ខេត្តព្រៃវែង ៖ បុរសម្នាក់ព្រមទាំងក្មេងប្រុសម្នាក់ទៀតបានស្លាប់បាត់បង់ជីវិតភ្លាមៗនៅហ្នឹងកន្លែង បន្ទាប់ពីជិះម៉ូតូទៅបុកគូថរថយន្តយីឌុបមួយគ្រឿង ដែលខូចហើយម្ចាស់បានចតចោលនៅលើស្ពានហ្សឹបាសា ហៅស្ពានអ្នកលឿង ។ ហេតុការណ៌នេះបានកើតឡើងកាលពីវេលាម៉ោង០៧និង៤៥នាទីយប់ ថ្ងៃទី២៥ ខែមីនា…
ខេត្តព្រៃវែង ៖ បុរសម្នាក់ព្រមទាំងក្មេងប្រុសម្នាក់ទៀតបានស្លាប់បាត់បង់ជីវិតភ្លាមៗនៅហ្នឹងកន្លែង បន្ទាប់ពីជិះម៉ូតូទៅបុកគូថរថយន្តយីឌុបមួយគ្រឿង ដែលខូចហើយម្ចាស់បានចតចោលនៅលើស្ពានហ្សឹបាសា ហៅស្ពានអ្នកលឿង ។
ហេតុការណ៌នេះបានកើតឡើងកាលពីវេលាម៉ោង០៧និង៤៥នាទីយប់ ថ្ងៃទី២៥ ខែមីនា នៅលើស្ពានហ្សឹបាសា ហៅស្ពានអ្នកលឿង (ត្រើយខាងលិច) ដែលស្ថិតក្នុងភូមិអំពិល ឃុំកំពង់ភ្នំ ស្រុកលើកដែក ខេត្តកណ្ដាល ។
ជនរងគ្រោះដែលស្លាប់នោះ ទី១ឈ្មោះ យ៉ុង និត ភេទប្រុស អាយុ៤៩ឆ្នាំ ត្រូវជាតា និងទី២ឈ្មោះ សឿន អ៊ូក ភេទប្រុស អាយុ៦ឆ្នាំ ត្រូវជាចៅ អ្នកទាំង២មានទីលំនៅក្នុងភូមិឃុំកើតហេតុតែម្តង ។
យោងតាមការឲ្យដឹងពីកម្លាំងនគរបាលស្រុកលើកដែក បានបញ្ជាក់ថា នៅចន្លោះម៉ោងប្រមាណជា០៦ល្ងាច មុនពេលកើតហេតុ គេឃើញមានរថយន្តយីឌុបដឹកទំនិញមួយគ្រឿង ពាក់ផ្លាកលេខ ស្ទឹងត្រែង ៣A-៩២៤៨ ដែលលើរថយន្តមានដឹកទំនិញឡើងពេញហៀរទ្រុង បានបើកឡើងស្ពានអ្នកលឿង ក្នុងទិសដៅពីលិចទៅកើត ពេលជិតដល់ពាក់កណ្ដាលស្ពាន ស្រាប់តែរថយន្តខូចទៅមុខលែងរួច ហើយទំនងជាម្ចាស់រកជាងមកជួសជុលមិនបាន ទើបចតរថយន្តទុកចោលនៅលើស្ពានតែម្តង ដោយគ្រាន់តែបើកភ្លើងរថយន្តជាសញ្ញាឲ្យដឹង តែមិនបានដាក់សញ្ញានៅខាងមុខ ឬក្រោយរថយន្តសម្រាប់ឲ្យដឹងនោះទេ ។
សមត្ថកិច្ចដដែលបានបញ្ជាក់ថា រហូតដល់ម៉ោង០៧និង៤៥នាទីយប់ ជនរងគ្រោះទាំង២នាក់ តា និងចៅ ជិះម៉ូតូមួយគ្រឿងម៉ាកសង់កូរ៉េ ពណ៌ក្រហម ពាក់ផ្លាកលេខ ភ្នំពេញ ២C-២៩៣៨ ក្នុងល្បឿងយ៉ាងលឿន ក្នុងទិសដៅពីលិចទៅកើត ពេលមកដល់កន្លែងកើតហេតុ មិនដឹងថា មកពីមូលហេតុអ្វីស្រាប់តែជិះចូលទៅបុកគូទរថយន្តដែលចតស្ងៀម បណ្ដាលឲ្យបែកក្បាលបាក់កស្លាប់ទាំង២នាក់តែម្តង ហើយនៅលើខ្លួនប្រាណក៏ពុំមានជាតិស្រា ដែលបញ្ជាក់បញ្ជាក់ថាស្រវឹងស្រានោះដែរ ។
ក្រោយកើតហេតុភ្លាម សមត្ថកិច្ចបានទៅដល់កន្លែងកើតហេតុ និងបានស្រាវជ្រាវរកអត្តសញ្ញាណជនរងគ្រោះ និងបានទាក់ទងហៅក្រុមគ្រួសារមកទទួលយកសពជនរងគ្រោះ ពីលើស្ពាននៅវេលាម៉ោង៩យប់ ក្រោយកើតហេតុប៉ុន្មានម៉ោង ចំណែករថយន្ត និងម៉ូតូ សមត្ថកិច្ចបានអូសយកទៅរក្សាទុកនៅអធិការដ្ឋាននគរបាលស្រុកលើកដែក ដើម្បីបំពេញសំណុំរឿងទៅតាមនីតិវិធី ៕
ចែករំលែកព័តមាននេះ