយសុំឲ្យបងប្អូនអាជីវករដែលបានធ្វើរោងលក់ឈើនៅម្តុំនោះ រុះរើរោងលក់ឈើចេញ ដើម្បីទុកទីតាំងនោះសំរាប់ចាក់ដីបំពេញឲ្យស្នើនឹងខឿនច្រាំងទន្លេពីដើមពោធិ៍ មកមុខស្នាក់ការរដ្ឋបាលជលផលកំពង់ឆ្នាំង ។ ដោយឡែកតូបលក់ដូរមួយចំនួន រួមនិងស្ថានីយលក់ប្រេងមួយកន្លែងនៅមាត់ទន្លេដែរនោះ ក៏អាជ្ញាធរខេត្តតម្រូវឲ្យរុះរើចេញផងដែរ ដែលមានកិច្ចសន្យាជាមួយអាជ្ញាធរខេត្តរួចហើយ ដើម្បីទុកច្រាំងមាត់ទន្លេពីចំណុចដើមពោធិ៍ដល់ថ្នល់ដាច់ ធ្វើសួនច្បារសម្រាប់ភ្ញៀវទេសចរមកកម្សាន្ត និងក៏សម្រាប់ខេត្តកំពង់ឆ្នាំងទទួលធ្វើបុណ្យទន្លេនៅអំឡុងខែកុម្ភៈ ឆ្នាំ២០១៩ ខាងមុខនេះ ។
ជាមួយគ្នានោះដែរ លោក ស៊ុន សុវណ្ណារិទ្ធ អភិបាលរងខេត្តក៏បានអំពាវនាវផងដែរ ដល់បងប្អូនប្រជាពលរដ្ឋ ដែលកំពុងប្រកបមុខរបរលក់ដូរនៅក្នុងទីតាំងខាងលើនេះ សូមត្រៀមរុះរើតូបលក់ដូររបស់ខ្លួនទៅរកទីតាំងលក់ដូរថ្មី ក្នុងពេលឆាប់ៗនេះ ដើម្បីទុកលទ្ធភាពឲ្យអាជ្ញាធរខេត្ត អភិវឌ្ឍន៍តាមគម្រោងការខាងលើ ដើម្បីមុខមាត់ខេត្តកំពង់ឆ្នាំង ក្នុងពេលទទួលធ្វើបុណ្យទន្លេក្នុងពេលខាងមុខនេះ ។ លោកក៏បានសំណូមពរដល់ប្រជាពលរដ្ឋដែលរស់នៅតាមផ្ទះថ្ម មាត់ទន្លេផ្សារក្រោម សូមជួយធ្វើអនាម័យតាមមុខផ្ទះឲ្យបានស្អាតល្អ សូមកុំយកខោអាវនៅមុខផ្ទះនៅតាមមាត់ទន្លេ ដែលធ្វើអោយប៉ះពាល់ដល់សោភ័ណភាព ក៏ដូចជាមិនគាប់បីចំពោះភ្ញៀវបរទេសយ៉ាងហ្នឹងដែរ ។ លោកក៏បានស្នើសុំឲ្យមន្ត្រីនគរបាលប៉ុស្តិ៍រដ្ឋបាលផ្សារឆ្នាំង ក៏ដូចជានគរបាលទេសចរណ៍នៅប្រចាំការកំពង់ផែរទេសចរណ៍ផ្សារក្រោម ក៏សូមជួយអប់រំណែនាំ ប្រជាពលរដ្ឋជួយរៀបចំសណ្តាប់ធ្នាប់លក់ដូរតាមច្រាំងទន្លេឲ្យបានល្អប្រសើរផង ៕
ចែករំលែកព័តមាននេះ