ខេត្តកំពង់ឆ្នាំង ៖ លោកនាយឧត្តមសេនីយ៍ មាស សុភា អគ្គមេបញ្ជាការរង កងយោធពលខេមរៈភូមិន្ទ មេបញ្ជាការកងទ័ពជើងគោក បានមានប្រសាសន៍ថា ផ្តើមចេញពីកត្តាសាមគ្គីរវាងប្រទេសទាំងពីរ គឺកម្ពុជា-វៀតណាម ដែលធ្លាប់ប្រកៀកស្មាគ្នាក្នុងការប្រយុទ្ឋ ដើម្បីឯករាជភាព អធិបតេយ្យភាពរបស់ប្រទេសរៀងៗខ្លួន ទើបយើងបានសុខសន្តិភាពមកដល់សព្វថ្ងៃនេះ ។ លោកបានមានប្រសាសន៍បែបនេះ នៅក្នុងពិធីសម្ភាធដាក់ឱ្យប្រើប្រាស់អគារបញ្ជាការតំបន់ប្រតិបត្តិការសឹករងកំពង់ឆ្នាំង កាលពីរសៀលថ្ងៃទី២៦ មីនា ។
លោកបន្តថា ដូចកាលពីជាង៣៩ឆ្នាំមុន ប្រទេសកម្ពុជាបានធ្លាក់ចូលក្នុងរបបមួយខ្មៅងងិត មានការកាប់សម្លាប់ ប្រជាពលរដ្ឋស្លូតត្រង់ បង្អត់អាហារ បង្ខំឱ្យធ្វើការជាទម្ងន់ គ្មានសិទ្ឋសេរីភាព ពេលនោះ ប្រជាពលរដ្ឋ បានលើកដៃសំពះ សុំរកជំនួយ ដើម្បីសង្គ្រោះប្រទេសជាតិ សង្គ្រោះប្រជាពលរដ្ឋ អោយរួចផុត ពីសេចក្តីស្លាប់ ប៉ុន្តែគ្មាននរណាជួយយើងឡើយ ។ ក្នុងគ្រាដែលលំបាកនោះ មានតែកងទ័ពរណសិរ្ស២ ធ្នូ និងកងទ័ពស្មគចិត្តវៀតណាមនោះទេ ដែលបានវាយរំលំរបបយង់ឃ្នងរបស់ប៉ុល ពត និងរំដោះប្រទេសជាតិ នៅថ្ងៃ៧ មករា ឆ្នាំ១៩៧៩ ព្រមទាំងបានកសាងរីកចំរើនរហូតដល់សព្វថ្ងៃ ។
យោងតាមរបាយការណ៍របស់លោកធន ធឿន មេបញ្ជាការតំបន់ប្រតិបត្តិការសឹករងកំពង់ឆ្នាំងឱ្យដឹងដែរថា អគារដែលជាជំនួយរបស់កងទ័ពវៀតណាមនៅពេលនេះ គឺមានកម្ពស់ពីរជាន់មានទទឹង១១,៥០ម៉ែត្រ បណ្តោយ ៤៣,៤០ម៉ែត្រ មានបន្ទប់ធ្វើការ២៩បន្ទប់ ក្នុងនោះបន្ទប់ធ្វើការ២៥បន្ទប់ សាលប្រជុំ១បន្ទប់ បន្ទប់ទទួលភ្ញៀវ១ និងបន្ទប់ទឹក២ ។
ចែករំលែកព័តមាននេះ